Read nande Erĩlũayo 17 Bible Online

Erĩlũayo 17 - nande bible

Erĩlũayo 17

¹Nʼendeko yosĩ yʼabana ba Ĩsraelĩ mobagenda erĩlũa omo mbwarara yʼeSĩnaĩ, omo lugendo lwabo ngʼerihana lyʼOmwami Mukulu, mobalalirira eRefĩdĩmũ; neryo sihabya magetsi wʼerĩpũlya busana nʼabandu.

²Busana nʼekyo abandu mobanegena na Musa bati, Utuhe amagetsi tũpũlaye. Na Musa mwabwirabo ati, Busana nakĩ mukanegena nage kwehĩ? Busana nakĩ mukalenga oko Mwami Mukulu kwehĩ?

³Nĩkwa abandu mobakwa enyota, nʼabandu mobatonga Musa bati, Busana nakĩ watũhetũkaya erĩlũa eMĩsĩrĩ, erĩtwĩta nʼabana betu, nʼesyonyama syetu omo nyota kwehĩ?

⁴Neryo Musa mwalakira Omwami Mukulu, ati, Nyikolekĩ oko bandu aba kwehĩ? Bali hakũhĩ nʼerĩnyĩta omo mabwe.

⁵Neryo Omwami Mukulu mwasũbĩrya Musa ati, Ulabe embere wʼabandu aba, utwale haguma nawe abakulu bʼAbaĩsraelĩ; nʼomutso wawe, ogo waswĩraya omo lũsĩ lwʼeNĩlĩ, wĩmayego omo byala byawe, ugende.

⁶Lebaya, ngandyimana embere syawe okwʼĩbwe eHorebũ; nawe ũkandĩswĩrya erĩbwe, nʼamagetsi akandihuluka mulyo, abandu batoke erĩpũlya. Na Musa mwakola atya omo meso wʼabakulu ba Ĩsraelĩ.

⁷Neryo mwahula erĩna lyaho mo Masa, na Merĩba, busana nʼerinegena lyʼabana ba Ĩsraelĩ, nʼakandi busana nʼerirenga oko Mwami Mukulu bati, Omwami Mukulu ali haguma netu kutse iyihi kwehĩ?

⁸Neryo Abanya Amalekĩ mobasa, mobalwa na Ĩsraelĩ eRefidĩmũ.

⁹Na Musa mwabwira Yosũa ati, Uyisoge busana netu abandu, mugende mulwe na Amalekĩ; omo ngyakya nasyahangana oko singi yʼekitwa nʼomũtso wa Nyamuhanga omo byala byage.

¹⁰Neryo Yosũa mwakola ngoko Musa amubwira, mwalwa na Amalekĩ; na Musa na Harũnĩ na Hũrĩ mobahetukira oko singi yʼekitwa.

¹¹Nʼenyũma wʼaho, omugulu Musa asumbira ebyala biwe byʼendata, Abaĩsraelĩ mobakĩnda, nʼomugulu akyĩmaya ebyala biwe, Abaamalekĩ mobasĩnga.

¹²Nĩkwa ebyala bya Musa mobyalĩtoha, mobĩmya erĩbwe mobahĩralyo ahisi ukwʼiye, naye mwĩkala kulyo; neryo Harũnĩ na Hũrĩ mobalegekerera amaboko wuwe, omuguma oko luhande luguma, nʼogundi oko lundi luhande; nʼebyala biwe mobyasĩka erĩhĩka okwʼirenga lyʼeryuba.

¹³Neryo Yosũa mwasĩnga Amalekĩ nʼabandu buwe omo boya bwʼomũyalĩ.

¹⁴Neryo Omwami Mukulu mwabwira Musa ati, Usake ekĩ omo kitabu busana nʼeryibukwa, kandi utonderebyo omo matwĩ wa Yosũa; kusangwa nasyasangula eryibukwa lya Amalekĩ eyĩkwa oko bũtũkũ.

¹⁵Neryo Musa mwahĩmba ekiherero, mwahula erĩna lyaho mo Mwami Mukulu ni Bendera yage;

¹⁶neryo mwabũga ati, Omwami Mukulu abĩrĩlahĩrya; ati, Omwami Mukulu asyalwa na Amalekĩ oko ndengo syosĩ.