Read nande Yobũ 30 Bible Online

Yobũ 30 - nande bible

Yobũ 30

¹Nĩkwa lino abalere kwĩngye bakanyiseka, Abotata wabo, monapona erĩhĩrabo haguma nʼesyombwa syage erĩteya ekĩhyo kyage.

²Ega, amaka wʼebyala byabo anganyigasirakĩ kwehĩ? Kusangwa amaka wabo iniabirihwa.

³Babondĩre busana nʼeribula ebindu nʼenzala; Bakabetaya ekitaka kyũmĩre omo kiro omo kĩma nʼomulala.

⁴Bakakula ebiti byʼomũnyũ omo kisaka, Nʼemĩrĩhĩ yʼobuhemba ni kalyo kabo.

⁵Bakahiga-higawa omo katĩkatĩ kʼabandu; Bakũtawa kwʼobogo ngʼenyũma wʼomũrahĩ;

⁶Busana nʼekyo bĩkere omo misya yʼerĩũbahya, Omo byũna byʼomo kitaka nʼebyʼamabwe.

⁷Bakamira omo bisaka; Bahĩndene haguma omwisi wʼekyatsinge.

⁸Ibo ni bana bʼabakĩrũ, ega, ni bandu batya-batya sibawite amena; Bamahiwa omo mĩnyambya erĩlũa omo kihugo.

⁹Na lino namabibya olwimbo lwabo, Ega, indi mũsyo busana nabo.

¹⁰Bakanyĩkwa nye, bakahangana hali kwĩngye, Sibaliubaha erĩtwĩra ebitande oko bũsũ bwage.

¹¹Kusangwa abĩrĩkũndũla olukoba lwʼomutwe wʼenyama nʼerĩnyagalya; Kandi bakagusa olukoba lwʼomutwe wʼenyama embere syage.

¹²Abandu batya-batya bakahangana nʼerinyibambira; Bakakũna ebisando byage emũsĩke nʼerisonda erĩnyĩta.

¹³Bakatsandaya enzira yage, Bakakanyaya erĩkwa lyage, Sihali oyũkakakĩrayabo.

¹⁴Bakasa ngʼomo kyũna kinene omo lũhĩmbo, Omo katĩkatĩ kʼekihunga bakayĩkũmbagalaya.

¹⁵Eryũbahya likanyiwako; Bakakwamirira erĩsĩkya lyage ngʼerihunga; Nʼomũyĩsa wage akalaba ngʼekĩtũ.

¹⁶Na lino nyĩkĩsĩya inahola; Ebiro byʼobũlĩge byabirinyihamba.

¹⁷Omo mugulu wʼekiro amakũha wage gosĩ akaluma, Nʼamalĩge akanyikorogota, sialihumula.

¹⁸Busana nʼamaka manene wa Nyamuhanga, Olukimba lwage lwamahengema; Lukanyiboha ngʼebĩkya byʼerĩkotĩ lyage.

¹⁹Abirinyigusa omo londo, Nabiribya ngʼolũtũtũ nʼerĩbũ.

²⁰Ngakulakira, nawe sũlĩnyĩsũbĩraya. Ngahangana, nawe ukanyipona.

²¹Wabiribinduka erinyitsatsuhirako; Omo maka wʼebyala byawe ũkanyagalaya.

²²Ukanyisumbira okwʼihunga, ũkanyĩgendaya kulyo; Ũkanyĩhwerekereraya omo kihunga.

²³Kusangwa nyĩnasĩ ko wasyanyireta oko luholo, Nʼoko nyũmba yʼerĩhĩndana busana nʼabandu abaliho bosĩ.

²⁴Nĩkwa omundu sialisumba ebyala biwe omo kilundo kyʼekĩma kwehĩ? Kutse omwʼĩkwa liwe sialilaka erĩwatĩkĩbwa kwehĩ?

²⁵Mondalira busana nʼoyo wabya omo bũlĩge kwehĩ? Nʼekĩrĩmũ kyage mokitagalwa busana nʼogʼobwaga kwehĩ?

²⁶Omugulu nayiketera ekibuya, neryo ebibi mobyahĩka; Omugulu nalindirira ekyakakala, omwĩrĩmya mwahĩka.

²⁷Omutima wage akagalawa, sinditoka erihumula; Ebiro byʼobũlĩge byabĩrĩmbĩkako.

²⁸Ngagenda inyinemulira isihali erĩkĩranĩa, Ngahangana omo ndeko, nʼerilaka busana nʼerĩwatĩkĩbwa.

²⁹Ĩngye indi mugala wabo esyoboha, Na mũlĩkyabo esyombũnĩ.

³⁰Engoba yage ĩkakĩna, Nʼamakũha wage akahĩsĩbawa omo kĩhũhanĩ.

³¹Busana nʼekyo enanga yage yabiribinduka mo kiriro, Nʼerĩrenga lyage mo mulenge wʼabandu bakalira.