Read nande Erĩlũayo 5 Bible Online

Erĩlũayo 5 - nande bible

Erĩlũayo 5

¹Nʼenyũma wʼaho, Musa na Haranĩ mobasa, mobabwira Farao bati, Omwami Mukulu Nyamuhanga wa Ĩsraelĩ akabũga ati, Uleke abandu bage bagende bangolere Ekiro Kikulu omo mbwarara.

²Nĩkwa Farao mwabũga ati, Omwami Mukulu nindi uti nangowa omulenge wuwe nʼerireka Abaĩsraelĩ erigenda kwehĩ? Sĩnyasĩ Omwami Mukulu, nʼakandi sindiendireka Abaĩsraelĩ erigenda.

³Nabo mobabũga bati, Nyamuhanga wʼAbaebrania abĩrĩhĩndana netu; tũkabũlaya, Uleke tugende olugendo lwʼebiro bisatu omo mbwarara tuherere Omwami Mukulu Nyamuhanga wetu, akasyatubuga omo ndwala yʼakasũsũ kutse omo mũyalĩ.

⁴Nʼomwami wʼeMĩsĩrĩ mwabũga nabo ati, Busana nakĩ Ĩnywe Musa na Haranĩ, mũkatswesaya abandu bʼoko mĩbĩrĩ yabo kwehĩ? Mugende, musube oko mĩbĩrĩ yenyũ.

⁵Neryo Farao mwabũga ati, Talebaya, abandu bʼekihugo ni bangi lino, nenyũ mũkalũhũkayabo oko mĩbĩrĩ yabo.

⁶Nʼekiro ekyo Farao mwahana abateya bʼabandu, nʼabakulu babo ati.

⁷Simusyeswaha abandu bʼobunyatsi eribumba amatafalĩ ngʼerĩmbere; ĩbobene-bene bagende bayiretere obunyatsi.

⁸Nʼeriganza lyʼamatafalĩ ago babumba erĩmbere, lyo mũnahĩre kubo; sĩmwendĩsyakehyalyo nʼahake; kusangwa bĩkere buyira; kikaleka ibalira-lira bati, Uleke tugende tukayaherera Nyamuhanga wetu.

⁹Mutomekere omũbĩrĩ owalĩtohĩre kwʼaho oko bandu aba, bakolego; sibahulikirire ebĩnywa byʼamabehĩ.

¹⁰Neryo abateya bʼabandu nʼabakulu babo, mobabũga nʼabandu bati, Farao abũgĩre ati, Sindiendibaha obunyatsi.

¹¹Mugende ĩnywebene-bene muyibanire obunyatsi aho mwanganatoka eribanabo; kusangwa omũbĩrĩ wenyũ sĩendĩsyakũhĩhĩbwa nʼahake.

¹²Neryo abandu mobapanzikanira omo kihugo kyosĩ kyʼeMĩsĩrĩ erikuma-kuma esyombuba mo bunyatsi.

¹³Nʼabateya mobakũnangabo bati, Mũberereraye emĩbĩrĩ yenyũ, olulengo lwʼomũbĩrĩ lʼobuli kiro, ngʼomugulu habya obunyatsi.

¹⁴Neryo abakulu bʼabana ba Ĩsraelĩ, abo bĩmanĩrĩ ba Farao bahĩra endata kubo, mobaswĩrĩbwa bati, Busana nakĩ sĩmwetaberererya olulengo lʼomũbĩrĩ wenyũ mũlĩgolo na mũnabwĩre, eribumba amatafalĩ ngʼerĩmbere kwehĩ?

¹⁵Neryo abakulu bʼabana ba Ĩsraelĩ mobasa mobalirira Farao bati, Busana nakĩ ukatukola utya ĩtwe bagombe bawe kwehĩ?

¹⁶Abagombe bawe sibehabawa bunyatsi, kandi bakatubwira bati, Mubumbe amatafalĩ; kandi lebaya, abagombe bawe bakaswĩrĩbawa; nĩkwa omusango ni wʼabandu bawe ĩbobene.

¹⁷Nĩkwa mwabũga ati, Mukagala-gala; kikaleka ĩmwabũga muti, Uleke tugende tuherere Omwami Mukulu.

¹⁸Mugende lino-lino, mukole; kusangwa simwendihabwa obunyatsi, nĩkwa mwasyaleta emiganzo yʼamatafalĩ.

¹⁹Neryo abakulu bʼabana ba Ĩsraelĩ mobalangira ngoko bali omo mibere mibi, omugulu babũga bati, Sĩmwendĩsyakehya oko matafalĩ wenyũ nʼahake, emiganzo yʼobuli kiro.

²⁰Neryo abakulu abo mobahĩndana na Musa na Haranĩ, ibanahangene omo nzira, bakalũa eyiri Farao.

²¹Mobabwirabo bati, Omwami Mukulu abasamalire, abatswere; kusangwa mwabĩrĩtsandya erikumba lyetu eribya nye omo meso wa Farao, nʼoko meso wʼabagombe buwe, erĩhĩra omũyalĩ gʼomo byala byabo erĩtwĩta.

²²Na Musa mwasuba ahali Omwami Mukulu, mwamũbũlya ati, Mwami Mukulu, busana nakĩ Wamakola abandu aba bo nabi kwehĩ? Busana nakĩ wabirinyituma kwehĩ?

²³Kusangwa erĩtsũka omugulu nahĩka uku Farao erĩbũga omo lĩna lyawe, amakola abandu aba bo nabi; kutse sũlĩtalamya abandu bawe bo nʼahake.