Read nande Erĩlũayo 4 Bible Online

Erĩlũayo 4 - nande bible

Erĩlũayo 4

¹Neryo Musa mwamũsũbĩrya mwabũga ati, Nĩkwa sĩbendĩsyanyĩkĩrĩrya, kutse erĩowa omulenge wage. Kusangwa basyabũga bati, Omwami Mukulu mwatakuhulukira.

²Neryo Omwami Mukulu mwabũga naye ati, Omo byala byawe mũlĩkĩ kwehĩ? Naye mwabũga ati, Nĩ mũtso.

³Neryo Nyamuhanga mwabũga ati, Ugusego ahisi. Naye mwagusago oko kitaka, nago mwahinduka nzoka; na Musa mwasagayo.

⁴Neryo Omwami Mukulu mwabũga na Musa ati, Sumba okuboko kwawe uhambeyo oko busolo bwayo. Neryo Musa mwasumba okuboko kuwe, mwahambayo, nayo moyahinduka mũtso omo byala biwe.

⁵Ibatoka erĩkĩrĩrya Omwami Mukulu. Nyamuhanga wʼabotata wabo, Nyamuhanga wa Abrahamũ, Nyamuhanga wa Ĩsaka, na Nyamuhanga wa Yakobo, kwʼabirikuhulukira.

⁶Kandi Omwami Mukulu mwamubwira ati, Hĩra lino ebyala byawe byʼoko kĩkũba kyawe; neryo mwahĩra ebyala biwe byʼoko kĩkũba kiwe; nʼomugulu alũsaya byoko, ebyala biwe ibyamabibya kwʼebihaga, ebĩhenĩrye ngʼenzururu.

⁷Neryo mwabũga naye ati, Hĩra ebyala byawe byʼoko kĩkũba kyawe kandi. Naye mwahĩra ebyala biwe byʼoko kĩkũba kiwe kandi; Neryo abere abĩlũsyabyo oko kĩkũba kiwe, talebaya, ibyamabihinduka kandi ngʼomubiri wuwe.

⁸Neryo bamatindakwĩkĩrĩrya, kutse erĩowa erĩtũlago lyʼekiminyikalo kyʼerĩmbere, basyĩkĩrĩrya erĩtũlago lyʼekiminyikalo kyʼenyũma.

⁹Neryo basyabya bamatendĩkĩrĩrya ebiminyikalo bibiri ebĩ, kutse erĩowa ebyo ũkabũga, wasyĩmya amagetsi wʼomo lũsĩ lwʼeNĩlĩ, nʼerĩũtago oko kitaka kyũmĩre; nʼamagetsi ago gulyateha omo lũsĩ lwʼeNĩlĩ asyahinduka musasi oko kitaka kyũmĩre.

¹⁰Na Musa mwabwira Omwami Mukulu ati, Uwe Mukama, erĩtsũka na kera Sĩnyasĩ erĩbũga, kutse na lino omugulu wamabĩbũga nʼomukobe wawe; Ĩsĩnyasĩ erĩbũga kusangwa sĩnyangũhĩre erĩbũga, kandi indi wʼomũtetũ.

¹¹Neryo Omwami Mukulu mwamũsũbĩrya ati, Nindi yo wahangika obuno bwʼomundu kwehĩ? Kutse nindi yukayira omundu mo mũmũ, kutse mo mutsiha, kutse erilangira, kutse ndĩmatĩme kwehĩ? Sĩ ngye, Mwami Mukulu kwehĩ?

¹²Neryo lino ugende, nage nasyabya haguma nʼobuno bwawe, nʼerĩkũkangĩrĩrya ebyo wasyabũga.

¹³Nĩkwa Musa mwabũga ati, Uwe, Mukama, ngakusaba nyiti, Utume omwatsi omo byala byʼoyo wanzĩre erituma.

¹⁴Neryo erihitana lyʼOmwami Mukulu molyagulumira uku Musa, neryo mwabũga ati, Harũnĩ, mugala wenyũ sĩ Mũlawĩ kwehĩ? Nyĩnasĩ kwʼangatoka erĩbũga ndeke. Kandi lebaya, akasa erĩhĩndana nawe; nʼomugulu asyakulolako, asyatsema omo mutima wuwe.

¹⁵Nawe wasyabũga naye nʼerĩhĩra ebĩnywa byʼomo buno buwe; nage nasyabya nʼobuno bwawe, nʼobuno buwe, nasyabakangĩrĩrya ebyo mwasyakola.

¹⁶Naye asyabya mbũyĩrĩrĩ yawe oko bandu, asyabya ngʼobuno busana nawe, nawe Wasyabya nga Nyamuhanga busana naye.

¹⁷Nawe wasyawata oko mũtso oyũ omo byala byawe, wasyakola mugo mwʼebiminyikalo.

¹⁸Neryo Musa mwagenda mwasuba ewa Yetero ĩse-byala wuwe, mwabũga naye ati, Ngakũbũlaya Uleke ngagende erisuba eyiri bagala betu abali eMĩsĩrĩ, erĩrebya nga bakineho. Na Yetero mwabũga na Musa ati, Ugende buholo.

¹⁹Neryo Omwami Mukulu mwabwirira Musa eMĩdĩanĩ ati, Ugende, usube eMĩsĩrĩ; kusangwa abandu bosĩ abasonda engebe yawe babirihola.

²⁰Neryo Musa mwĩmya omũkalĩ wuwe nʼabagala buwe mwahĩrabo oko syopunda, mwasuba omo kihugo kyʼeMĩsĩrĩ; kandi Musa mwĩmya omũtso wa Nyamuhanga omo byala biwe.

²¹Neryo Omwami Mukulu mwabũga na Musa ati, Omugulu wasyasuba eMĩsĩrĩ, Ũtegaye Ukole embere sya Farao ebyʼeriswekera ebyosĩ nabĩrĩhĩra omo byala byawe; nĩkwa nasyakalya omutima wuwe, naye sĩendĩsyalĩga abandu bakagenda.

²²Nawe wasyabũga na Farao uti, Omwami Mukulu akabũga ati, Ĩsraelĩ ni mugala wage, akambere kage.

²³Neryo nabirikubwira nyiti, Uleke mugala wage agende iniatoka eringolera; nawe wabirimuganira erigenda; lebaya nasyĩta mugala wawe, akambere kawe.

²⁴Neryo omo nzira omo bulaliriro, Omwami Mukulu mwahĩndana naye, mwasonda erĩmwĩta.

²⁵Neryo Sĩpora mwĩmya erĩbwe erĩtwĩre, mwatwa engoba yʼembere yʼomugala wuwe, mwagusayo ahisi oko bisando bya Musa, mwabũga ati, Kwenene uli ĩba wʼomũherũkĩ wʼomusasi kwĩngye.

²⁶Neryo Nyamuhanga mwamuleka. Neryo Sĩpora mwabũga ati, Uli ĩba wʼomũherũkĩ wʼomusasi, busana nʼerĩbanĩa.

²⁷Neryo Omwami Mukulu mwabũga na Harũnĩ ati, Ugende omo mbwarara erĩhĩndana na Musa. Naye mwagenda mwahĩndana naye oko kitwa kya Nyamuhanga, neryo mwamulyatsirira.

²⁸Neryo Musa mwabwira Haranĩ yʼebĩnywa byosĩ ebyo Mwami Mukulu amulayira, nʼebĩmĩnyĩsyo byosĩ ebyo amuhana erikola.

²⁹Neryo Musa na Haranĩ mobagenda mobahĩndanĩa abakulu bosĩ bʼabana ba Ĩsraelĩ.

³⁰Neryo Haranĩ mwabũga ebĩnywa byosĩ ebyo Mwami Mukulu abwira Musa, kandi mwakola ebiminyikalo ebyo embere syʼabandu.

³¹Nʼabandu mobĩkĩrĩrya; babere bowa ngoko Mwami Mukulu abĩrĩlũngũlĩra abana ba Ĩsraelĩ, nʼakandi ngoko abirilangira amalĩge wabo, neryo mobũnamya emitwe yabo ahisi mobaramya.