Read nande Erĩlũayo 2 Bible Online

Erĩlũayo 2 - nande bible

Erĩlũayo 2

¹Neryo omundu wʼekĩtũnga kya Lawĩ mwayahĩkya mwali wʼAbalawĩ.

²Nʼomũkalĩ oyo mwaheka obukule, mwabuta omugala; nʼomugulu amulolako kwʼali mwana gowene, mwamũbĩsa emikera ĩsatu.

³Nʼomugulu ataluka erĩswamũbĩsa mwamwĩmĩrya akato kʼekitiri kʼerĩsesa, neryo mwahakabyako eribumba nʼenĩmba, mwahĩra omwana omwisi syako, mwahĩrako omwʼĩsesa oko mukyingyi wʼolũsĩ.

⁴Neryo mwali wabo mwahangana hali erĩrebya, aminye ekĩkandĩmũhĩkako.

⁵Neryo mwali wa Farao mwandagalira oko lũsĩ akayayikosa; nʼabana-bato buwe mobalendera oko mũsĩke wʼolũsĩ; mobalangira akato kʼomwʼĩsesa, neryo mwatuma omwana-muto wuwe eriendako.

⁶Neryo mwalĩbũlako, mwalangira olumekeke; neryo lebaya, olumekeke molwalira. Neryo mwakwĩralo bũlĩge, mwabũga ati, Oyũ ni muguma wʼoko bana bʼAbaebrania.

⁷Neryo mwali wabo mwana mwabwira mwali wa Farao ati, Nyigende nʼeriyakubirikirira omũlemberĩ yʼoko bakalĩ bʼAbaebrania ĩnĩakongerya omwana kwehĩ?

⁸Neryo mwali wa Farao mwabũga naye ati, Ugende. Nʼomwana-muto oyo mwagenda mwabirikira nyĩnya wʼomwana.

⁹Neryo mwali wa Farao mwabũga naye ati, Wĩmaye omwana oyũ, ũnyongerayeye, nage nasyakuhemba. Nʼomũkalĩ oyo mwĩmya omwana mwamwongya.

¹⁰Neryo omwana mwakula, neryo mwamuletera mwali wa Farao, neryo omwana oyo mwabya mugala wa mwali wa Farao. Neryo mwaluka erĩna liwe mo Musa, ati, Kusangwa namusabula omo lũsĩ.

¹¹Nʼenyũma wʼebiro ebyo, Musa abere abikula, mwaya eyiri bagala babo, erilangira emiheke yabo; neryo mwalangira Omunya Mĩsĩrĩ akaswĩrya Omuebrania muguma gʼoko balĩkyabo.

¹²Neryo mwakebera eyĩ nʼeyĩ, neryo abere alangira ko hate mundu, mwaswĩrya Omunya Mĩsĩrĩ, mwamwĩta, mwamũbĩsa omo musege.

¹³Neryo mwahongoka ekiro kyʼakabiri, kandi mwalebya abandu babiri bʼAbaebrania bakalwa; neryo mwabũga nʼoyo wakola nabi ati, Busana nakĩ ũkaswĩraya mũlĩkyenyũ kwehĩ?

¹⁴Naye mwabũga ati, Nindi wakũyĩrĩre mo mukulu nʼomũtswerĩ ũkwʼĩtwe kwehĩ? Ũkaganĩraya erĩnyĩta ngoko wĩta Omunya Mĩsĩrĩ kwehĩ? Neryo Musa mubaha, mwabũga ati, Kwesĩ omwatsi oyũ abiriminyikala.

¹⁵Neryo omugulu Farao owa omwatsi oyo, mwasonda erĩĩta Musa. Nĩkwa Musa mwatibita erĩlũa omo meso wa Farao, mwĩkala omo kihugo kyʼeMĩdĩanĩ; neryo mwĩkala oko mũsĩke wʼekitehero.

¹⁶Neryo omũhererĩ wʼeMĩdĩanĩ abya awite bali balinda; nabo mobasa eriteha amagetsi mobũsũlya ebĩrĩnga erĩsomya esyombũlĩ syabo.

¹⁷Nʼabalĩsya mobasa mobahigabo; nĩkwa Musa mwahangana mwawatĩkya abana-bato abo, erĩsomya esyombũlĩ syabo.

¹⁸Neryo omugulu bahĩka uku Rũelĩ, tata wabo, mwabũga ati, Ko mwamasa lũba muti mũnabwĩre kwehĩ?

¹⁹Nabo mobabũga bati, Omunya Mĩsĩrĩ yũlyatũlamaya omo byala byʼabalĩsya, mwakatutehera amagetsi nʼerĩsomya esyombũlĩ.

²⁰Neryo mwabũlya bali buwe ati, Ali hahi? Busana nakĩ momũkasĩga omundu oyo kwehĩ? Mumubirikire, alye akalyo.

²¹Neryo Musa mwatsema erĩĩkala nʼomundu oyo; neryo Rũelĩ mwaha Musa yʼomwali wuwe ye Sĩpora.

²²Neryo Sĩpora mwabuta omugala, mwahula erĩna liwe mo Gersomĩ; kusangwa abũga ati, Nabiribya mubunga omo kihugo kite kyetu.

²³Nʼenyũma wʼebiro bingi, Omwami wʼeMĩsĩrĩ mwahola; nʼabana ba Ĩsraelĩ mobasĩmba busana nʼobukobe mobalira; nʼekiriro kyabo mokyahĩka uku Nyamuhanga busana nʼobukobe obo.

²⁴Neryo Nyamuhanga mowa emĩsĩmbo yabo. Neryo Nyamuhanga mwibuka endagano yiwe haguma na Abrahamũ, na Ĩsaka, na Yakobo.

²⁵Neryo Nyamuhanga mwalangira abana ba Ĩsraelĩ, kandi mwibukabo.