Read nande Yobũ 29 Bible Online

Yobũ 29 - nande bible

Yobũ 29

¹Kandi Yobũ mwagusa omũsyo wuwe, ati,

²Kumbe nabere ngoko nabya oko mikera ya kera, Omo biro omugulu Nyamuhanga anyĩtegaya;

³Omugulu etala yiwe yakoleraya oko mutwe wage, Monalendera nʼeritwangana omo mwĩrĩmya busana nʼekyakakala kiwe;

⁴Ngoko nabya oko biro byʼamaka wage, Omugulu obwĩra bwa Nyamuhanga bwabya oko hema yage;

⁵Omugulu Omũtokĩ Wʼebyosĩ abya akine haguma nage, Nʼabana bage ĩbakĩnanyĩtĩmbĩreko;

⁶Omugulu eribasula lyage lyalaba omo magũta wʼende, Nʼerĩbwe molyanyũtũlĩra esyonyũsĩ syʼamagũta wʼemĩzeĩtũnĩ!

⁷Omugulu nahuluka ngaya oko lũkyo lʼoko mũyĩ, Omugulu nĩkala omo kĩtũmbĩ kyage kyʼomo kibuga.

⁸Abalwana banyilolako mobabĩsama, Nʼabasyakulu mobahangana;

⁹Nʼabanya-mwami mobabya bũkũtũ, Nʼerĩhĩra ebyala byabo oko buno bwabo; Omulenge wʼabakama mwahunera,

¹⁰Nʼolulimi lwabo molwamakirira oko kyasasa kyʼobuno bwabo.

¹¹Kusangwa omugulu okũtũ kwanyowa mokwanyitsumula; Omugulu erĩso lyanyilolako, mobatũlago busana nage.

¹²Kusangwa nalamaya abera abalaka erĩwatĩkĩbwa, Nʼengũbĩ eyitabya nʼomundu wʼerĩwatĩkyayo.

¹³Omũyĩsa wʼoyũkĩsĩya iniahola mwambĩkako; Kandi monaleka omutima wʼomũkwakalĩ eriimba busana nʼobutseme.

¹⁴Monayambalya eritunganene, nalyo molyanyiswika. Erĩbanza lyage molyabya ngʼekanzu nʼembĩta.

¹⁵Monabya meso busana nʼesyondĩma-tĩme, Kandi nabya bisando busana nʼekirema.

¹⁶Monabya ĩse oko bʼobwaga, Monasonda-sonda omwatsi wʼoyo ndasĩ.

¹⁷Monatulanga ebiseya byʼabatatunganene, Monapũra obuhiyi omo meno wuwe.

¹⁸Neryo monabũga nyiti, Nasyaholera eka wage, Kandi nasyakanyĩrĩrya ebiro byage ngʼemisege.

¹⁹Nabya ngʼomuti owayisanza erĩhĩka oko magetsi, Nʼekimi mokyabya oko mitahi yage omo kiro kyosĩ.

²⁰Olukengerwa lwage ni luhya-luhya omwisi wage, Nʼobuta bwage bukayirawa mo buhya-buhya omo byala byage.

²¹Abandu mobanyitegera matwĩ, omugulu nahanabo, Mobahulikirira ndeke ebyo nabũga.

²²Enyũma wʼebĩnywa byage mobataswabũga; Nʼerĩbũga lyage molyawa kubo ngʼerĩtogongya lyʼembũla.

²³Mobandinda ngʼembũla; Mobasanzula obuno bwabo kutsibu busana nʼembũla.

²⁴Monakangarara omugulu batawite erĩkĩrĩrya, Nʼerisweka lyabo molĩtanyĩta.

²⁵Monayisoga enzira busana nabo, monĩkala ngʼomukulu, Monĩkala ngʼOmwami omo milondo, yʼabasĩrĩkanĩ, Monakĩranĩabo omugulu basweka.