Read nande Yobũ 18 Bible Online

Yobũ 18 - nande bible

Yobũ 18

¹Neryo Bĩldadĩ Omũsũhĩ mwasũbĩrya mwabũga ati,

²Ko mwasyasonda-sondya ebĩnywa byo migulu yingahi kwehĩ? Taganĩraya eriminya nʼenyũma twasyabũga.

³Busana nakĩ tukaganzawa ngʼesyonyama, Itwabiribya bakĩrũ omo meso wawe kwehĩ?

⁴Ukayitulanga omwʼihitana lyawe, Kwʼekihugo kyasyasĩganĩbwa busana nawe kwehĩ? Kutse erĩbwe lyasyahũmĩbwa erĩlũa omo mwanya walyo kwehĩ?

⁵Ekyakakala kyʼababi kyasyalĩmĩbwa, Nʼengulukira yʼomuliro wuwe siyendisyakolerya.

⁶Ekyakakala omo hema yiwe kĩkalĩma, Nʼetala yiwe eyiri endata kwiye ĩkalĩma.

⁷Eribasula lyʼamaka wuwe lyasyakũhĩhĩbwa, Nʼerihana liwe lyasyamugusa ahisi.

⁸Kusangwa ebisando biwe byabirimugusa omo butaha-taha, Akalendera oko habambĩre.

⁹Ekitego kyasyamuhamba oko kasĩnzĩro, Nʼekisu kyasyamuhamba.

¹⁰Ekisu kĩbĩsamĩre busana naye omo kitaka, Nʼekitego busana naye omo nzira.

¹¹Erĩũbahya lyasyamũbahya oko mbande syosĩ, Nʼerĩmwendererya oko buli ibasula liwe.

¹²Amaka wuwe asyalibwa nʼenzala, Nʼerĩkwa lyasyabya oko mũsĩke wuwe.

¹³Engoba yʼomubiri wuwe ikalibawa, nʼendwala, Akambere kʼoluholo kasyalya ebĩtsũko biwe.

¹⁴Akakulawa erĩlũa omo buholo bwʼehema yiwe, Naye asyaletwa oko mwami wʼolubahwa.

¹⁵Ekite kiwe kĩkere omo hema yiwe; Olũmbũmbũ lwasyapanzwa aho ĩkere.

¹⁶Emĩrĩhĩ yiwe yasyumira omwisi, Nʼendata Omutahi wuwe asyatũbwa.

¹⁷Eryibukwa liwe likahwa omo kihugo, Kandi siendisyabya nʼerĩna omo nzira ehandi.

¹⁸Asyahigirwa omo mwĩrĩmya erĩlũa omo kyakakala, Asyahigwa erĩlũa omo kihugo eyiri abandu.

¹⁹Siendisyabya nʼomugala kutse mwitsikulu omo bandu buwe, Kutse mwana nʼomuguma eyo abungira.

²⁰Abakandisyasa enyũma basyaswekera ekiro kiwe. Nʼabagenda erĩmbere bakahambawa nʼeriubaha.

²¹Kwenene ahʼerĩĩkala lyʼabatatunganene ko hali hatya. Na hano ni mwanya wʼoyũtasĩ Nyamuhanga.