Read nande Yobũ 14 Bible Online

Yobũ 14 - nande bible

Yobũ 14

¹Omundu Oyukabutawa nʼomũkalĩ Ni wʼebiro bike, ĩnĩoswĩre nʼobũlĩge.

²Akahuluka ngʼomusanga neryo iniuma. Akasaga ngʼekyũtsũtsũ, sialikota.

³Nawe ũkalĩbũla ameso wawe oko mundu uli ngʼoyũ, Nʼerimuleta oko lubanza ukʼuwe kwehĩ?

⁴Nindi wangatoka erĩlũsya ekindu kibuya omo kĩtowene kwehĩ? Sihali nʼomuguma;

⁵Kusangwa ebiro biwe bĩhamwĩre, Nʼeriganza lyʼemikera yiwe, une nalyo, Nawe wabĩrĩmũhĩrĩra emitano yiwe isiangakiruka;

⁶Ũmũlũsaye kwʼameso, ahumule, Erĩhĩka aho asyaberererya ekiro kiwe ngʼomũhĩngĩ.

⁷Kusangwa hali amaha oko muti, Amabikondwa iniaswalasa Nʼamasasa wago sĩendĩsyũmbya.

⁸Omũlĩhĩ wago nomo angakula omo kitaka, Nʼendĩna yago ikahola omo kitaka.

⁹Nĩkwa busana nʼekikumbo kyʼamagetsi akakondolaya, Nʼerĩhũlũkya emitahi ngʼomwaka.

¹⁰Nĩkwa omundu akahola iniabombekwa ahisi; Ega, omundu akalekula, iniali hahi kwehĩ?

¹¹Ngʼamagetsi akabula omo ngetsi, Nʼolũsĩ lukakeha nʼeriuma;

¹²Omundu kwʼakagotsera atya ahisi butahangana. Erĩhĩka aho ebyanya biteho kandi, siendisyabuka, Kutse erĩbũkĩbwa omo tũgotserĩ tuwe.

¹³Kumbe wanganyĩbĩsa omo Kũlĩmũ, Kumbe wanganyibikamo bũbĩso-bĩso, Erĩhĩka aho erihitana lyawe likakusubirako, Kumbe wanyahũlĩrye omugulu owahamulawa, nʼerinyibuka!

¹⁴Omundu amahola asyaswabyaho kwehĩ? Inalindirira ebiro byosĩ byʼamalwa wage, Nʼerĩhĩka aho eriboholwa lyage lyasyahĩkĩra.

¹⁵Wangabirikira, nage inakwitaba. Wanganzĩre omũbĩrĩ wʼebyala byawe.

¹⁶Nĩkwa lino ukaganza eribasula lyage Ũkanalebaya ebibi byage.

¹⁷Amalolo wage abohere omo ngunza, Kandi ukaboha ebibi byage.

¹⁸Nĩkwa ekitwa kikatoga kikabuliraho; Nʼerĩbwe lĩkalũa omo mwanya walyo;

¹⁹Amagetsi akakehaya amabwe; Nʼeribwaga lyago likakumula olũtũtũ lwʼekihugo. Litya ũkaheraya amaha wʼomundu.

²⁰Ukamũsĩnga ebiro byosĩ, naye akalaba; Ukabindula erisosa liwe, nʼerimutuma erya.

²¹Abagala buwe bakahĩka okwʼĩsĩkĩbwa, naye ĩsĩasĩkyo; Kandi bakasũbĩbawa ahisi, nĩkwa sialiminya ko bali.

²²Nĩkwa omubiri wuwe akamwagalaya, Kandi akayiririra.