Read nande Erĩlũayo 8 Bible Online

Erĩlũayo 8 - nande bible

Erĩlũayo 8

¹Neryo Omwami Mukulu mwabwira Musa ati, Ugende uku Farao, umubwire uti, Omwami Mukulu akabũga ati, Uleke abandu bage bagende, bangolere.

²Neryo wamagana erirekabo bakagenda, nasyaswĩrya emitano yawe yosĩ nʼebikere;

³nʼolũsĩ lwʼeNĩlĩ lwasyosũla mwʼebikere, ebikandisyahetuka erĩhĩka omo nyũmba yawe, nʼomo kyumba kyawe kyʼerigotseramo, nʼoko ngyingo yawe nʼomo nyũmba yʼabagombe bawe, nʼoko bandu bawe, nʼomo meko wawe, nʼomo bindu byawe byʼeritsumbiramo.

⁴Nʼebikere byasyakuhetukako, nʼoko bandu bawe nibya, nʼoko bagombe bawe bosĩ.

⁵Omwami Mukulu mwabũga na Musa ati, Ubwire Harũnĩ uti, Usumbe ebyala byawe nʼomũtso wawe endata oko nyũsĩ nʼendata oko hyũsĩ, nʼoko bitsinga byʼamagetsi, Ũhũlũkaye ebikere byʼoko kihugo kyʼeMĩsĩrĩ.

⁶Neryo Harũnĩ mwasumbira ebyala biwe byʼendata oko magetsi wʼeMĩsĩrĩ, nʼebikere mobyahetuka mobyaswika ekihugo kyʼeMĩsĩrĩ.

⁷Nʼabakũmũ mobakola batya nibya omo busaki bwabo, mobahetũkya ebĩkere oko kihugo kyʼeMĩsĩrĩ.

⁸Neryo Farao mwabirikira Musa na Harũnĩ, ati, Musabe Omwami Mukulu, andũsaye kwʼebikere, nʼoko bandu bage; nage ngandireka abandu ibagenda ibayamuherera.

⁹Neryo Musa mwasũbĩrya Farao ati, Omwʼĩsĩkya lyawe nasyakusabira oko mugulu wahi nʼabagombe bawe, nʼabandu bawe, ebikere bihwe erĩlũa ukʼuwe nʼoko manyũmba wawe, nʼerĩsĩgala omo lũsĩ lwʼeNĩlĩ lusa kwehĩ?

¹⁰Neryo Farao mwabũga ati, Omo ngyakya. Kandi Musa mwabũga ati, Bibye ngʼekĩnywa kyawe; iwatoka eriminya ko hate gundi ngʼOmwami Mukulu Nyamuhanga wetu.

¹¹Nʼebikere byasyakũlũako, nʼoko manyũmba wawe, nʼoko bagombe bawe, nʼoko bandu bawe; byasyasĩgalira omo lũsĩ lusa lwʼeNĩlĩ.

¹²Neryo Musa na Harũnĩ mobalũa embere sya Farao; na Musa mwalakira Omwami Mukulu busana nʼebikere ebyo aleta uku Farao.

¹³Neryo Omwami Mukulu mwakola ngʼekĩnywa kya Musa; nʼebikere mobyahola erĩlũa omo manyũmba, nʼerĩlũa omo bibuga, nʼerĩlũa omo malima.

¹⁴Mobakuma-kumabyo mo bilundo-bilundo; nʼekihugo mokyakumba.

¹⁵Nĩkwa omugulu Farao alangira kwʼamahumula, mwakalya omutima wuwe, mwatowabo; ngoko Mwami Mukulu abũga.

¹⁶Neryo Omwami Mukulu mwabwira Musa ati, Ubwire Harũnĩ uti, Asumbe omũtso wuwe, aswĩraye olũtũtũ lwʼekitaka, luhinduke mo nda omo kihugo kyosĩ kyʼeMĩsĩrĩ.

¹⁷Neryo mobakola batya; na Harũnĩ mwasumba ebyala biwe haguma nʼomũtso wuwe, mwaswĩrya olũtũtũ lwʼekitaka, neryo mohabya esyonda oko bandu nʼoko syonyama. Olũtũtũ losĩ lwʼekitaka molwahinduka mo nda omo kihugo kyosĩ kyʼeMĩsĩrĩ.

¹⁸Nʼabakũmũ mobakola batya nʼobusaki bwabo erireta esyonda, nĩkwa mobatatoka; mohabya esyonda oko bandu nʼoko nyama.

¹⁹Neryo abakũmũ mobabũga na Farao bati, Oyũ ni munwe wa Nyamuhanga; nʼomutima wa Farao mwakalirira, mwatowabo; ngoko Mwami Mukulu abũga.

²⁰Neryo Omwami Mukulu mwabũga na Musa ati, Uhangane omo ngyakyangyakya, uhangane embere sya Farao; lebaya, akasa oko magetsi; umubwire uti, Omwami Mukulu akabũga ati, Uleke abandu bage bagende, banyikolere.

²¹Bite bitya, wamatindaleka abandu bage bakagenda, lebaya, nasyakutumako amarumbu wʼesĩsũkĩ, nʼoko bagombe bawe, nʼoko bandu bawe, nʼomo manyũmba wawe; nʼamanyũmba wʼAbanya Mĩsĩrĩ asyũsũla mwʼamarumbu wʼesĩsũkĩ, nʼekitaka ekyo baliko.

²²Oko kiro ekyo nasyahigula ekihugo kyʼeGosenĩ ekyo bandu bage bĩkeremo nʼamarumbu wʼesĩsũkĩ sĩendĩsyahĩka mukyo; iwatoka eriminya ngoko indi Omwami Mukulu omo kihugo.

²³Nage nasyahĩra Omutano gʼomo katĩkatĩ kʼabandu bage nʼabandu bawe; omo ngyakya ekiminyikalo ekĩ ikyabya.

²⁴Neryo Omwami Mukulu mwakola atya; amarumbu awakalĩre awʼesĩsũkĩ mosyingira omwa Farao, nʼomo manyũmba wʼabagombe buwe, nʼomo kihugo kyosĩ kyʼeMĩsĩrĩ, ekihugo mokyahera busana nʼamarumbu wʼesĩsũkĩ.

²⁵Neryo Farao mwabirikira Musa na Harũnĩ, mwabũga ati, Mugende, muherere Nyamuhanga wenyũ omo kihugo kino.

²⁶Neryo Musa mwabũga ati, Sikitutolere erikola tutya; kusangwa twamaherera Omwami Mukulu Nyamuhanga wetu ni nye syʼAbanya Mĩsĩrĩ. Neryo lebaya, twamaherera esyonye syʼAbanya Mĩsĩrĩ embere wʼameso wabo ĩsĩbendĩsyatwĩta omo mabwe kwehĩ?

²⁷Tukandigenda olugendo lwʼebiro bisatu omo mbwarara, nʼeriherera Omwami Mukulu Nyamuhanga wetu yʼobuhere, ngoko atuhana.

²⁸Neryo Farao mwabũga ati, Ngandibaleka imwagenda, imwatoka eriherera Omwami Mukulu Nyamuhanga wenyũ omo mbwarara; nĩkwa simusyegenda hali kutsibu! Munyisabire.

²⁹Neryo Musa mwabũga ati, Lebaya, namalũa embere syawe, ngandisaba Omwami Mukulu neryo amarumbu wʼesĩsũkĩ ĩnĩalũa uku Farao, nʼoko bagombe buwe nʼoko bandu buwe, omo ngyakya; nĩkwa Farao siaswekola matebo eritindaleka abandu bakagenda eriherera Omwami Mukulu.

³⁰Neryo Musa mwalũa embere sya Farao, mwasaba Omwami Mukulu.

³¹Neryo Omwami Mukulu mwakola ngʼekĩnywa kya Musa; naye mwalũsya uku Farao, nʼoko bagombe buwe, nʼabandu buwe, kwʼamarumbu wʼesĩsũkĩ; mohatasĩgala nʼenguma.

³²Nĩkwa Farao mwakalya omutima wuwe kandi, mwataleka abandu bakagenda.