Read nande Erĩlũayo 18 Bible Online

Erĩlũayo 18 - nande bible

Erĩlũayo 18

¹Neryo Yetero, omũhererĩ wʼeMĩdĩanĩ, ĩse-byala wa Musa, mowa ebyosĩ ebyo Nyamuhanga akolera Musa, na Ĩsraelĩ abandu buwe, ngoko Mwami Mukulu alũsaya Abaĩsraelĩ erĩlũa eMĩsĩrĩ.

²Na Yetero, ĩse-byala wa Musa, mwatwala Sĩpora, omũkalĩ wa Musa, oyo atuma ehandi,

³nʼabagala buwe babiri; erĩna lyʼomuguma iyo Geresomĩ; kusangwa abũga ati, Nabiribya mubunga omo kihugo kite kyetu.

⁴Nʼerĩna lyʼogundi lyabya Elĩezerĩ; kusangwa (abũga) ati, Nyamuhanga wa tata wage abya mũwatĩkya wage, kandi mwanyĩlamya oko mũyalĩ wa Farao.

⁵Neryo Yetero, ĩsebyala wa Musa, mwasa haguma nʼabagala buwe abo nʼomũkalĩ wuwe eyiri Musa omo mbwarara aho alalirira, oko kitwa kya Nyamuhanga.

⁶Neryo mwabwira Musa ati, Ĩngye, tata-byala wawe Yetero, ngakũhĩkako, nʼomũkalĩ wawe, nʼabagala bawe babiri.

⁷Neryo Musa mwayahĩndana nʼĩse-byala wuwe, mũnama mwamulyatsirira; mobabũlanĩa ewahi; neryo mobingira omo hema.

⁸Neryo Musa mwabwira ĩse-byala wuwe ebyosĩ ebyo Mwami Mukulu akolera Farao nʼAbanya Mĩsĩrĩ busana na Ĩsraelĩ, nʼamagalĩ gosĩ awahĩka kubo omo nzira, ngoko Mwami Mukulu alamayabo.

⁹Na Yetero mwatsema oko bibuya byosĩ Omwami Mukulu akolera Abaĩsraelĩ, akalamyabo erĩlũa omo byala byʼAbanya Mĩsĩrĩ.

¹⁰Neryo Yetero mwabũga ati, Omwami Mukulu apipawe, oyo wabalamaya erĩlũa omo byala byʼAbanya Mĩsĩrĩ, nʼerĩlũa omo byala bya Farao; oyo walamaya abandu erĩlũa omo byala byʼAbanya Mĩsĩrĩ.

¹¹Lino nyasĩ Omwami Mukulu ni mukulu kwilaba esyonyamuhanga syosĩ; ega, omo mwatsi oyo, bakolerabo omwʼiyipipa.

¹²Neryo Yetero, ĩse-byala wa Musa, mwĩmya obuhere bwʼerĩokya nʼamahere busana na Nyamuhanga; neryo Harũnĩ mwasa, nʼabakulu bosĩ ba Ĩsraelĩ, erirya obundu haguma nʼĩse-byala wa Musa embere sya Nyamuhanga.

¹³Enyũma wʼaho engyakya, Musa mwĩkala akatswera bandu; nʼabandu mobahangana erĩtĩmba uku Musa erĩtsũka omo ngyakya-ngyakya erĩhĩka omwʼĩgolo-golo.

¹⁴Nʼomugulu ĩse-byala wa Musa alangira ebyosĩ akolera bandu, mwabũga ati, Ni mwatsi wahi ogo ukakolera bandu kwehĩ? Busana nakĩ ũkĩkala ĩgowene, nʼabandu bosĩ bakakũtĩmbako erĩtsũka omo ngyakya-ngyakya erĩhĩka omwʼĩgolo-golo kwehĩ?

¹⁵Na Musa mwabũga nʼĩse-byala wuwe ati, Kusangwa abandu bakambĩkako nʼerĩbũlya uku Nyamuhanga.

¹⁶Omugulu bakabya nʼomwatsi, bakambĩkako; nage inatswera omo katĩkatĩ kʼomundu na mũlĩkyabo, nage ngamĩnyĩsayabo emigambo ya Nyamuhanga nʼebihano biwe.

¹⁷Nʼĩse-byala wa Musa mwamubwira ati, Omwatsi ogo ukakola sĩowene.

¹⁸Kwenene wasyabonda, uwe, nʼabandu aba abali haguma nawe; kusangwa omwatsi oyũ akũlĩtohĩreko kutsibu; siwangatoka erikolago ĩgowene.

¹⁹Lino wowe ekĩnywa kyage, ngandikuhana, na Nyamuhanga abye haguma nawe; ubye busana nʼabandu oko luhande lwa Nyamuhanga, nawe ulete emyatsi uku Nyamuhanga.

²⁰Nawe wasyakangĩrĩryabo emigambo, nʼebihano. Wasyakangyabo enzira eyo bangagenderamo, nʼomũbĩrĩ bangakola.

²¹Kandi wasyayibanira omo katĩkatĩ kʼendeko abandu bʼamenge, nʼabakubaha Nyamuhanga, abandu bʼekwenene, abakagalirawa oko ndũndĩ itatunganene; ĩwahĩra aba bʼendata oko bandu eribya batabalĩ bʼamaelfu, nʼabatabalĩ bʼamagana, nʼabatabalĩ bʼamakũmĩ atanu, nʼabatabalĩ bʼamakũmĩ.

²²Batswere abandu oko migulu yosĩ; neryo obuli mwatsi munene basyakuleterago, nĩkwa obuli mwatsi muke basyatswerago ĩbobene-bene; neryo wasyanguhirwa, nabo basyaheka omũbĩrĩ haguma nawe.

²³Wamakola omwatsi oyũ, kandi Nyamuhanga akakuhana atya, wasyatoka erĩsĩkya omutima, nʼabandu bosĩ aba basyaya ewabobo nʼobuholo.

²⁴Neryo Musa mowa ekĩnywa kyʼĩse-byala, mwakola ebyosĩ ebyo abũga.

²⁵Neryo Musa mwayisoga abandu bʼamenge omo katĩkatĩ kʼAbaĩsraelĩ bosĩ, mwayirabo mo bakulu endata oko handi, abatabalĩ bʼamaelfu, nʼabatabalĩ bʼamagana nʼabatabalĩ bʼabandu makũmĩ atanu, nʼabatabalĩ bʼabandu makũmĩ.

²⁶Nabo mobatswera abandu oko migulu yosĩ; emyatsi eyĩkalĩre mobaleterayo Musa, nĩkwa obuli myatsi mike-mike, mobatswerayo ĩbobene-bene.

²⁷Neryo Musa mwalagana nʼĩse-byala wuwe; naye mwagenda ewuwe, omo kihugo kiwe.