Read nande Erĩlũayo 7 Bible Online

Erĩlũayo 7 - nande bible

Erĩlũayo 7

¹Neryo Omwami Mukulu mwabũga na Musa ati, Langira, nabirikuyira nga Nyamuhanga uku Farao; na Harũnĩ mugala wenyũ asyabya mũmĩnyererĩ wawe.

²Wasyabũga ebyosĩ ngakuhana; na Harũnĩ mugala wenyũ asyatũlĩrago Farao ati, aleke abana ba Ĩsraelĩ balũe omo kihugo kiwe.

³Nage nasyakalya omutima wa Farao, nʼerĩkanyĩa ebiminyikalo byage nʼebyʼeriswekera byage omo kihugo kyʼeMĩsĩrĩ.

⁴Nĩkwa Farao sĩendĩsyabowa, nage nasyahĩra ebyala byage oko Mĩsĩrĩ nʼerĩlũsyaho emilondo yage, ba bandu bage abana ba Ĩsraelĩ, erĩlũa omo kihugo kyʼeMĩsĩrĩ busana nʼeritswera lĩnene.

⁵NʼAbanya Mĩsĩrĩ basyaminya ko ndi Mwami Mukulu, omugulu nasyasumba ebyala byage endata wʼeMĩsĩrĩ, nʼerĩlũsya abana ba Ĩsraelĩ omo katĩkatĩ kabo.

⁶Na Musa na Harũnĩ mobakola batya, ngoko Mwami Mukulu ahanabo, mobakola batya.

⁷Na Musa abya wʼemyaka makũmĩ munani, na Harũnĩ abya wʼemyaka makũmĩ munani nʼĩsatu, omugulu babũga na Farao.

⁸Omwami Mukulu mwabũga na Musa na Harũnĩ ati,

⁹Omugulu Farao asyakanĩa nenyũ ati, Mukole ekyʼeriswekera; neryo wasyabũga na Harũnĩ uti, Wĩmaye omũtso wawe ugusego ahisi embere sya Farao, ahinduke nzoka.

¹⁰Neryo Musa na Harũnĩ mobingira ewa Farao, mobakola batya ngoko Mwami Mukulu ahanabo: na Harũnĩ mwagusa omũtso wuwe wʼahisi embere sya Farao nʼembere syʼabagombe buwe, nago mwahinduka nzoka.

¹¹Neryo Farao mwabirikira abandu buwe bʼamenge nʼabakũmũ; nabo nibya, abakũmũ bʼeMĩsĩrĩ, mobakola batya omo busaki bwabo.

¹²Kusangwa obuli mundu mwagusa omũtso wuwe wʼahisi, nago mwahinduka nzoka; nĩkwa omũtso wa Harũnĩ mwamera emyũtso yabo.

¹³Nʼomutima wa Farao mwakala, mwatowabo, ngoko Mwami Mukulu abũga.

¹⁴Neryo Omwami Mukulu mwabũga na Musa ati, Omutima wa Farao akalĩre, akagana erireka abandu erigenda.

¹⁵Ugende eyiri Farao omo ngyakyangyakya; akahuluka eriya oko magetsi; nawe wasyahangana oko mũsĩke wʼolũsĩ lwʼeNĩlĩ erĩhĩndana naye; wasyĩmya omũtso gʼomo byala byawe owahinduka nzoka.

¹⁶Wasyabũga naye uti, Omwami Mukulu, Nyamuhanga wʼAbaebrania, abirinyituma ukʼuwe, ati, Leka abandu bage bagende, banyikolere omo mbwarara; neryo lebaya erĩhĩka na lino sũlĩtowa.

¹⁷Omwami Mukulu akabũga atya, Ũkwʼekĩ wasyaminya ko ndi Mwami Mukulu. Lebaya, nasyaswĩrya oko magetsi awali omo lũsĩ lwʼeNĩlĩ omo mũtso owali omo byala byage, nago asyahĩndũkĩbwa mo musasi.

¹⁸Nʼesyonyama esiri omo lũsĩ lwʼeNĩlĩ syasyahola, nʼolũsĩ lwʼeNĩlĩ lwasyakumba; nʼAbanya Mĩsĩrĩ basyapona erĩpũlya oko magetsi awakalũa omo lũsĩ.

¹⁹Omwami Mukulu mwabũga na Musa ati, Ubwire Harũnĩ uti, Twala omũtso wawe, usumbire ebyala byawe byʼendata oko magetsi wʼeMĩsĩrĩ, endata oko nyũsĩ syabo, nʼendata oko hyũsĩ hyabo, nʼendata oko bitsinga byabo, nʼendata oko byũna byabo byʼamagetsi, bihinduke musasi. Neryo hasyabya omusasi omo kihugo kyosĩ kyʼeMĩsĩrĩ, omo mihe yʼemiti, nʼamatũba, nʼomo nyungu syʼamabwe.

²⁰Neryo Musa na Harũnĩ mobakola ebyo Mwami Mukulu ahanabo; neryo Musa mwasumba omũtso, mwaswĩrya amagetsi awabya omo lũsĩ lwʼeNĩlĩ, embere wʼameso wa Farao, nʼomo meso wʼabagombe buwe; nʼamagetsi gosĩ awabya omo lũsĩ lwʼeNĩlĩ mwahinduka musasi.

²¹Nʼesyonyama esyabya omo lũsĩ lwʼeNĩlĩ mosyahola; nʼolũsĩ lwʼeNĩlĩ molwakumba, kandi Abanya Mĩsĩrĩ mobatatoka erĩpũlya oko magetsi awalũa omo lũsĩ; nʼomusasi mwabya omo kihugo kyosĩ kyʼeMĩsĩrĩ.

²²Nʼabakũmũ bosĩ bʼeMĩsĩrĩ mobakola batya omo busaki bwabo; nʼomutima wa Farao mwakala, mwatowabo; ngoko Mwami Mukulu abũga.

²³Na Farao mwayĩtĩmbako mwingira omo nyũmba yiwe, kutse mwatahĩra ukwʼebyo ko mutima wuwe.

²⁴NʼAbanya Mĩsĩrĩ bosĩ mobatakula hakũhĩ nʼolũsĩ lwʼeNĩlĩ babane amagetsi wʼerĩpũlya; kusangwa mobataluka erĩpũlya amagetsi wʼomo lũsĩ lwʼeNĩlĩ.

²⁵Neryo ebiro birinda mobyahĩkana, enyũma Omwami Mukulu abĩswĩrya olũsĩ lwʼeNĩlĩ.