Read nande Erĩlũayo 35 Bible Online

Erĩlũayo 35 - nande bible

Erĩlũayo 35

¹Neryo Musa mwahĩndanĩa endeko yosĩ yʼabandu ba Ĩsraelĩ, mwabwirabo ati, Ebĩ bye bĩnywa ebyo Mwami Mukulu ahana, ati, Mukolebyo.

²Ebiro ndatu omũbĩrĩ iniakolwa; nĩkwa oko kiro kyʼebirinda kyasyabya kiro kĩbũyĩrĩre busana nenyũ, eSabato yʼerihumula lĩbũyĩrĩre oko Mwami Mukulu; Omundundi oyo wasyakola omũbĩrĩ muyo nʼomuke asyĩtwa.

³Sĩmwendĩsyakya omuliro wʼaho mwĩkere oko kiro kyʼeSabato.

⁴Neryo Musa mwabũga nʼendeko yosĩ yʼabandu ba Ĩsraelĩ, ati, Omwatsi goyũ ogo Mwami Mukulu ahana ati,

⁵Mwĩmaye omo katĩkatĩ kenyũ olũsũnzo busana nʼOmwami Mukulu; oyuwite omutima wʼerianza, aletelo, olũsũnzo lʼOmwami Mukulu: esyamagetsi nʼekĩtsĩpa, nʼomulinga,

⁶nʼerangĩ yʼakanĩkĩ, nʼerangĩ yʼolubono, nʼerangĩ yʼengula, nʼekĩtanĩ kyowene, nʼobweya bwʼembene,

⁷nʼesyongobĩ syʼesyombangale esĩnĩre omo rangĩ yʼengula, nʼesyongobĩ syʼesyopombolo, nʼekisayi kyʼomũshĩta,

⁸nʼamagũta wʼetala, naʼamanũkato busana nʼamagũta wʼerĩhakabya, na busana nʼobukwa obukakumba ndeke,

⁹nʼamabwe wʼeshohamũ, nʼamabwe wʼerisingika, busana nʼeefodĩ, na busana nʼekyuma kyʼekĩkũba.

¹⁰Nʼobuli mundu wʼamenge omo katĩkatĩ kenyũ ase, akole ebyosĩ ebyo Mwami Mukulu abirihana;

¹¹ahʼerĩĩkala, nʼehema yaho, nʼekiswiko kyaho, ebĩbohĩ byayo nʼebisayi byayo, emigamba yayo, nʼesyondũyĩ syayo, nʼebitindo byayo;

¹²nʼerĩsandũkũ, nʼemigamba yalyo, nʼekĩtũmbĩ kyʼeriganyira, nʼolukimba olũkasũkũlĩraya;

¹³emesa, nʼemigamba yayo, nʼesyonyungu syosĩ syayo, nʼamandu wʼerĩkangya;

¹⁴omutagala wʼetala nibya busana nʼekyakakala, nʼesyonyungu syago, nʼesyotala syago, nʼamagũta busana nʼekyakakala;

¹⁵nʼekiherero kyʼobukwa nʼemigamba yakyo, nʼamagũta wʼerĩhakabya, nʼobukwa obukakumba ndeke, nʼekĩsũkũlĩryo kyʼolũyĩ oko lũkyo lwʼeHema;

¹⁶ekiherero kyʼobuhere bwʼerĩokererya, haguma nʼakayungiro kʼerĩbũ kʼomulinga, nʼemigamba yaho, nʼesyonyungu syaho syosĩ, nʼekinabiro, nʼendĩna, yakyo;

¹⁷olukaleremba lwʼekibuga, nʼesyondũyĩ syalo, nʼebitindo byasyo, nʼolukimba olũkasũkũlĩraya busana nʼolũkyo lwʼekibuga;

¹⁸nʼesyongondo syʼeHema, nʼesyongondo syʼekibuga, nʼemiguha yasyo;

¹⁹nʼesyongimba esĩlũkĩre ndeke, busana nʼerikolera ahabũyĩrĩre, nʼesyongimba sĩbũyĩrĩre busana na Harũnĩ omũhererĩ nʼesyongimba syʼabagala buwe, erikola omũbĩrĩ wʼobũhererĩ.

²⁰Neryo endeko yosĩ yʼabandu ba Ĩsraelĩ moyahongoka erĩlũa embere sya Musa.

²¹Neryo mobasa obuli mundu oyo wakwa omũhwa omo mutima wuwe, nʼobuli mundu oyo wanza, erireta olũsũnzo lwʼOmwami Mukulu, busana nʼomũbĩrĩ wʼeHema yʼerĩhĩndanamo, na busana nʼomũbĩrĩ gosĩ wayo, na busana nʼesyongimba sĩbũyĩrĩre.

²²Kandi mobasa, abalume nʼabakalĩ, abosĩ abanza, mobaleta ebĩkakũndĩkawamo esyombũka, nʼesyombũka syʼamatwĩ, nʼemisege yʼomo bĩkya, nʼemĩsĩndo yosĩ yʼebĩkakangabasanaya byʼesyamagetsi; obuli mundu oyo wahĩtaya olũsũnzo lwʼesyamagetsi oko Mwami Mukulu.

²³Nʼobuli mundu oyo wabanika kwʼerangĩ yʼakanĩkĩ, nʼerangĩ yʼolubono, nʼerangĩ yʼengula, nʼekisohe ekyowene, nʼobweya bwʼembene, nʼesyongobĩ syʼesyombangale esĩnĩrwe omo rangĩ yʼengula, nʼesyongobĩ syʼepombolo, mobaletabyo.

²⁴Obuli mundu oyo waleta olũsũnzo lwʼekĩtsĩpa nʼolʼomulinga mwaleta olũsũnzo lwʼOmwami Mukulu; nʼobuli mundu oyo wabanika kwʼekisayi kyʼomũshĩta busana nʼomũbĩrĩ wahi wʼerikola, mwaletakyo.

²⁵Neryo abakalĩ bosĩ bʼamenge mobaluka omo byala byabo, neryo mobaleta ebyo baluka, ebyʼerangĩ yʼakanĩkĩ, nʼebyʼerangĩ yʼolubono, nʼebyʼerangĩ yʼengula, nʼekisohe ekyowenenga.

²⁶Nʼabakalĩ bosĩ ababya nʼomũhwa omo mitima yabo nʼamenge mobahĩka obweya bwʼembene.

²⁷Nʼabatabalĩ mobaleta mabwe wʼeshohamũ, nʼamabwe wʼerisingika, busana nʼeefodĩ, na busana nʼekyuma kyʼekĩkũba;

²⁸nʼamanũkato, nʼamagũta busana nʼetala, na busana nʼamagũta wʼerĩhakabya, na busana nʼobukwa obukakumba ndeke.

²⁹Nʼabandu ba Ĩsraelĩ mobaleta olũsũnzo lwʼerianza oko Mwami Mukulu; obuli mulume nʼomũkalĩ, oyo wanza eriretakĩ, busana nʼomũbĩrĩ gosĩ, ogo Mwami Mukulu ahana Musa erikolwa.

³⁰Neryo Musa mwabũga nʼabandu ba Ĩsraelĩ ati, Langira, Omwami Mukulu abiribirikira Besalelĩ mugala wa Ũrĩ, omugala wa Hũrĩ, owʼekihanda kya Yũda;

³¹kandi abĩrĩmũsũlya nʼOmũlĩmũ wuwe, omo menge, nʼomwʼiminya, omo bunyima, nʼomo mĩsĩndo yosĩ yʼerikola;

³²nʼerikola emĩbĩrĩ yʼobunyima-nyima, erikola omo syamagetsi, nʼekĩtsĩpa, nʼomo mulinga,

³³nʼeribatsa mabwe busana nʼerisingika, nʼerihala emiti, erikola omo mĩsĩndo yosĩ yʼomũbĩrĩ ogʼobunyima-nyima.

³⁴Neryo abĩrĩhĩra omutima wuwe atoke erĩkangĩrĩrya, iye na Aholĩabũ, mugala wa Ahĩsamakĩ, owʼekihanda kya Danĩ.

³⁵Abĩrĩũsũlyabo nʼamenge wʼomutima, erikola omo mĩsĩndo yosĩ yʼemĩbĩrĩ yʼamenge wʼomũbĩrĩ wʼerisega, nʼamenge wʼomundu munyima-nyima, nʼeriluka omo rangĩ yʼakanĩkĩ, nʼomo rangĩ yʼolubono, nʼeyʼengula, nʼekisohe ekyowene, nʼowʼomũlũkĩ, ngʼabakakola emĩsĩndo yosĩ, yʼemĩbĩrĩ, nʼabakakola emĩbĩrĩ yʼobunyima-nyima.