Read nande Yobũ 22 Bible Online

Yobũ 22 - nande bible

Yobũ 22

¹Neryo Elĩfasĩ Omũtemanĩ, mwasũbĩrya mwabũga ati,

²Ko mundu wʼamaka angatoka erigasira Nyamuhanga yokĩ kwehĩ? Kutse omundu wʼamenge akayigasira kwehĩ?

³Wamabya mutunganene ekyo kĩkatsemesaya Omũtokĩ Wʼebyosĩ kwehĩ? Kutse nĩ ndũndĩ, uti ukayira esyonzira syawe esĩhĩkene?

⁴Ni busana nʼerikenga lyawe akakukunga kwehĩ? Ati akayakutswera kwehĩ?

⁵Obubi bwawe si bunene kwehĩ? Kutse amalolo wawe siawite ndũlĩ kwehĩ?

⁶Kusangwa wabĩrĩmya omuwato uku bagala benyũ ko busa, Nʼerĩpũra esyongimba syʼabandu eriyirabo ndũmbũ.

⁷Sulitaha abakaluha amagetsi wʼerĩpũlya, Kandi ũkĩma abakwĩre enzala bʼakalyo.

⁸Nĩkwa ekihugo nĩ kyʼembangĩ, Nʼomundu owʼerĩsĩkĩbwa ĩkere mukyo.

⁹Wabirihiga abakwakalĩ butsira kindu, Nʼamaka wʼesyongũbĩ abĩrĩbũnangwa.

¹⁰Busana nʼekyo ebitego bĩkũtĩmbĩreko, Nʼobuba bo lũba-lũba bukakuha, obuba.

¹¹Kutse omwĩrĩmya, iwataluka erilangira, Nʼamagetsi mangi akakũkũnĩngĩra.

¹²Nyamuhanga siali endata elubula kwehĩ? Lebaya nibya esyongũnũnũ esiri hali, ngoko siri endata kutsibu!

¹³Nawe ũkabũga uti, Nyamuhanga asĩkĩ kwehĩ? Anganatoka eritswera omo mwĩrĩmya munene kwehĩ?

¹⁴Ebĩtũ ebĩbĩmbĩre ni hʼerĩbĩsama busana naye, kikaleka iniatalangira; Naye akalendera omo mũtĩmbo wʼekyanya.

¹⁵Wanzĩre erilaba omo nzira ya kera Eyo ababi balabamo kwehĩ?

¹⁶Abapũrawa embere wʼomugulu wabo, Nʼekibanza kyabo kyasendĩbawa ngʼolũsĩ,

¹⁷Mobabwira Nyamuhanga bati, Ũtũlũĩreho; NʼOmũtokĩ Wʼebyosĩ angakola bokĩ kwehĩ?

¹⁸Nĩkwa mũsũlya amanyũmba wabo nʼebindu bibuya. Nĩkwa erihana lyʼababi liri hali kwĩngye.

¹⁹Abatunganene bakasamalirakyo ibatsema; Nʼabate ko musango bakasekererayabo.

²⁰Bati, Kwenene esyonzĩgũ syetu syabiritindwa, Nʼebindu byabo, omuliro abiribugabo.

²¹Ũyĩbegeraye kwiye, ubye nʼobuholo, Umwʼekyo obubuya bwasyakũhĩkako.

²²Kĩsĩ-kĩsĩ nyiti wangirire erĩkangĩrĩrya omo buno buwe. Ubike ebĩnywa biwe omo mutima wawe.

²³Wamasuba oko Mũtokĩ Wʼebyosĩ, wasyahĩmbwa, Wamahigira hali ebitatunganene oko hema yawe.

²⁴Kandi ũhĩre esyamagetsi syawe omo lũtũtũ, Nʼesyamagetsi syʼeOfĩrĩ ũhĩresyo omo mabwe wʼehyũsĩ;

²⁵NʼOmũtokĩ Wʼebyosĩ asyabya esyamagetsi syawe, Nʼebĩtsĩpa byʼobũgũlĩ bunene busana nawe.

²⁶Kusangwa wasyatsema omwisi wʼOmũtokĩ Wʼebyosĩ, Nʼerisumbira Nyamuhanga obũsũ bwawe.

²⁷Wasyamusaba naye asyakowa; Nawe wasyaliha esyondagano syawe.

²⁸Nibya wasyahamula omwatsi, nago ĩnĩahanganĩbwa busana nawe; Nʼekyakakala kyasyakolerya omo nzira syawe.

²⁹Omugulu basyakũkĩnda ahisi, wasyabũga uti, Ngandihangana, Kandi asyalamya oyũkayĩkehaya.

³⁰Asyalamya oyute ko musango; Ega, asyalamĩbwa omo bubuya bwʼebyala byawe.