Read nande Yobũ 24 Bible Online

Yobũ 24 - nande bible

Yobũ 24

¹Busana nakĩ emigulu sĩbĩkĩrwe nʼOmũtokĩ Wʼebyosĩ kwehĩ? Kandi busana nakĩ abamwasĩ sibelola oko biro biwe kwehĩ?

²Hali abakalũsaya ebiminyikalo byʼemitano; Abakahamba ebihangulo nʼeriryabyo.

³Bakabinga nʼeritwala esyopunda syʼesyongũbĩ; Bakahamba enume yʼende yʼomũkwakalĩ eribya mutsimbo.

⁴Bakakũna ogʼobwaga yʼomo nzira; Bakaleka abera bʼekihugo abosĩ ĩbayayĩbĩsa.

⁵Lebaya, ngʼesyopunda syʼomolĩ omo mbwarara. Bakaya erisonda-sondya omo myatsi yabo busana nʼakalyo; Ngʼakalyo busana nʼabana babo omo mbwarara.

⁶Bakagesa akalyo kabo omolĩ; Kandi bakabota-bota emĩsĩgalira yʼebĩnyũ byʼababi.

⁷Bakagotsera ndũmbũ omo kiro kyosĩ butsira esyongimba, Isibawite ekyʼeriyiswika busana nʼembeho.

⁸Batsapĩre busana nʼembũla yʼebitwa, Bakegemera okwʼĩbwe busana nʼeribula obũgamo.

⁹Abandi bakapũra esyongũbĩ oko mahere, Bakĩmaya omuwato oko bera;

¹⁰Bakaleka abera ibalendera ndũmbũ butsira lukimba, Kandi bakanyega emiganda oko bandu bʼenzala.

¹¹Bakakokotaya amagũta omo mbĩmbo syʼabandu aba; Bakakama ebĩnyũ ĩbanemũkwa enyota.

¹²Abandu bakasĩmba omo mũyĩ. Nʼomutima wʼabakahutala akalaka. Nĩkwa Nyamuhanga sialilangira obũkĩrũ.

¹³Abandi bali oko bakahona oko kyakakala; Sĩbasĩ esyonzira syakyo. Kutse sĩbalĩkala omo nzira syakyo.

¹⁴Omwĩtĩ akabuka bukakya; Akĩta omwera nʼogʼobwaga, Nʼomo kiro nĩ mũrahĩ.

¹⁵Erĩso lyʼomũsĩngĩrĩ likalinda bwaranda-randa, Akabũga ati, Sihali erĩso lyasyanyilolako. Kandi akahindula obũsũ buwe.

¹⁶Bakatula enyũmba omo mwĩrĩmya, Bakayikingira omo musibo; Sĩbasĩ ekyakakala.

¹⁷Kusangwa engyakya-ngyakya ni nguma nʼomwĩrĩmya wʼomũhĩndanĩa busana naye, Kusangwa akaminya erĩũbahya lyʼomũhĩndanĩa.

¹⁸Omundu mubi akahekawa nʼamagetsi mangi; Erĩgabo lyabo lyabiritakirwa na Nyamuhanga. Siakigenda omo mũbĩrĩ omo malima wuwe wʼebĩnyũ.

¹⁹Ngoko enzururu ikahwa omo kĩhũhanĩ nʼobugoma, Litya omukola-nabi akahwa omo kihugo kyʼeKũlĩmũ atya.

²⁰Nyĩnya asyamwibirirwa; Emihuka yasyamulya nʼerisihirwa; Siendisyaswibukwa kandi; Nʼebitatunganene byasyabũnangwa ngʼomuti.

²¹Akatsandaya omugumba oyutebuta, Kandi sialikolera omũkwakalĩ yo kibuya.

²²Nĩkwa Nyamuhanga akaheraya esyombangĩ omo maka wuwe. Akakola nʼomundu mubi akahola.

²³Nyamuhanga akahabo eribya nʼobuholo, ibabyaho. Nʼameso wuwe ali oko nzira syabo.

²⁴Bakahamĩbawa, omo mugulu muke, neryo bakahwaho; Kandi bakakehĩbawa, neryo ibuma ngʼebiti;

²⁵Kandi kite kitya lino, nindi wasyanyĩkangya mo mũbehĩ, kwehĩ? Nʼeriyira erĩbũga lyage mo buyira kwehĩ?