Read nande Erĩlũayo 23 Bible Online

Erĩlũayo 23 - nande bible

Erĩlũayo 23

¹Sũkanyaye engulu yʼamabehi; kandi Sũhĩre ebyala byawe haguma nʼababi eribya mũlangĩrĩ wʼekitatunganene.

²Susyekwama endeko erikola ekibi; kutse sũkanaye omwatsi nʼerikwama endeko busana nʼeribindula erĩbanza;

³kutse sũtagaye omwera omo mwatsi wuwe.

⁴Wamahĩndana nʼende yʼenzĩgũ yawe kutse epunda yiwe eyiriatala, wasyamũsũbũlĩryasyo kwenene.

⁵Wamalangira epunda yʼoyũkakũkwa obusu iyigotsere ĩkakĩndwa nʼomuheke wayo, ĩsĩwalĩga erĩsĩgayo, kwenene wasyabohola omuheke wayo.

⁶Susyebindula olubanza lowene lwʼomwera wawe lo nabi omo mwatsi wuwe.

⁷Uyigabe oko mwatsi wʼamabehĩ; oyute nʼĩlolo nʼoyutunganene sũmwĩte; kusangwa sindiendisyaganzira omubi eribya mutunganene.

⁸Sũsyĩmaya ekyũtũlĩro nʼahake; kusangwa ekyũtũlĩro kĩkalĩba ameso wʼabakalangira, nʼerĩhengemya ebĩnywa byʼabatunganene.

⁹Kandi sũsyegalaya omubunga; kusangwa mũnasĩ omutima wʼomubunga, kusangwa mwabya babunga omo kihugo kyʼeMĩsĩrĩ.

¹⁰Omo myaka ndatu wasyahera eririma lyawe, nʼerihulula esyombuto syalyo;

¹¹nĩkwa oko mwaka wʼakalinda iwalekalyo eriluhuka nʼeribya kisambu, abera bʼabandu bawe batoke erirya, nʼebyo bakasĩganaya enyama yʼomolĩ yasyalyabyo. Ukandisyakola utya eririma lyʼebĩnyũ nʼeririma lyʼemĩzeĩtũnĩ

¹²Ebiro ndatu wasyakola emĩbĩrĩ yawe, nʼoko kiro kyʼebirinda wasyaluhuka; ende yawe nʼepunda isyaluhuka, nʼomugala wʼomukobe wawe wʼobũkalĩ, nʼomubunga, ibatoka erihumula.

¹³Ebyosĩ nabiribabwira mwowebyo; kandi simwahule erĩna lyʼesindi nyamuhanga, kutse sĩryogũbawe lĩkalũa omo buno bwawe.

¹⁴Engendo ĩsatu omo mwaka wasyanyiyirira ekiro kikulu.

¹⁵Wasyateya ekiro kikulu kyʼobundu bute mo kĩhamya; oko biro birinda wasyalya obundu bute mo kĩhamya, ngoko nakutegeka, oko mugulu ahĩrawa oko mukera wa Abĩbũ, kusangwa mugo mwalũa eMĩsĩrĩ; kandi sihali mundu wasyahĩka embere syage yo buyira;

¹⁶Ekiro kikulu kyʼerigesa ebĩgũma byʼerĩmbere byʼemĩbĩrĩ yawe, eyo wahera omwʼirima; ekiro kikulu kyʼerikumakuma erigesa lyosĩ oko ndũlĩ yʼomwaka, omugulu ũkahĩndanaya ebyo wahingira omwʼirima.

¹⁷Engendo ĩsatu omo mwaka muguma abalume bawe bosĩ basyahulukira embere wʼOmwami Mukulu Nyamuhanga.

¹⁸Susyeherera omusasi wʼobuhere bwage haguma nʼobundu obuli mwʼekĩhamya; kutse amagũta wʼekiro kikulu kyage isyasiba omo kiro kyosĩ erĩhĩka oko ngyakya.

¹⁹Ebĩgũma ebĩkatsũka eriera omwʼirima lyawe wasyaletabyo omo nyũmba yʼOmwami Mukulu Nyamuhanga wawe. Sũsyehũka ekyana kyʼembene kyʼomo masabũ wʼenyĩnya wakyo.

²⁰Lebaya, ngatuma omũlaĩka embere wawe, erĩkũteya omo nzira, nʼerikuleta aho nabĩrĩkokotya.

²¹Mũyĩtegaye embere wuwe, muhulikirire omulenge wuwe; simuyisamambule kwiye; kusangwa siendisyababuyira amalolo wenyũ; kusangwa erĩna lyage riri umwʼiye.

²²Nĩkwa wamahulikirira ndeke omulenge wuwe, nʼerikola ebyosĩ ngabũga; neryo nasyabya nzĩgũ yʼesyonzĩgũ syawe, nʼekyabise oko byabise byawe.

²³Kusangwa omũlaĩka wage asyagenda embere wawe, nʼerĩkũkolya omo kihugo kyʼAbaamorĩ, nʼAbahĩtĩ, nʼAbaperĩzĩ, nʼAbakanana, nʼAbahĩvĩ, nʼAbayebũsĩ; nage nasyahwerekereryabo.

²⁴Sũsyũnamira esyonyamuhanga syabo, kutse erikolerasyo, kutse erikola ngʼemĩbĩrĩ yasyo; nĩkwa wasyatogotyasyo kutsibu, nʼerĩtsũtsanga esyondũyĩ syasyo.

²⁵Kandi mwasyakolera Omwami Mukulu Nyamuhanga wenyũ, naye asyatsumula akalyo kenyũ, nʼamagetsi wenyũ; nage nasyalũsya esyondwala omo katĩkatĩ kenyũ.

²⁶Siendisyabya oyũkatesaya, kutse omugumba omo kihugo kyenyũ; nʼeriganza lyʼebiro byenyũ nasyaberereryalyo.

²⁷Nasyatuma erĩũbahĩrĩrya lyage embere wenyũ, nʼeriganga-gangya abandu bosĩ abo mwasyahĩkĩrako, kandi nasyaleka esyonzĩgũ syenyũ syosĩ eribabindulira omugongo.

²⁸Nasyatuma endwa embere wenyũ, eyikasyahiga Abahĩvĩ, nʼAbakanana, nʼAbahĩtĩ embere syenyũ.

²⁹Sindiendisyahigabo embere wenyũ oko mwaka muguma, ekihugo kikasyabya kĩma, nʼesyonyama syʼomolĩ isyakanyirira erĩbagalya.

³⁰Nasyahigabo lyolo-lyolo embere syenyũ, erĩhĩka aho mwasyakanyirira, nʼerĩĩmya ekihugo mo mwandu.

³¹Kandi nasyahĩra Omutano wenyũ erĩtsũka oko Ngetsi yʼEngula erĩhĩka oko ngetsi yʼAbafĩlĩstĩnĩ, nʼerĩtsũka oko mbwarara erĩhĩka oko Lũsĩ lwʼeEfũratĩ, kusangwa nasyahĩra esyondũlanĩ syʼekihugo omo byala byenyũ; kandi mwasyahigabo embere syenyũ.

³²Simusyesakana nabo kutse nʼesyonyamuhanga syabo.

³³Sĩbendĩsyĩkala omo kihugo kyenyũ, bakasyaleka ĩmwanyĩhalyako; kusangwa mwamakolera esyonyamuhanga syabo, kwenene kyasyabya kitego kuwe.