Read nande Yobũ 15 Bible Online

Yobũ 15 - nande bible

Yobũ 15

¹Neryo Elĩfasĩ Omũtemanĩ mwasũbĩrya mwabũga ati,

²Ko mundu wʼamenge angasũbĩrya nʼamenge wʼerihunga, Nʼerĩyũsũlya omwʼihunga lyʼendata kwehĩ?

³Angayihandika okwʼĩbũga lite nʼendũndĩ, Kutse nʼerĩbũga ebite byangakola ebyowene kwehĩ?

⁴Ega, ũkalũsaya obuba; Igukakakĩrĩraya erisaba embere sya Nyamuhanga.

⁵Kusangwa olubanza lwawe lukakangĩrĩraya obuno bwawe, Kandi ukayisoga olulimi lwʼeriteba.

⁶Obuno bwawe bukakutswera lubi, sĩ ngye; Ega emĩnywa yawe ĩkatũlago kuwe.

⁷Uli mundu watsũka eributwa kwehĩ? Kutse wabutawa embere wʼehitwa kwehĩ?

⁸Ũkowa esyombĩta sĩbĩsĩre sya Nyamuhanga kwehĩ? Kandi ũkakakĩrĩraya amenge abye wawe ĩgowene kwehĩ?

⁹Wasĩkĩ ekyo tũtasĩ kwehĩ? Ukaminya kyahi ekyo tutaminya netu kwehĩ?

¹⁰Abʼesyombwĩ nʼabasyakulu kutsibu abosĩ bane haguma netu, Ni bakulu kwilaba tata wawe.

¹¹Erĩsĩbĩkya lya Nyamuhanga nĩ ʼke busana nawe kwehĩ? Nʼekĩnywa kyʼobuholo si kindu kuwe kwehĩ?

¹²Busana nakĩ omutima wawe akakuhekera erya kwehĩ? Na busana nakĩ ameso wawe akasasuka kwehĩ?

¹³Uti ukabindula ekĩrĩmũ kyawe erilwa na Nyamuhanga, Nʼerĩhũlũkya omo buno bwawe mwʼebĩnywa ebiri ngʼebĩ kwehĩ?

¹⁴Omundu nĩkĩ, ati abye mubuya kwehĩ? Nʼoyukabutawa nʼomũkalĩ ati abye oyutunganene kwehĩ?

¹⁵Lebaya, sialiyiketera ababũyĩrĩre buwe; Ega, nʼekyanya si kibuya omo meso wuwe.

¹⁶Kwilaba aho, owʼesyonye nʼoyũtsandĩre, Omundu oyũkapũlaya ebibi ngʼamagetsi!

¹⁷Ngandĩkũkangya, Unyihulikirire, Nʼebyo nabirilolako ngandĩtũlago.

¹⁸Ebyo abandu bʼamenge babĩrĩbũga. Erĩtsũka oko botata wabo, ĩsĩbetabĩsabyo;

¹⁹Abahabawa ekihugo ĩbobene, Isihali wʼehandi oyo walaba omo katĩkatĩ kabo.

²⁰Omundu mubi akakunda omo bwagalĩ ebiro biwe byosĩ, Ye miganzo yʼemyaka eyabĩrĩhĩrwa busana nʼomũsĩndũlĩ.

²¹Omulenge wʼerĩũbahĩrĩrya ali omo matwĩ wuwe; Omo mugulu wʼobuholo, omũtĩngĩtya asyamũhĩkako.

²²Sĩalĩkĩrĩraya kwʼasyasubula erĩlũa omo mwĩrĩmya, Nʼomũyalĩ akamulinda.

²³Akaganga-ganga ehandi busana nʼakalyo, ati kali hahi kwehĩ? Anasĩ ekiro kyʼomwĩrĩmya ko kiri hakũhĩ naye.

²⁴Obũlĩge nʼobwagalĩ bĩkamũbahaya; Bĩkamũkĩnda, ngʼOmwami oyũsĩkĩre oko malwa.

²⁵Kusangwa abirisumba ebyala biwe erilwa na Nyamuhanga, Kandi akakala omwʼiyipipa erilwa nʼOmũtokĩ Wʼebyosĩ;

²⁶Akamugulukira Nʼebĩkũkũ byʼesyongabo siwe;

²⁷Kusangwa abiriswika obũsũ buwe nʼobunenehe buwe, Nʼerĩgalĩhya esyombindi siwe omo bĩsabũ;

²⁸Abĩrĩkala omo mĩyĩ yʼebĩma, Omo manyũmba ahatĩkala mundu Awakasonda eribya bĩhũma;

²⁹Siendisyabya muteke, kutse obuteke buwe sibwendisyakota, Kutse ebindu biwe sibyendisyakanya oko kihugo.

³⁰Siendisyabala omo mwĩrĩmya, Ekirimi kyʼomuliro kyasyũmya emitahi yiwe, Akandĩsyalũaho busana nʼomuka wʼerihunga.

³¹Siayiketere ebyʼobusa nʼeriyiteba; Kusangwa obusa bwasyabya luhembo luwe.

³²Ekĩ kyasyakoleka embere syʼomugulu wuwe, Nʼomutahi wuwe wʼobubondo siendisyabya mubisi.

³³Asyalagalya amakũke wʼebĩnyũ biwe ngʼomũlĩkĩ wʼebĩnyũ, Asyalagalya omusanga wuwe ngʼomuti wʼomũzeĩtũnĩ.

³⁴Kusangwa endeko yʼabate na Nyamuhanga yasyabya nyigumba, Nʼomuliro asyabuga amahema wʼesigulo.

³⁵Bakaheka obukule bwʼepono, ibabuta ebibi. Nʼemitima yabo ĩkategekanaya amatebo.