Read nande Erĩlũayo 26 Bible Online

Erĩlũayo 26 - nande bible

Erĩlũayo 26

¹Kandi wasyalanda eHema haguma nʼesyongimba esĩkasũkũlĩraya ĩkũmĩ esikaleremba esyʼekĩtanĩ ekĩlũkĩre ndeke; ekyʼerangĩ yʼakanĩkĩ, nʼeyʼamabono, nʼeyʼengula, haguma nʼamakerũbĩ, wasyalukasyo omo mũbĩrĩ wʼomunyima nyima.

²Obuli bwʼobuli lukimba olukasũkũlĩraya bwasyabya metere ĩkũmĩ nʼĩbĩrĩ na sentĩmetere makũmĩ munani nʼomunani (12.88 m), nʼobugali bwʼobuli lukimba olũkasũkũlĩraya bwasyabya metere nguma na sentĩmetere makũmĩ munani nʼĩnĩ (1.84 m), esyongimba esĩkasũkũlĩraya syosĩ syasyabya lulengo luguma.

³Esyongimba esĩkasũkũlĩraya ĩtanu syasyabohwa haguma olundi oko lundi; nʼesindi ngimba esĩkasũkũlĩraya ĩtanu syasyaboherwa haguma olundi oko lundi.

⁴Wasyahĩra ehisu hyʼerangĩ yʼakanĩkĩ oko mũsĩke wʼolukimba luguma olũkasũkũlĩraya erĩtsũka oko mũsĩke aho lũlĩngĩre; erĩyahĩka aho lubohere; wasyakola utya omũsĩke wʼolukimba oluli eyĩhya omo kĩbohĩ kyʼakabiri.

⁵Wasyalanda ebisu makũmĩ atanu omo lukimba olũkasũkũlĩraya, nʼebisu makũmĩ atanu wasyalandabyo oko mũsĩke wʼolukimba olũkasũkũlĩraya aho sibohere ahʼakabiri; ebisu byasyasamalirana.

⁶Kandi uyire ebĩbohĩ makũmĩ atanu byʼesyamagetsi, nʼerĩkũndĩkanĩa esyongimba esĩkasũkũlĩraya olundi oko lundi omo bĩbohĩ; nʼeHema yasyabya nguma-guma.

⁷Neryo wasyayira esyongimba esĩkasũkũlĩraya esĩrerembĩre syʼobweya bwʼesyombene busana nʼeHema endata oko Hema; wasyayira esyongimba lĩraya esĩrerembĩre ĩkũmĩ nʼoluguma.

⁸Obuli bwʼobuli lukimba olũkasũkũlĩraya olũlerembĩre bwasyabya metere ĩkũmĩ nʼĩsatu na sentĩmetere makũmĩ munani (13.80 m), nʼobugali bwʼobuli lukimba olũkas ũkũlĩraya olũlerembĩre, emetere nguma na sentĩmetere makũmĩ munani nʼesĩnĩ (1.84 m); esyongimba esĩkasũkũlĩraya esĩrerembĩre ĩkũmĩ nʼoluguma syasyabya syʼolulengo luguma.

⁹Wasyabohera esyongimba esĩkasũkũlĩraya esĩrerembĩre ĩtanu syʼaho wasyo, esyongimba esĩkasũkũlĩraya esĩrerembĩre ndatu aho wasyo, wasyalĩnga olwʼendatu embere syʼeHema.

¹⁰Kandi wasyayira ebisu makũmĩ atanu oko mũsĩke wʼolukimba olũkasũkũlĩraya olũlerembĩre luguma oluli eyĩhya aho sibohere, nʼebisu makũmĩ atanu oko mũsĩke wʼolukimba olũkasũkũlĩraya olũlerembĩre, oluli eyĩhya aho sibohere eryʼakabiri.

¹¹Wasyayira ebĩbohĩ makũmĩ atanu byʼemiringa; nʼerĩhĩra ebĩbohĩ omo bisu, nʼeribohera eHema yo haguma iyatoka eribya nguma.

¹²Nʼekitswe ekikaleremba ekikasaka oko syongimba esĩkasũkũlĩraya syʼeHema, ekitswe kyʼolukimba ekiriasaka kyasyaleremba oko mugongo wʼeHema.

¹³Kandi olukasaka oko buli bwʼesyongimba esĩkasũkũlĩraya syʼeHema lwasyaleremba oko mbande syʼeHema sentĩmetere makũmĩ ani nʼendatu nʼeyindi sentimetere makũmĩ ani nʼendatu oko lundi luhande lwʼeHema oluhande Olũ nʼoluhande lulya eriswikayo.

¹⁴Kandi wasyayira ekyʼeriswika eHema omo ngobĩ syʼesyombangale esĩnĩre omo rangĩ yʼengula, nʼekyʼeriswika endata kyʼesyongobĩ syʼepombolo.

¹⁵Ubatse ebisayi busana nʼeHema omo muti wʼomũshĩta, ebikasingikawa.

¹⁶Obuli bwʼekisayi bwasyabya metere ĩnĩ na sentĩmetere makũmĩ ndatu (4.60 m), nʼobugali bwʼobuli kisayi sentĩmetere makũmĩ ndatu nʼomwenda (69 cm).

¹⁷Esyondimi ĩbĩrĩ syasyabya omo buli kisayi, oluguma erisesera omo lundi; wasyakola utya ebisayi byosĩ byʼeHema.

¹⁸Wasyayira ebisayi busana nʼeHema, ebisayi makũmĩ abiri busana nʼoluhande lwʼelutambi lwʼeyĩkwa erilola elutambi.

¹⁹Kandi wasyayira ehyũna makũmĩ ani hyʼekĩtsĩpa omwisi wʼebisayi makũmĩ abiri; ehyũna hibiri omwisi wʼekĩsayi kiguma busana nʼesyondimi ĩbĩrĩ; nʼehyũna hibiri omwisi wʼesindi kisayi busana nʼesyondimi ĩbĩrĩ syakyo;

²⁰kandi busana nʼoluhande lwʼakabiri lwʼeHema, oko luhande lwʼelutambi lwʼendata ebisayi makũmĩ abiri,

²¹nʼehyũna hyabyo hyʼekĩtsĩpa makũmĩ ani; ehyũna hibiri omwisi wʼekisayi kiguma, nʼehyũna hibiri omwisi wʼekindi kisayi.

²²Na busana nʼoluhande lwʼenyũma lwʼeHema ebwanga bwʼeyĩkwa wasyayira ebisayi ndatu.

²³Kandi wasyayira ebisayi bibiri busana nʼesyonũnga syʼeHema oko luhande lwʼenyũma.

²⁴Byasyabya bibiri-bibiri eyĩkwa, kandi ibyabya bitya erĩhĩka endata wabyo oko mbũka yʼerĩtsũka; neryo syasyabya oko bibiri byosĩ; byasyabya busana nʼesyonũnga ĩbĩrĩ.

²⁵Kandi hasyabya ebisayi munani, nʼebitindo byabyo byʼekĩtsĩpa, ebitindo erĩkũmĩ nʼendatu; ebitindo bibiri eyĩkwa oko kisayi kiguma, nʼebitindo bibiri eyĩkwa oko kindi kisayi.

²⁶Kandi wasyayira ebibatsi byʼomuti gʼomũshĩta; ebitanu busana nʼebisayi byʼoluhande luguma lwʼeHema,

²⁷nʼebitanu busana nʼebisayi byʼolundi luhande lwʼeHema, nʼebibatsi bitanu busana nʼolutambi lwʼeHema, busana nʼoluhande lwʼenyũma olũlolĩrye eyĩkwa.

²⁸Nʼomuti owali omo katĩkatĩ kʼebisayi asyalaba oko ndũlĩ erĩhĩka oko yindi ndũlĩ.

²⁹Kandi wasyabambĩrya ebisayi omo syamagetsi, nʼeriyira esyombũka syabyo busana nʼemyanya yʼehiti ehyo; kandi wasyaswika ehiti ehyo omo syamagetsi.

³⁰Kandi wasyasingika eHema ngʼomũsĩndo wakangĩbawa oko kitwa.

³¹Kandi wasyakokotya olukimba olũkasũkũlĩraya olwʼerangĩ yʼakanĩkĩ, nʼerangĩ yʼamabono, nʼerangĩ yʼengula, oko lukimba lwʼekĩtanĩ ekĩlũkĩre ndeke. Kandi wasyahĩrako edese yʼAmakerũbĩ.

³²Kandi wasyahanikalo oko ndũyĩ ĩnĩ esyʼomuti wʼomũshĩta esĩbambĩrye kwʼesyamagetsi; esyombaniko syasyo syasyabya syʼesyamagetsi, oko bitindo bini byʼekĩtsĩpa.

³³Kandi wasyahanika olukimba olũkasũkũlĩraya olo eyĩkwa oko bĩbohĩ, kandi wasyaleta erĩsandũko lyʼerĩtũlago aho omwisi oko lukimba olũkasũkũlĩraya olo; nʼolukimba olũkasũkũlĩraya lwasyabagabira ahabũyĩrĩre oko habũyĩrĩre kutsibu.

³⁴Kandi Wasyahĩra ekĩtũmbĩ kyʼeriganyira endata okwʼĩsandũko lyʼerĩtũlago omo habũyĩrĩre kutsibu.

³⁵Wasyahĩra emesa eyĩhya wʼolukimba olũkasũkũlĩraya nʼomutagala erĩhereranĩa nʼemesa oko luhande elutambi lwʼeyĩkwa lwʼeHema erĩlolya elutambi; Wasyahĩra emesa oko luhande lwʼelutambi lwʼendata.

³⁶Kandi wasyakokotya olukimba olũkasũkũlĩraya busana nʼolũkyo lwʼeHema olwʼerangi yʼakanĩkĩ, nʼerangĩ yʼolubono, nʼeyʼengula, nʼekĩtanĩ ekĩlũkĩre ndeke-ndeke, omũbĩrĩ wʼomũlũkĩ.

³⁷Kandi wasyakokotya esyondũyĩ ĩtanu syʼomuti wʼomũshĩta busana nʼolukimba olũkasũkũlĩraya nʼeribamba kusyo kwʼesyamagetsi; nʼesyombaniko syasyo syasyabya syʼesyamagetsi; kandi wasyahesa ebitindo bitanu byʼomulinga busana nasyo.