Read nande Erĩlũayo 6 Bible Online

Erĩlũayo 6 - nande bible

Erĩlũayo 6

¹Neryo Omwami Mukulu mwabũga na Musa ati, Lino ukandilangira ekyo nasyakolera Farao; kusangwa omo byala byʼamaka asyalekabo ibagenda, nʼomo byala byʼamaka asyahigabo erĩlũa omo kihugo kiwe.

²Neryo Nyamuhanga mwabũga na Musa, mwamubwira ati, ĩngye, indi Mwami Mukulu;

³kandi monahulukira uku Abrahamũ, nʼuku Ĩsaka, nʼuku Yakobo, nga Nyamuhanga Omũtokĩ; nĩkwa omo lĩna lyage Mwami Mukulu, mondaminyikala kubo.

⁴Kandi nabirihanda endagano yage haguma nabo, erihabo ekihugo kyʼeKanana, ekihugo kyʼobubunga bwabo, ekyo babungiramo.

⁵Nʼakandi nabĩrĩowa erĩsĩmba lyʼabana ba Ĩsraelĩ, kusangwa Abanya Mĩsĩrĩ babiribohabo omo bukobe; nage nabiryibuka endagano yage.

⁶Neryo Ubwire abana ba Ĩsraelĩ uti, ĩngye indi Mwami Mukulu, nasyabalũsya omo miheke yʼAbanya Mĩsĩrĩ, nasyabalũsya omo bukobe bwabo, kandi nasyabatongolya omo kuboko kũyĩsũmbĩre, nʼeritswera lĩnene.

⁷Nage nasyabĩmya eribya bandu bage, nage nasyabya Nyamuhanga wenyũ; nenyũ mwasyaminya ko ndi Mwami Mukulu Nyamuhanga wenyũ, oyũkabalũsaya erĩlũa oko miheke yʼAbanya Mĩsĩrĩ.

⁸Nage nasyabaleta omo kihugo ekyo nalahĩraya erihakyo uku Abrahamũ, na Ĩsaka, na Yakobo; kandi nasyabahakyo eribya mwandu wenyũ; ĩngye indi Mwami Mukulu.

⁹Na Musa mwabũga atya nʼabana ba Ĩsraelĩ; nĩkwa mobatahulikirira Musa busana nʼobũsĩrĩkalire bwʼomutima, na busana nʼekitsatsuha kyʼobukobe.

¹⁰Neryo Omwami Mukulu mwabũga na Musa, ati,

¹¹Ugende, ũbũge na Farao Omwami wʼeMĩsĩrĩ, uti, aleke abana ba Ĩsraelĩ balũe omo kihugo kiwe.

¹²Nĩkwa Musa mwabũga embere syʼOmwami Mukulu ati, Talebaya, abana ba Ĩsraelĩ sibetanyowa; neryo Farao asyanyowa ati, ĩngye ndasĩ erĩbũga?

¹³Neryo Omwami Mukulu mwabũga na Musa na Haranĩ, mwahanabo ati bagende oko bana ba Ĩsraelĩ nʼuku Farao omwami wʼeMĩsĩrĩ, erĩlũsya abana ba Ĩsraelĩ omo kihugo kyʼeMĩsĩrĩ.

¹⁴Aba ba bakulu bʼebĩtũnga byʼabotata wabo. Abagala ba Rũbenĩ akambere ka Ĩsraelĩ; Hanokĩ, na Palũ, na Hesĩronĩ, na Karĩmĩ, ebĩ bye bĩtũnga bya Rũbenĩ.

¹⁵Nʼabagala ba Sĩmeonĩ: Yemũelĩ, na Yamĩnĩ, na Ohadũ, na Yakĩmĩ, na Zoharĩ, na Saũlĩ mugala wʼomũkalĩ wʼeKanana; ebĩ bye bĩtũnga bya Sĩmeonĩ.

¹⁶Aya wa mena wʼabagala ba Lawĩ ngʼesyondengo syabo; Gersonĩ na Kohatĩ, na Merarĩ. Nʼemyaka ya Lawĩ yabya erĩgana nʼamakũmĩ asatu nʼeyirinda (137).

¹⁷Abagala ba Gersonĩ: ye Lĩbũnĩ, na Sĩmeĩ, oko bĩtũnga byabo.

¹⁸Nʼabagala ba Kohatĩ: Amũramũ, na Ĩzĩharĩ, na Hebũronĩ, na Ũzĩelĩ; nʼemyaka ya Kohatĩ yabya erĩgana nʼamakũmĩ asatu nʼeyĩsatu.

¹⁹Nʼabagala ba Merarĩ: ye Malĩ na Mũsĩ. Ebĩ bye bĩtũnga bya Lawĩ oko syondengo syabo.

²⁰Neryo Amũramũ mwahĩkya Yokebedĩ, ĩse-ngalĩ wuwe; naye mwamubutira Harũnĩ na Musa; nʼemyaka ya Amũramũ yabya myaka erĩgana nʼamakũmĩ asatu nʼeyirinda.

²¹Nʼabagala ba Ĩzĩharĩ: ye Kora na Nefagĩ, na Sĩkĩrĩ.

²²Nʼabagala ba Ũsĩelĩ; ye Mĩsaele, na Elĩsafanĩ, na Sĩtĩrĩ.

²³Na Harũnĩ mwahĩkya Elĩseba, mwali wa Abĩnadabũ, mwali wabo Nasonĩ; naye mwamubutira Nadabũ, na Abĩhũ, Eleazarĩ, na Ĩtamarĩ.

²⁴Nʼabagala ba Kora: ye Asĩrĩ, na Elekana, na Abĩasafũ, ebĩ bye bĩtũnga byʼAbakora.

²⁵Na Eleazarĩ mugala wa Harũnĩ mwahĩkya omuguma gʼoko bali ba Pũtĩelĩ; naye mwamubutira Fĩnehasĩ. Aba ba bakulu bʼebĩtũnga byʼabotata wʼAbalawĩ ngʼebihanda byabo.

²⁶Aba nĩ Harũnĩ na Musa, abo Mwami Mukulu abwira ati, Mũlũsaye abana ba Ĩsraelĩ omo kihugo kyʼeMĩsĩrĩ ngʼemilondo yabo ko yiri.

²⁷Aba bo babũga na Farao Omwami wʼeMĩsĩrĩ, erĩlũsya abana ba Ĩsraelĩ erĩlũa eMĩsĩrĩ: aba ni Musa na Harũnĩ oyo.

²⁸Neryo oko kiro Omwami Mukulu abũga na Musa omo kihugo kyʼeMĩsĩrĩ,

²⁹Omwami Mukulu mwabũga na Musa, ati, Ĩngye indi Mwami Mukulu: Ubwire Farao Omwami wʼeMĩsĩrĩ ebyosĩ ngakubwira.

³⁰Neryo Musa mwabũga embere syʼOmwami Mukulu ati, Lebaya, ĩngye Sĩnyasĩ erĩbũga, na Farao asyanyowa ati kwehĩ?