Read nande Erĩlũayo 27 Bible Online

Erĩlũayo 27 - nande bible

Erĩlũayo 27

¹Wasyakokotya ekiherero omo muti wʼomũshĩta, obuli bwakyo ni metere ĩbĩrĩ na sentĩmetere makũmĩ asatu (2.30 m), nʼobugali bwakyo emetere ĩbĩrĩ na sentĩmetere makũmĩ asatu (2.30 m); ahʼeriherera hasyalingirirana; nʼobuli bwʼendata bwasyabya metere nguma na sentĩmetere makũmĩ asatu na munani (1.38 m).

²Kandi wasyakokotya amahembe ani endata oko syondũlĩ ĩnĩ syaho; amahembe waho asyabya wʼekitswe kiguma-guma haguma nakyo; kandi wasyaswikakyo emiringa.

³Kandi wasyahesa esyonyungu syaho esyʼerĩlũsya hʼerĩbũ lyakyo nʼesyombago syaho, nʼebibindi byaho, nʼesyokanya syʼesĩswĩ, nʼesyongyo syaho; wasyahesa ebindu byosĩ mo mulinga.

⁴Kandi wasyayira busana naho ekyuma ekĩkalabaya erĩbũ ekyʼomulinga; nʼoko kyuma ekyo wasyakokotya esyombũka ĩnĩ syʼomulinga oko syonũnga syakyo ĩnĩ.

⁵Kandi wasyahĩrakyo eyĩkwa oko mũsĩke waho, erĩtĩmba oko kiherero kwʼeyĩkwa, neryo ekyuma ekyo kyʼekitaha-taha ĩkyahĩka omo katĩkatĩ kʼekiherero.

⁶Neryo wasyayira emigamba busana nʼekiherero, emigamba yʼomuti wʼomũshita, nʼeriswikayo nʼomulinga.

⁷Kandi wĩngĩraye emigamba omo syombũka, nʼemigamba eyo yasyabya oko ndambi ĩbĩrĩ syʼekiherero busana nʼerihekakyo.

⁸Ubatseyo omo bisayi mo mwanya muli; ko basyakokotyakyo batya ngoko wakanganĩbawa oko kitwa.

⁹Kandi wasyahala ekibuga kyʼeHema; (Ahʼerĩĩkala); oko luhande lwʼelutambi lwʼeyĩkwa olũlolĩre elutambi lwʼeyĩkwa hasyabya esĩrerembĩre syʼomusohe wʼekĩtanĩ ekĩlũkĩre ndekendeke busana nʼekibuga, obuli bwabyo metere makũmĩ ani nʼendatu (46 m) oko luhande luguma;

¹⁰nʼesyondũyĩ syakyo syasyabya makũmĩ abiri, nʼebitindo byasyo amakũmĩ abiri byʼemiringa; nʼesyombaniko syʼesyondũyĩ nʼebisu byasyo byasyabya byʼekĩtsĩpa.

¹¹Kandi busana nʼoluhande lwʼelutambi lwʼendata oko buli bwʼaho hasyabya esĩrerembĩre, obuli bwasyo emetere makũmĩ ani nʼendatu (46 m), nʼesyondũyĩ syasyo makũmĩ abiri, nʼebitindo byasyo makũmĩ abiri byʼemiringa; nʼesyombaniko syʼesyondũyĩ nʼebisu byasyo, byasyabya byʼekĩtsĩpa.

¹²Kandi busana nʼobugali bwʼekibuga oko luhande lwʼeyĩkwa hasyabya esĩrerembĩre, emetere yasyo yasyabya makũmĩ abiri nʼĩsatu (23 m) nʼesyondũyĩ syasyo ĩkũmĩ, nʼebitindo byasyo ĩkũmĩ.

¹³Nʼobugali bwʼekibuga oko luhande lwʼendata erĩlolya endata hasyabya emetere makũmĩ abiri nʼĩsatu (23 m).

¹⁴Esĩrerembĩre busana nʼoluhande luguma lwʼolũkyo, hasyabya metere ndatu na sentĩmetere makũmĩ mwenda (6.90 m) haguma nʼesyondũyĩ syasyo ĩsatu, nʼebitindo byasyo bisatu.

¹⁵Na busana nʼolundi luhande hasyabya esĩrerembĩre syʼemetere 6.90, haguma nʼesyondũyĩ syasyo ĩsatu, nʼebitindo byasyo bisatu.

¹⁶Neryo busana nʼolũkyo lwʼekibuga hasyabya olukimba olũkasũkũlĩraya olwʼemetere mwenda na sentĩmetere makũmĩ abiri (9.20 m), olwʼerangĩ yʼakanĩkĩ, nʼerangĩ yʼolubono, nʼeyʼengula, nʼolukimba lwʼekĩtanĩ olũlũkĩre ndeke-ndeke, omũbĩrĩ wʼomũlũkĩ; esyondũyĩ syabyo ĩnĩ, ebitindo byasyo bini.

¹⁷Esyondũyĩ syosĩ syʼekibuga esĩtĩmbĩre oko mbande syosĩ syasyabya nʼebisu, byʼekĩtsĩpa; nʼesyombaniko syasyo syʼekĩtsipa nʼebitindo byasyo byʼemiringa.

¹⁸Obuli bwʼekibuga bwasyabya metere makũmĩ ani nʼendatu (46 m), nʼobugali metere makũmĩ abiri nʼĩsatu ehosĩ, nʼobuli bwʼendata emetere ĩbĩrĩ nʼesentĩmetere makũmĩ asatu (2.30 m), bwʼolukimba lwʼekĩtanĩ ekĩlũkĩre ndeke-ndeke, nʼebitindo byakyo byʼomulinga.

¹⁹Ebindu byosĩ byʼeHema busana nʼomũbĩrĩ wayo gosĩ, nʼesyodudu syayo syosĩ, nʼesyodudu syosĩ syʼekibuga syasyabya mulinga.

²⁰Wasyahana abandu ba Ĩsraelĩ, bakuletere amagũta mabuya agʼomũzeĩtũnĩ awengĩre busana nʼetala, awakaleka etala iyaka endambĩ yosĩ.

²¹Omo Hema yʼerĩhĩndanamo eyĩhya wʼolukimba olũkasũkũlĩraya oluli embere wʼerĩtũlago, Harũnĩ nʼabana buwe basyakokotyayo erĩtsũka omwʼĩgolo-golo erĩhĩka omo ngyakyangyakya embere syʼOmwami Mukulu; omwatsi oyũ akandisyabya mugambo erĩhĩka kera na kera omo katĩkatĩ kʼesyondengo syabo syosĩ busana nʼabana ba Ĩsraelĩ.