Read nande Yobũ 2 Bible Online

Yobũ 2 - nande bible

Yobũ 2

¹Kandi mokyahĩka oko kiro kiguma omugulu abagala ba Nyamuhanga basa erĩyĩkanganĩa embere syʼOmwami Mukulu, Satanĩ nayo moyasa omo katĩkatĩ kabo erĩyĩkanganĩa embere syʼOmwami Mukulu.

²Omwami Mukulu mwabũlya Satanĩ ati, Wamalũahi kwehĩ? Na Satanĩ mwasũbĩrya Omwami Mukulu ati, Ngalũa okwʼĩtĩmba-tĩmba omo kihugo, nʼerirendera eyĩ nʼeyĩ mukyo.

³Neryo Omwami Mukulu mwabũlya Satanĩ, ati, Wabĩrĩganĩrya omugombe wage Yobũ kwehĩ? Kusangwa sihali mundu uli nga ye omo kihugo, omundu oyũhĩkene nʼoyutunganene, oyukakenga Nyamuhanga, nʼerĩhũtatira ebibi; naye akĩnamakĩrĩre eritunganene riwe, nomo wananyĩtsotsereraya erilwa naye, erĩmũherya butsira ekikaleka.

⁴Neryo Satanĩ mwasũbĩrya Omwami Mukulu ati, Engoba busana nʼengoba, ega, omundu anganaha ebyosĩ awite busana nʼengebe yiwe.

⁵Nĩkwa lino ũkakaye ebyala byawe, ũtũle ahali erĩkũha liwe nʼomubiri wuwe, naye akandikutsuma embere wʼobũsũ bwawe.

⁶Neryo Omwami Mukulu mwabwira Satanĩ ati, Lebaya, ali omo byala byawe; ekiguma, usasire engebe yiwe.

⁷Neryo Satanĩ moyalũa ahali Omwami Mukulu, moyaswĩrya Yobũ nʼebimata bibi erĩtsũka omo bulyatiro bwʼebisando biwe erĩhĩka aho kahũlĩhũlĩ kʼomutwe wuwe.

⁸Naye mwayĩmĩrya oluyo eriyihala mulo; kandi mwĩkala omwʼĩbũ.

⁹Neryo omũkalĩ wuwe mwamubwira ati, Ukinamakirira oko litunganene ryawe kwehĩ? Utsume Nyamuhanga, uhole.

¹⁰Nĩkwa Yobũ mwamubwira ati, Ũkabũga ngʼomuguma gʼoko bakalĩ bakĩrũ. Nĩkĩ kwehĩ? Twasyangirira ebibuya omo byala bya Nyamuhanga, isitwendisyabana nʼobũlĩge kwehĩ? Omo byosĩ ebĩ Yobũ mwatabũga bibi omo mĩnywa yiwe.

¹¹Neryo omugulu abĩra basatu ba Yobũ bowa obũlĩge bwa Yobũ, abosĩ mobasa obuli mundu erĩlũa aho wuwe. Elĩfazĩ Omũtemanĩ, na Bĩldadĩ Omũsũhĩ, na Zofarĩ Omũnamatĩ; mobalagana haguma erĩhĩka erimulirirako nʼerĩmũkĩranĩa.

¹²Neryo babere bakine hali; mobalangira Yobũ, nĩkwa mobatamuminya, mobasumba emirenge yabo, mobalira; mobasatya obuli mundu ekanzu yiwe, mobalagalĩrya olũtũtũ oko mitwe yabo erĩlolyalo omo kyanya.

¹³Neryo mobĩkala ahisi haguma naye oko kitaka emisibo irinda nʼebiro birinda, isihali mundu oyo wakanaya naye kĩnywa; kusangwa balangira obũlĩge buwe ko ni bunene kutsibu.