Read nande Erĩlũayo 38 Bible Online

Erĩlũayo 38 - nande bible

Erĩlũayo 38

¹Kandi mwakokotya ekiherero kyʼobuhere bwʼerĩokererya omo muti wʼomũshĩta; obuli bwakyo bwabya metere ĩbĩrĩ na sentĩmetere makũmĩ asatu (2.30 m), nʼobugali bwakyo bwabya metere ĩbĩrĩ na sentĩmetere makũmĩ asatu (2.30 cm) ihalingirirene; nʼobuli bwakyo bwʼendata metere nguma na sentĩmetere makũmĩ asatu nʼomunani (1.38 m).

²Neryo mwakokotya amahembe wakyo oko nũnga syakyo ĩnĩ, amahembe ayo abya wʼekyuma kiguma haguma nakyo, neryo mwasanza kukyo omulinga.

³Neryo mwakokotya ebindu byosĩ byʼekiherero, esyonyungu, nʼemyũko, nʼebibindi, nʼesyokanya syʼesĩswĩ, nʼesyongyo syʼomuliro; mwakokotya ebindu byosĩ byakyo omo mulinga.

⁴Kandi mwakokotya busana nʼekiherero akayungiro akalũkĩre omo mulinga eyĩkwa oko mũsĩke erĩtĩmbaho eyĩkwa, nʼerĩhĩka endata omo katĩkatĩ.

⁵Kandi mwahesa esyombũka ĩnĩ busana nʼesyondũlĩ ĩnĩ syʼakayungiro kʼomulinga, eribya myanya yʼemigamba.

⁶Neryo mwakokotya emigamba yʼomuti wʼomũshĩta, kandi mwabambĩryayo omo mulinga.

⁷Neryo mwahĩra emigamba yʼomo syombũka oko syondũlĩ syʼekiherero, busana nʼerihekakyo; mwakokotyaho omo bisayi ebiwite omwanya.

⁸Kandi mwakokotya ekinabiro kyʼomulinga, nʼendĩna yakyo yʼomulinga, omo bisasamiro byʼabakalĩ abakakola oko lũkyo lwʼeHema yʼerĩhĩndanamo.

⁹Neryo mwahala ekibuga; busana nʼoluhande lwʼelutambi lwʼeyĩkwa erĩlolya elutambi lwʼeyĩkwa, olũlerembĩre lwʼekibuga lwabya metere makũmĩ ani m ndatu (46 m) lwʼekisohe ekĩlũkĩre ndekendeke.

¹⁰Esyondũyĩ syabyo syabya makũmĩ abiri (20), nʼebitindo byasyo makũmĩ abiri byʼomulinga; nʼesyombaniko syʼesyondũyĩ nʼebisu byasyo, byabya byʼekĩtsĩpa.

¹¹Na busana nʼoluhande lwʼelutambi lwʼendata, metere makũmĩ ani na ndatu (46), nʼesyondũyĩ syalo makũmĩ abiri (20), ebitindo byasyo makũmĩ abiri (20), byʼomulinga; nʼesyombaniko syʼesyondũyĩ, nʼebisu byasyo byʼekĩtsĩpa.

¹²Nʼoko luhande lwʼeyĩkwa kwabya esĩlerembĩre syʼemetere makũmĩ abiri nʼĩsatu (23 m), esyondũyĩ syabyo ĩkũmĩ, nʼebitindo byasyo ĩkũmĩ; nʼesyombaniko syʼesyondũyĩ, nʼebisu byasyo byʼekĩtsĩpa.

¹³Nʼoko luhande lwʼendata erĩlolya endata metere makũmĩ abiri nʼĩsatu (23).

¹⁴Esĩlerembĩre busana nʼoluhande luguma lwʼolũkyo syabya metere ndatu na sentĩmetere makũmĩ mwenda (6.90 m); esyondũyĩ syasyo ĩsatu, nʼebitindo byasyo bisatu;

¹⁵kandi litya busana nʼolundi luhande; oko byala ebĩ nʼoko byala birya hakũhĩ nʼolũkyo lwʼekibuga habya esĩlerembĩre metere ndatu na sentĩmetere makũmĩ mwenda (6.90 m); nʼesyondũyĩ syabyo ĩsatu, nʼebitindo byasyo bisatu.

¹⁶Esĩlerembĩre syosĩ syʼekibuga oko mbande syosĩ syabya syʼekisohe ekĩlũkĩre ndeke-ndeke.

¹⁷Nʼebitindo busana nʼesyondũyĩ bya-bya byʼomulinga; nʼesyombaniko syʼesyondũyĩ, nʼesyombũka syasyo, syʼekĩtsĩpa; nʼeriswika lyʼemitwe yasyo lyʼekĩtsĩpa, nʼesyondũyĩ syosĩ syʼekibuga syabya sĩkũndĩkenĩe omo syombũka syʼekĩtsĩpa.

¹⁸Nʼolukimba olũkasũkũlĩraya busana nʼolũkyo lwʼekibuga molwabya ngʼomũbĩrĩ wʼomũlũkĩ, lwabya lwʼengohe yʼerangĩ yʼakanĩkĩ, nʼerangĩ yʼolubono, nʼeyʼengula, nʼekisohe ekĩlũkĩre ndeke-ndeke; obuli bwakyo bwabya metere mwenda na sentĩmetere makũmĩ abiri (9.20), nʼobuli bwakyo bwʼendata omo bugali bwabya metere ĩbĩrĩ na sentĩmetere makũmĩ asatu (2.30), ngʼesĩlerembĩre syʼekibuga.

¹⁹Nʼesyondũyĩ syakyo syabya ĩnĩ, nʼebitindo byasyo bini, byʼomulinga; nʼesyombaniko syabyo syʼekĩtsĩpa, nʼeriswika lyʼemitwe yasyo, nʼebisu byasyo byʼekĩtsĩpa.

²⁰Nʼesyongondo syosĩ syʼahʼerĩĩkala, nʼesyʼekibuga esĩtĩmbĩreho, syabya syʼomulinga.

²¹Erĩ ni ʼganza lyʼebindu busana nʼeHema yʼerĩtũlago, ngoko byaganzawa, ngʼerihana lya Musa, busana nʼomũbĩrĩ wʼAbalawĩ, omo byala bya Ĩtamarĩ, mugala wa Harũnĩ, omũhererĩ.

²²Neryo Besalelĩ mugala wa Ũrĩ, mugala wa Hũrĩ, owʼekihanda kya Yũda, mwakola ebyosĩ ebyo Mwami Mukulu ahana Musa.

²³Haguma naye habya Aholĩabũ, mugala wa Ahĩsamakĩ, owʼekihanda kya Dani, omũbatsĩ, omunyima-nyima, nʼomũlũkĩ wʼengohe yʼerangĩ yʼakanĩkĩ, nʼerangĩ yʼolubono, nʼeyʼengula, nʼeyʼekisohe ekyowene ndeke.

²⁴Neryo esyamagetsi syosĩ bakolamo busana nʼerikola omũbĩrĩ gosĩ wʼeHema, nʼesyamagetsi syʼolũsũnzo syabya talanta makũmĩ abiri nʼomwenda (29), na sekelĩ magana alinda nʼamakũmĩ asatu (730), omo lulengero lwʼesekelĩ yʼahabũyĩrĩre.

²⁵Nʼebĩtsĩpa byʼabandu ebyaganzawa omo ndeko yʼerĩhĩndana byabya talanta erĩgana (100), nʼesyosekelĩ elfu nguma nʼamagana alinda nʼamakũmĩ alinda nʼĩtanu (1,775), ngʼolulengo lwʼesekelĩ yʼahabũyĩrĩre;

²⁶obuli mundu Beka nguma, (erĩbũga ambu) ekitswe kyʼesekelĩ, omo lulengo lwʼesekelĩ yʼahabũyĩrĩre, busana nʼobuli mundu oyo walaba oko luhande lwʼabandu abaliaganzawa, erĩtsũka oko myaka makũmĩ abiri na kwilaba aho, busana nʼabalume elfu magana ndatu nʼĩsatu nʼamagana atanu nʼamakũmĩ atanu (603,550).

²⁷Nʼesyotalanta erĩgana syʼekĩtsĩpa syabya busana nʼerihesa ebitindo byʼahabũyĩrĩre nʼebitindo byʼesyongimba esĩkasũkũlĩraya; nʼebitindo ĩgana busana nʼesyotalanta ĩgana, etalanta busana nʼekitindo.

²⁸Nʼomo sekelĩ elfu nguma nʼamagana alinda nʼamakũmĩ alinda nʼĩtanu (1,775), mwakokotya esyombaniko busana nʼesyondũyĩ, neryo mwabambĩrya emitwe yasyo mwakokotya ebisu byasyo.

²⁹Nʼomulinga wʼolũsũnzo abya talanta makũmĩ alinda (70), nʼesyosekelĩ elfu ĩbĩrĩ nʼamagana ani (2,400).

³⁰Kandi mwakokotya mugo mwʼebitindo byʼolũyĩ lwʼeHema yʼerĩhĩndanamo, nʼekiherero kyʼomulinga, nʼakayungiro kʼomulinga busana nakyo, nʼebindu byosĩ byʼekiherero,

³¹nʼebitindo byʼekibuga ekĩtĩmbĩreho, nʼebitindo byʼolũkyo lwʼekibuga nʼesyongondo syosĩ syʼahʼerĩĩkala, nʼesyongondo syosĩ syʼekibuga ekĩtĩmbĩreho.