Read nande Erĩlũayo 28 Bible Online

Erĩlũayo 28 - nande bible

Erĩlũayo 28

¹Ulete mugala wenyũ Harũnĩ ahoguli, nʼabagala buwe, erĩlũa omo katĩkatĩ kʼabana ba Ĩsraelĩ, iniangolera omo mũbĩrĩ wʼobũherĩ, ye Harũnĩ, Nadabũ, na Abĩhũ, Eleazarĩ, na Ĩtamarĩ, abagala ba Harũnĩ.

²Wasyakokoterya Harũnĩ mugala wenyũ, esyongimba sĩbũyĩrĩre, busana nʼolukengerwa na busana nʼerĩyĩsũga.

³Kandi wasyabwira abosĩ abawite omutima wʼamenge, abo nabĩrĩũsũlya nʼekĩrĩmũ kyʼamenge ibatoka erĩkokoterya Harũnĩ esyongimba erimuhigula, iniatoka erinyikolera omo mũbĩrĩ wʼobũhererĩ.

⁴Nʼesyongimba syesĩ esyo basyakokotya: ekyuma kyʼekĩkũba, nʼeefodĩ, nʼekanzu, nʼerĩkotĩ ryʼebitanga-bitanga, nʼakakĩra, nʼomukoba; basyakokotya esyongimba sĩbũyĩrĩre busana na Harũnĩ mugala wenyũ nʼabagala buwe, ibatoka erinyikolera omo mũbĩrĩ wʼobũhererĩ.

⁵Kandi basyĩmya esyamagetsi, nʼakanĩkĩ, nʼerangĩ yʼolubono, nʼerangĩ yʼengula, nʼolukimba lwʼekĩtanĩ kibuya.

⁶Kandi basyakokotya eefodĩ yʼesyamagetsi nʼerangĩ yʼakanĩkĩ, nʼerangĩ yʼamabono, nʼeyʼengula, nʼolukimba lwʼekĩtanĩ ekĩlũkĩre ndeke, omo mũbĩrĩ wʼomũlũkĩ wʼamenge.

⁷Eefodĩ yasyabya nʼebihande bibiri oko bitigo ebĩhĩndene oko syondũlĩ ĩbĩrĩ syabyo, ibyatoka erĩhĩndanĩbwa haguma.

⁸Nʼomulemba owalũkĩre ndeke-ndeke nʼamenge awali endata kugo, busana nʼerĩkũndĩkago, akandisyabya ngʼomũbĩrĩ wayo nʼowʼekitswe kiguma nago; owʼesyamagetsi, erangĩ yʼakanĩki, nʼolubono, nʼengula, nʼekisohe kĩlũkĩre ndeke-ndeke.

⁹Neryo wasyĩmya mabwe abiri wʼeũnĩkĩ, iwagega mugo mwʼamena wʼabana ba Ĩsraelĩ;

¹⁰amena ndatu oko lĩbwe nguma, nʼamena ndatu awasakĩre oko lindi rĩbwe ngoko babũtĩrwe.

¹¹Omo mũbĩrĩ wʼomũgegĩ omwʼĩbwe, ngʼerigega lyʼekiminyikalo, wasyagega mabwe abiri, ngʼamena wʼabana ba Ĩsraelĩ; wasyahĩrago omwisi wʼesyamagetsi.

¹²Wasyahĩra mabwe abiri oko bihande bibiri byʼebitigo byʼoko efodĩ, eribya mabwe wʼekĩbũkyo busana nʼabana ba Ĩsraelĩ, na Harũnĩ asyahekera amena wabo embere syʼOmwami Mukulu endata oko bitigo biwe bibiri busana nʼekĩbũkyo.

¹³Kandi wasyakokotya emitagala yʼesyamagetsi,

¹⁴nʼamahulula abiri wʼesyamagetsi nyibuya; wasyakokotyago ngʼomukoba, wʼomũbĩrĩ wʼeriluka; neryo Wasyahĩra amahulula awalũkĩre oko mitagala eyabirigegwa.

¹⁵Kandi wasyayira ekyuma kyʼekĩkũba kyʼeritswera, omũbĩrĩ wʼomunyimanyima; wasyayirakyo ngʼomũbĩrĩ wʼeefodĩ, owʼesyamagetsi, nʼowʼerangĩ yʼakanĩkĩ, nʼeyʼolubono, nʼeyʼengula, nʼolukimba lwʼekĩtanĩ kibuya ekĩlũkĩre ndeke, wasyakĩkokotya.

¹⁶Kyasyalingirirana oko mbande syosĩ erĩrĩnganĩalo kabiri; obuli bwalo bwasyabya sentĩmetere makũmĩ ani na ndatu nʼobugali bwalo sentĩmetere makũmĩ ani nʼendatu.

¹⁷Kandi wasyasosa mukyo mwʼamakũndo wʼamabwe, emilala ĩnĩ yʼamabwe; omulala owʼerĩtsũka ni mulala wa sardĩa, nʼowa topazĩ, nʼowa baharamĩnĩ.

¹⁸Nʼomulala wʼakabiri, nĩ tsũmarĩdĩ, na yakũtĩ-samawĩ, na alamasĩ;

¹⁹nʼomulala wʼakasatu, nĩ haĩkĩntũ, na sebũ, na amatĩsto;

²⁰nʼomulala wʼakani ni aberũlĩ, na ũnĩkĩ, na yasĩpĩre; asyasoswa omo syamagetsi nʼerilukwa, musyo.

²¹Nʼamabwe ayo asyabya ngʼamena wʼabana ba Ĩsraelĩ, erĩkũmĩ nʼawabiri, ngʼamena wabo; ngʼerigega lyʼekiminyikalo, obuli muguma ngʼerĩna liwe, byasyabya busana nʼebihanda erĩkũmĩ nʼebibiri.

²²Neryo Wasyahĩra oko kyuma kyʼekĩkũba amahulula ngʼemikoba, omũbĩrĩ wʼeriluka wʼesyamagetsi nyibuya.

²³Kandi Wasyahĩra esyombũka ĩbĩrĩ syʼesyamagetsi oko kyuma kyʼekĩkũba, Wasyahĩra esyombũka ĩbĩrĩ esyo oko ndũlĩ ĩbĩrĩ syʼekyuma kyʼekĩkũba.

²⁴Kandi Wasyahĩra amahulula abiri ayo awalũkĩre omo syamagetsi omo syombũka ĩbĩrĩ oko syondũlĩ syʼekyuma kyʼekĩkũba.

²⁵Nʼesindi ndũlĩ ĩbĩrĩ syʼamahulula awalũkĩre wasyahĩrasyo endata wʼemitagala ĩbĩrĩ, nʼerĩhĩrabyo oko bitswe byʼebitigo byʼeefodĩ oko luhande lwayo lwʼembere.

²⁶Kandi wasyayira esyombũka ĩbĩrĩ syʼesyamagetsi wasyahĩrasyo oko syondũlĩ ĩbĩrĩ syʼekyuma kyʼekĩkũba, oko mũsĩke wakyo, owalolĩre oko luhande lwʼeefodĩ kwʼemwisi.

²⁷Kandi wasyayira esyombũka ĩbĩrĩ syʼesyamagetsi, wasyahĩrasyo oko bitswe bibiri byʼebitigo byʼeefodĩ omwisi, omo luhande lwʼembere lwayo, hakũhĩ nʼaho sibohene, endata oko mulemba wʼeefodĩ owalũkĩre nʼamenge.

²⁸Neryo basyaboha ekyuma kyʼekĩkũba, omo syombũka syakyo oko syombũka syʼeefodĩ omo ngohe yʼerangĩ yʼakanĩkĩ, ikyatoka eribya oko mulemba wʼeefodĩ owalũkĩre ndeke-ndeke nʼamenge, neryo ekyuma kyʼekĩkũba ĩkĩtakũndũlwa oko efodĩ.

²⁹Na Harũnĩ asyaheka amena wʼabana ba Ĩsraelĩ omo kyuma kyʼekĩkũba kyʼeritswera oko mutima wuwe, omugulu akingira ahabũyĩrĩre, busana nʼekĩbũkyo embere syʼOmwami Mukulu ebiro byosĩ.

³⁰Kandi Wasyahĩra omo kyuma kyʼekĩkũba kyʼeritswera Ũrĩmũ na Tũmĩmũ; nabyo byasyabya oko mutima wa Harũnĩ, omugulu akingira embere syʼOmwami Mukulu; na Harũnĩ asyaheka eritswera lyʼabana ba Ĩsraelĩ oko mutima wuwe embere syʼOmwami Mukulu ebiro byosĩ.

³¹Kandi wasyayira ekanzu yʼeefodĩ eyʼerangĩ yʼakanĩkĩ nyisa.

³²Yasyabya mwʼekyũna omo katĩkatĩ kayo busana nʼomutwe; omutsotso asyatĩmba oko kyũna kyayo, ngʼekyũna ekikabya omo kanzu yʼekyuma, isiyangatulika.

³³Nʼoko ndĩna yʼekanzu wasyayira omukomamanga wʼerangĩ yʼakanĩkĩ, nʼowʼerangĩ yʼolubono, nʼeyʼengula, erĩtĩmba oko kanzu kwʼendĩna yayo; nʼesyonzoga syʼesyamagetsi omo katĩkatĩ kabyo oko mbande syosĩ;

³⁴enzoga yʼesyamagetsi nʼomukomamanga, nʼenzoga yʼesyamagetsi nʼomukomamanga, oko ndĩna yʼekanzu erĩtĩmba kuyo.

³⁵Neryo ekanzu eyo yasyabya uku Harũnĩ omugulu akakola; nʼerĩbũga lyayo lyasyowĩbwa omugulu akingira ahabũyĩrĩre embere syʼOmwami Mukulu, nʼomugulu akalũamo, akasya hola.

³⁶Kandi wasyayira akatswe kʼesyamagetsi nyibuya, iwagega kuko, kwʼerigega lyʼekiminyikalo kiti, ERĨBŨYĨRĨRE OKO MWAMI MUKULU.

³⁷Neryo wasyahĩrako endata wʼengohe yʼerangĩ yʼakanĩkĩ yasyabya oko kakĩra; kasyabya oko luhande lwʼembere lwʼakakĩra.

³⁸Kakandisyabya oko bũsũ bwa Harũnĩ, na Harũnĩ asyaheka obubi bwʼebindu bĩbũyĩrĩre, ebyo abana ba Ĩsraelĩ basyahigula omo lũsũnzo lwabo losĩ lũbũyĩrĩre; nako kasyabya ebiro byosĩ oko bũsũ buwe, ibatoka erĩrĩgwa embere syʼOmwami Mukulu.

³⁹Kandi wasyaluka erĩkotĩ omo mũbĩrĩ wʼebitanga-bitanga omo lukimba lwʼekĩtanĩ ekyowenenga, kandi wasyayira akakĩra kʼekĩtanĩ kyowenenga, kandi wasyayira omulemba, ngʼomũbĩrĩ wʼomũlũkĩ wʼamenge.

⁴⁰Wasyakokoterya bagala ba Harũnĩ bʼamakotĩ, wasyakokoteryabo emiremba, kandi wasyakokoteryabo ehĩkĩra, busana nʼolukengerwa nʼerĩyĩsũga.

⁴¹Wasyambalyabyo Harũnĩ mugala wenyũ, nʼabagala buwe, kandi wasyahakabyabo amagũta, nʼerihigulabo, ibatoka erinyikolera omo mũbĩrĩ wʼobũhererĩ.

⁴²Kandi wasyakokoteryabo ehipitula hyʼolukimba lwʼekĩtanĩ eriswika omubiri busana nʼendũ mbũ yabo; erĩtsũka omo mbindi erĩhĩka oko marwĩ;

⁴³nahyo hyasyabya uku Harũnĩ, nʼoko bagala buwe, omugulu bakingira omo Hema yʼerĩhĩndanamo, kutse omugulu bakasegera hakũhĩ nʼekiherero erikolera ahabũyĩrĩre; ibatasyaheka ebibi, bakasyahola. Ekĩ kyasyabya mugambo kera na kera busana naye nʼoko bana buwe enyũma wuwe.