Read nande Erĩlũayo 9 Bible Online

Erĩlũayo 9 - nande bible

Erĩlũayo 9

¹Neryo Omwami Mukulu mwabũga na Musa ati, Ugende ewa Farao, umubwire uti, Omwami Mukulu, Nyamuhanga wʼAbaebrania yũkabũga ati, Uleke abandu bage bagende, banyikolere.

²Kusangwa wamagana erirekabo bakagenda, nʼerĩkakĩryabo kandi,

³lebaya, ebyala byʼOmwami Mukulu byasyahĩka endata oko bihangulo byawe ebiri omo lũlĩsĩryo, oko syosabayĩrĩ, nʼoko punda, nʼoko ngamia, nʼoko nde, nʼoko mbũlĩ; hasyabya akabugu akakalĩre kutsibu.

⁴Omwami Mukulu asyasombola omo bihangulo byʼAbanya Ĩsraelĩ nʼebihangulo byʼAbanya Mĩsĩrĩ; kandi sihendisyahola nʼenguma oko byosĩ byʼabana ba Ĩsraelĩ.

⁵Neryo Omwami Mukulu mwahĩra endambĩ ati, Omo ngyakya Omwami Mukulu asyakola ekindu ekĩ omo kihugo.

⁶Neryo omo ngyakya Omwami Mukulu mwakola omwatsi oyo, nʼesyonyama syʼoko bihangulo byosĩ byʼAbanya Mĩsĩrĩ mosyahola; nĩkwa ebihangulo byʼabana ba Ĩsraelĩ mobitaholako nʼenguma.

⁷Neryo Farao mwatuma, neryo lebaya, omo bihangulo byʼAbanya Ĩsraelĩ isihali nʼenguma eyaholĩre. Nĩkwa omutima wa Farao ĩnĩakalĩre, kandi mwataleka abandu bakagenda.

⁸Neryo Omwami Mukulu mwabũga na Musa, na Harũnĩ, ati, Mukuke ebiganza byʼerĩbũ byʼomo lĩko, na Musa agũlũkĩrayeryo omo kyanya embere syʼameso wa Farao.

⁹Nalyo lyasyabya lũtũtũ luke-luke oko kihugo kyosĩ kyʼeMĩsĩrĩ, nalo lwasyabya bihute ebikalasa oko bandu nʼoko syonyama, omo kihugo kyosĩ kyʼeMĩsĩrĩ.

¹⁰Neryo mobakuka erĩbũ lyʼomo lĩko, mobahangana embere sya Farao; na Musa mwagũlũkĩryalyo omo kyanya; nalyo molyabya bĩsũsũ ebĩkahũlũkaya ebihute byʼoko bandu nʼoko nyama.

¹¹Nʼabakũmũ mobatatoka erihangana embere sya Musa busana nʼebihute; kusangwa ebihute ebyo mobyabya oko bakũmũ, nʼoko Banya Mĩsĩrĩ bosĩ.

¹²Omwami Mukulu mwakalya omutima wa Farao, naye mwatowabo; ngoko Mwami Mukulu abwira Musa.

¹³Kandi Omwami Mukulu mwabũga na Musa ati, Uhangane omo ngyakyangyakya, uhangane embere sya Farao, ũbũge naye uti, Omwami Mukulu, Nyamuhanga wʼAbaebrania, yũkabũga ati, Uleke abandu bage bagende, bayanyikolere.

¹⁴Kusangwa oko mugulu ono nasyatuma ebĩhũnze byage byosĩ oko mutima wawe, nʼoko bagombe bawe nʼoko bandu bawe; iwaminya ngoko hate gundi nga ngye omo kihugo kyosĩ.

¹⁵Kusangwa oko mugulu ono nga nabirisumba ebyala byage, nʼerĩkũswĩrya nʼabandu bawe omo ndwala yʼakasũsũ, kumbe wabĩrĩlũsĩbwa oko kihugo.

¹⁶Nĩkwa busana nʼomwatsi oyũ, nabĩrĩkũhanganĩa, erĩkũkangya Obũtokĩ bwage, kandi nʼerĩna lyage lĩtũlawe omo kihugo kyosĩ.

¹⁷Na lino ukayihalamba erilwa nʼabandu bage, isulireka bakagenda.

¹⁸Lebaya, omo ngyakya oko ndambĩ eyiri ngʼeyĩ nasyawĩsya embũla yʼamatwa awakalĩre, awate atabya omo Mĩsĩrĩ erĩtsũka ekiro kyakondawa erĩhĩka na lino.

¹⁹Neryo lino ulayire, Wanguhe erĩngĩrya esyonyama syosĩ uwite omo lũlĩsĩryo; obuli mundu nʼenyama ebikandisyabanika omo lũlĩsĩryo, ebite byaletwa omo nyũmba, amatwa asyawa kubyo, ibyahola.

²⁰Nʼoyo wabya akubaha ekĩnywa kyʼOmwami Mukulu omo katĩkatĩ kʼabagombe ba Farao mwasayĩrya abagombe buwe nʼesyonyama siwe omo manyũmba.

²¹Nʼoyo wabya atekenga ekĩnywa kyʼOmwami Mukulu mwasĩga abagombe buwe nʼesyonyama siwe omo lũlĩsĩryo.

²²Omwami Mukulu mwabũga na Musa ati, Usumbe ebyala byawe erĩlolyabyo ebũtũkũ, amatwa awe omo kihugo kyosĩ kyʼeMĩsĩrĩ, oko bandu, nʼoko nyama, nʼoko mbuto syosĩ syʼomo malima, omo kihugo kyosĩ kyʼeMĩsĩrĩ.

²³Neryo Musa mwasumba omũtso wuwe erĩlolyago ebũtũkũ; nʼOmwami Mukulu mwatuma emĩlũmo nʼamatwa, nʼomuliro mwandagalira oko kitaka; Omwami Mukulu mwawĩsya amatwa oko kihugo kyʼeMĩsĩrĩ.

²⁴Neryo mohawa amatwa, nʼomuliro mwatũlũngana nʼamatwa awakalĩre kutsibu, awate atabya omo kihugo kyosĩ kyʼeMĩsĩrĩ erĩtsũka omugulu kyabya kihanda.

²⁵Nʼamatwa mwahũnza ekihugo kyosĩ kyʼeMĩsĩrĩ, nʼebyosĩ byabya omolĩ, abandu nʼesyonyama; nʼamatwa mwahũnza esyombuto syosĩ syʼomo malima, mwabũnanga obuli muti gʼomolĩ.

²⁶Omo kihugo kyʼeGosenĩ, aho bana ba Ĩsraelĩ babya, mohatabya matwa.

²⁷Neryo Farao mwatuma eribirikira Musa na Harũnĩ, mwabwirabo ati, Lero nakolĩre nabi Omwami Mukulu ni wʼeritunganene, ĩngye nʼabandu bage tuli babi.

²⁸Munyisabire oko Mwami Mukulu, kusangwa emĩlũmo ya Nyamuhanga nʼamatwa byangatabya bingaho; nage ngandireka imwagenda, sĩmwendĩsyĩkala kandi.

²⁹Na Musa mwamũsũbĩrya ati, Ngandibya nabĩlũa oko mũyĩ ngandisumba ebyala byage oko Mwami Mukulu; emĩlũmo ĩyũmbya, kutse amatwa siendisyabya kandi; iwatoka eriminya ngoko ekihugo ni kyʼOmwami Mukulu.

³⁰Nĩkwa uwe nʼabagombe bawe, nyĩnasĩ ko mutendiubaha Omwami Mukulu Nyamuhanga.

³¹Nʼekĩtanĩ nʼekisusu mobyatsanda; kusangwa ekisusu kyabya kwʼamakũndĩ, nʼekĩtanĩ kyabya ikyamasohola.

³²Nĩkwa engano nʼobuhemba mobĩtahũnzwa; kusangwa byabya isibiri byalasa.

³³Neryo Musa mwalũa oko mũyĩ wa Farao, mwasumba ebyala biwe oko Mwami Mukulu nʼemĩlũmo nʼamatwa mobyũmbĩa, nʼembũla moyitaswawa oko kihugo.

³⁴Nʼomugulu Farao alangira ngoko amatwa nʼemĩlũmo byamũmbĩa, mwaswakola ebibi, mwakalya omutima wuwe, iye nʼabagombe buwe.

³⁵Nʼomutima wa Farao mwabya mutsibu, mwataleka abana ba Ĩsraelĩ erigenda; ngoko Mwami Mukulu abũga na Musa.