Read nande Erĩlũayo 33 Bible Online

Erĩlũayo 33 - nande bible

Erĩlũayo 33

¹Neryo Omwami Mukulu mwabũga na Musa, ati, Hongoka, Ũlũe hano, uwe nʼabandu abo walũsaya omo kihugo kyʼeMĩsĩrĩ, eriya oko kihugo ekyo nalahĩraya Abrahamũ, na Ĩsaka, na Yakobo, nyiti, Nasyahakyo oko bana benyũ.

²Nage nasyatuma omũlaĩka embere syawe; kandi nasyahiga Omukanana, nʼOmũamorĩ, nʼOmũhĩtĩ, nʼOmũperĩzĩ, nʼOmũhĩvĩ, nʼOmũyebũsi eyĩhya;

³eriya omo kihugo ekyoswĩre mwʼamasabũ nʼobuki; sindiendisyahetuka omo katĩkatĩ kenyũ; kusangwa muli bandu bʼebĩkya bĩkalĩre ngasyabĩtĩra omo nzira.

⁴Neryo omugulu abandu bowa esyongulu nyibi esĩ, mobasũsũmana; mohatabya omundu oyo wayambalaya ebyʼerĩyĩsũga.

⁵Kusangwa Omwami Mukulu mwabũga na Musa ati, Ũbũge nʼabana ba Ĩsraelĩ uti, Muli bandu bʼebĩkya bĩkalĩre, namahetuka omo katĩkatĩ kenyũ oko katambĩ kake, iningandĩbatogotya; neryo lino muyambule kwʼebyʼerĩyĩsũga byenyũ; inaminya ekyo ngandibakolera.

⁶Neryo abana ba Ĩsraelĩ mobayambula ebyʼerĩyĩsũga byabo erĩtsũka oko kitwa kyʼeHorebũ nʼenyũma wʼaho nibya.

⁷Nĩkwa Musa atula akatwala eHema nʼerihandayo ekyaswa kyʼekilaliriro, ehali hake kwʼekilaliriro; neryo mwahulayo mo Hema yʼerĩhĩndanamo. Neryo obuli mundu oyo wasonda-sonda Omwami Mukulu mwaya omo Hema yʼerĩhĩndanamo eyabya omo kyaswa kyʼekilaliriro.

⁸Neryo omugulu Musa aya omo Hema, abandu bosĩ mobahangana obuli mundu oko lũkyo lwʼehema yiwe, mobasamalira Musa, erĩhĩka aho ingirira omo Hema.

⁹Neryo, omugulu Musa ingira omo Hema, endũyĩ yʼekĩtũ moyandagala, moyimana oko lũkyo lwʼeHema; neryo Omwami Mukulu mwakanĩa na Musa.

¹⁰Neryo omugulu abandu bosĩ balangira endũyĩ yʼekitũ, eyimene oko lũkyo lwʼeHema abandu bosĩ mobahangana mobaramya, obuli mundu oko lũkyo lwʼeHema yiwe.

¹¹Neryo Omwami Mukulu mwakanĩa na Musa meso na meso, ngoko mundu akakanaya nʼomwĩra wuwe. Neryo Musa mwasuba kandi oko kilaliriro, omugombe wuwe Yosũa, mugala wa Nũnĩ, omũlwana, oyo ĩsĩalĩlũa omo Hema.

¹²Kandi Musa mwabũga nʼOmwami Mukulu ati, Langira, ũkabũga nage uti, Twala bandu aba! Nĩkwa sũlĩtanyĩmĩnyĩsya oyukandituma haguma nage. Kandi wabĩrĩbũga uti, Nyĩnakwasĩ oko lĩna lyawe, kandi uti wabiribana erĩsĩmwa omo meso wage.

¹³Neryo lino ngakusaba nyiti, namabya nabiribana erĩsĩmwa omo meso wawe, ũnyĩkangaye esyonzira syawe, inatoka erikuminya, inatoka eribana olukogo omo meso wawe. Kandi Uminye ngoko ekihanda eki ni bandu bawe.

¹⁴Neryo Omwami Mukulu mwabũga ati, Ĩngyowene-wene nasyagenda haguma nawe, nage nasyakuha eriluhuka.

¹⁵Neryo Musa mwabũga naye ati, Wamatindagenda haguma nage, isiwatutwala erĩtũlũsya hano.

¹⁶Kusangwa kyasyaminyikala kiti ko nabiribana olukogo omo meso wawe, ĩngye nʼabandu bawe kwehĩ? lye nʼerigenda lyawe haguma netu, kikatuma ĩngye nʼabandu bawe, itwabya bʼogundi mũsĩndo oko bandu bosĩ abali omo kihugo.

¹⁷Neryo Omwami Mukulu mwabũga na Musa ati, Ngandikola omwatsi ogo wabiriahula; kusangwa wabiribana olukogo embere syage, kandi nyĩnakwasĩ oko lĩna.

¹⁸Neryo Musa mwabũga ati, Ngakusaba, ũnyĩkangaye olukengerwa lwawe!

¹⁹Neryo Omwami Mukulu mwabũga ati, Ngandĩlabya obubuya bwage bosĩ embere syawe, kandi ngandĩkanganĩa erĩna lyʼOmwami Mukulu embere syawe; kandi ngandĩkangya olukogo ũkwʼoyũ ngandĩsyakangya olukogo, kandi ngandisyaganyira oyo ngandisyaganyira.

²⁰Nĩkwa siwangatoka erilangira obũsũ bwage; kusangwa sihali omundu oyo wasyabyaho amanyilolako.

²¹Neryo Omwami Mukulu mwabũga ati, Lebaya, hali omwanya hakũhĩ nage, kandi wasyimana okwʼĩbwe;

²²neryo, omugulu olukengerwa lwage lwasyalaba, nasyakũhĩra omo mugenyo wʼerĩbwe, nage nasyakuswika omo byala byage, erĩhĩka aho nasyalabira.

²³Neryo nasyalũsyaho ebyala byage, nawe wasyalangira omugongo; nĩkwa obũsũ bwage sibwendisyalolwako.