Read nande Erĩlũayo 30 Bible Online

Erĩlũayo 30 - nande bible

Erĩlũayo 30

¹Wasyakokotya ekiherero ahʼerĩhĩsĩrya obukwa; wasyakokotyakyo omo muti wʼomũshĩta.

²Obuli bwakyo bwasyabya sentĩmetere makũmĩ ani nʼendatu, nʼobugali bwakyo sentĩmetere makũmĩ ani nʼendatu; hasyalingirirana; obuli bwakyo bwʼendata bwasyabya sentĩmetere makũmĩ mwenda nʼĩbĩrĩ; amahembe wakyo asyabya kiguma-guma naho.

³Kandi wasyabambĩrya kukyo kwʼesyamagetsi esyowenenga, endata wakyo, nʼesyondambi esĩtĩmbĩre kukyo, nʼamahembe wakyo; kandi wasyakokoteryakyo akakĩra kʼesyamagetsi ĩkatĩmbaho.

⁴Kandi wasyakokoteryakyo oko syombũka ĩbĩrĩ syʼesyamagetsi eyĩkwa oko kakĩra kakyo; wasyakokotyasyo oko nganga syakyo ĩbĩrĩ, nʼoko syondambi syaho ĩbĩrĩ; nasyo syasyabya emyanya yʼerĩhĩra mwʼemigamba busana nʼerihekakyo.

⁵Kandi wasyakokotya emigamba omo muti wʼomũshĩta, nʼerĩbambĩryayo omo syamagetsi.

⁶Kandi Wasyahĩra ekiherero ekĩ embere syʼolukimba olũkasũkũlĩraya hakũhĩ nʼerĩsandũko lyʼerĩtũlago, embere wʼekĩtũmbĩ kyʼeriganyira ekiri endata wʼerĩtũlago, aho nasyahĩndana nawe.

⁷Na Harũnĩ asyahĩsĩrya kukyo kwʼobukwa bwʼamanũkato awakakumba ndeke; obuli ngyakya-ngyakya, omugulu akakokotaya etala, asyahĩsyabo.

⁸Omugulu Harũnĩ akakaya esyotala omwʼĩgolo-golo asyahĩsyabo, bubye bukwa bwa kera na kera embere syʼOmwami Mukulu omo katĩkatĩ kʼesyondengo syenyũ.

⁹Simusyeherera obundi bukwa, oko kiherero ekĩ kutse obuhere bwʼerĩokya, kutse obuhere bwʼeyĩsyano; kandi sĩmwendĩsyũtaho obuhere bwʼerĩpũlya nʼahake.

¹⁰Na Harũnĩ asyayira omusangano oko mahembe engendo nguma oko buli mwaka; omo musasi wʼobuhere bwʼerĩlũsya amalolo bwʼeririha engendo nguma oko mwaka, engendo nguma asyayira omusangano busana nabo omo katĩkatĩ kʼesyondengo syenyũ syosĩ. Kĩbũyĩrĩre kutsibu busana nʼOmwami Mukulu.

¹¹Neryo Omwami Mukulu mwabwira Musa ati.

¹²Omugulu ukaganza abandu ba Ĩsraelĩ, abakaganzawa omo katĩkatĩ kabo, neryo obuli mundu asyaha Omwami Mukulu endongolya busana nʼomutima wuwe, omugulu ukaganzabo; sihabye bũkonĩ bwʼakasũsũ omo katĩkatĩ kabo omugulu ukaganzabo.

¹³Ekĩ kyo basyaha, obuli mundu oyukalaba oko bakaganzawa asyaha ekihande kyʼesekelĩ omo lulengo lwʼesekelĩ[1] yʼahabũyĩrĩre, oluhande lwʼesekelĩ busana nʼerĩhĩtya oko Mwami Mukulu.

¹⁴Obuli mundu oyukalaba ahali abakaganzawa erĩtsũka oko myaka makũmĩ abiri na kwilaba aho, basyaha erĩhĩtya lyʼOmwami Mukulu.

¹⁵Abʼebindu sibendisyaha kwilaba aho, nʼabera ibataha ebike kwilaba oluhande lwʼesekelĩ, omugulu bakaha erĩhĩtya lyʼOmwami Mukulu eririha busana nʼemitima yabo.

¹⁶Kandi wasyĩmya esyofranka oko bandu ba Ĩsraelĩ, wasyahĩrasyo busana nʼomũbĩrĩ wʼeHema yʼerĩhĩndanamo; iryabya erĩbũkya busana nʼabandu ba Ĩsraelĩ embere syʼOmwami Mukulu, eriyira omusangano busana nʼemitima yenyũ.

¹⁷Neryo Omwami Mukulu mwabũga na Musa ati,

¹⁸Wasyayira ekinabiro kyʼomulinga, nʼendĩna yakyo yʼomulinga, busana nʼerinabiramo. Kandi wasyahĩrakyo omo katĩkatĩ kʼeHema yʼerĩhĩndanamo nʼekiherero, kandi Wasyahĩra amagetsi go mukyo.

¹⁹Na Harũnĩ nʼabagala buwe basyanabiramo oko byala nʼebisando.

²⁰Omugulu bakingira omo Hema yʼerĩhĩndanamo, ibanaba magetsi, sibahole; kutse omugulu bakasa hakũhĩ nʼekiherero erikola, erĩlũsya obuhere obukayirawa omo muliro busana nʼOmwami Mukulu.

²¹Litya basyanabĩryaho ebyala byabo nʼebisando byabo, bakasyahola; kandi asyabya mugambo kubo kera na kera, busana na Harũnĩ nʼoko bana buwe omo syondengo syabo syosĩ.

²²Kandi Omwami Mukulu mwabwira Musa ati,

²³Ũyĩmĩraye amanũkato awalabĩre awandi; oko mane-mane mabisi wʼesekelĩ amagana atanu, nʼoko balasĩnĩ eyikakumba ndeke oluhande lwʼolulengo olo, wa nʼamagana abiri nʼamakũmĩ atanu (250), nʼoko kane awakakumba ndeke amagana abiri nʼamakũmĩ atanu (250),

²⁴nʼoko kĩda amagana atanu (500), oko lulengero lwʼesekelĩ yʼahabũyĩrĩre, nʼoko magũta wʼezeĩtũnĩ tsũpa nguma;

²⁵wasyayirago mo magũta abũyĩrĩre wʼerĩhakabya, awakakumba ndeke awabĩrĩkokotĩbwa ngʼobunyima-nyima bwʼomundu wʼerĩkokotya amarasi; asyabya magũta abũyĩrĩre wʼerĩhakabya.

²⁶Kandi wasyahakabyago eHema yʼerĩhĩndanamo, nʼerĩsandũko lyʼerĩtũlago,

²⁷nʼemesa nʼebindu byayo, nʼomutagala owakahamba etala nʼebindu byago, nʼekiherero kyʼobukwa,

²⁸nʼekiherero kyʼobuhere bwʼerĩokererya haguma nʼebindu byaho byosĩ, nʼekinabiro nʼendĩna yakyo.

²⁹Kandi wasyahigulabyo, ibyabya bĩbũyĩrĩre kwilaba; obuli kindu kĩkatũla kubyo kyasyabya kĩbũyĩrĩre.

³⁰Kandi wasyahakabya. Harũnĩ nʼabagala buwe, nʼerihigulabo, ibanyikolera omo mũbĩrĩ wʼobũhererĩ.

³¹Wasyabwira abandu ba Ĩsraelĩ uti, aya asyabya magũta abũyĩrĩre wʼerĩhakabya busana nage omo syondengo syenyũ syosĩ.

³²Sĩendĩsyũtwa oko mubiri wʼomundu, kutse simwendisyayira awandi awasosene nago, omwʼengwa lyago; abũyĩrĩre, asyabya ũkwʼĩnywe.

³³Oyukasyenga awasosene nago, kutse oyũkahĩra nʼakake oko wʼehandi, asyahigwa oko bandu buwe.

³⁴Neryo Omwami Mukulu mwabũga na Musa ati, Wĩmaye amanũkato agowene, yaanĩ, na tafi, na kalebena; amanũkato agowene haguma na ũbanĩ eyerĩre; obuli kindu kyasyabya omo kalengĩ kalingirirene;

³⁵wasyayirabyo mo bukwa, obukakumba ndeke ngʼamenge wʼomwengĩ, obukasusawa mo mũnyũ, obwerĩre nʼobũbũyĩrĩre;

³⁶wasyatũndũla ekitswe kyabo mo kike-kike, nʼerĩhĩrabo erĩgabo liguma embere syʼerĩtũlago omo Hema yʼerĩhĩndanamo, aho nasyahĩndana nawe; bwasyabya bũbũyĩrĩre kwilaba busana nawe.

³⁷Nʼobukwa obo wasyakokotya omwʼĩtũlũngana lyabo sĩmũsyekokotayabo busana nenyũ; ukʼuwe bwasyabya bũbũyĩrĩre busana nʼOmwami Mukulu.

³⁸Nʼomundu oyo wasyakokotya obusosene nʼobo ati, akakumba kubo, asyahigwa erĩlũa oko bandu buwe.