Read nande Yobũ 38 Bible Online

Yobũ 38 - nande bible

Yobũ 38

¹Neryo Omwami Mukulu mwasũbĩrya, Yobũ yʼomo kanyabungu ati,

²Uwendi uti ukapona amenge wage kwehĩ? Omo bĩnywa ebite nʼamenge kwehĩ?

³Lino watahangana ngʼomulume; Kusangwa ngandĩkũbũlya, nawe umbwire.

⁴Wabyahi omugulu nahala ebibanza byʼekihugo kwehĩ? Ego, umbwire, wamabya uwite obũlengekanĩa.

⁵Kusangwa ũnasĩ, nindi yo wahĩra olulengo lwakyo kwehĩ? Kutse nindi walambika omũlĩkĩ wʼerirenga go kukyo kwehĩ?

⁶Ebibanza byakyo byatakulirirawa ũkũkĩ kwehĩ? Kutse nindi yo wahĩra erĩbwe lyʼengonde yʼekihugo,

⁷Omugulu esyongũnũnũ syʼengyakya-ngyakya syimbira haguma, Nʼabagala bosĩ ba Nyamuhanga mobũta obogo busana nʼobutseme.

⁸Kutse nindi yo wakingira engetsi yʼesyonyũyĩ, Omugulu yahuluka ĩkalũa omo kĩsũko kyʼekihugo kwehĩ?

⁹Nʼĩngye nahangika ekĩtũ mo lukimba lwakyo, Monalĩngĩrakyo nʼomwĩrĩmya owalĩtohĩre.

¹⁰Monahĩra Omutano busana nʼengetsi, Monabikayo enyũma wʼesyongyo sĩkĩngĩre.

¹¹Neryo monabũga nyiti, Wanamatahĩka hano, nĩkwa siwendilabaho; Na hano ebisunda byawe byʼamaka byasyatwĩrya.

¹²Yobũ, aho ebiro byawe byatsũkĩra. Wabirihamula erikya lyʼekiro kwehĩ?

¹³Wabirihamula omwĩtsange erihamba ekihugo, Nʼerikungutira ababi omo myanya yabo yʼerĩbĩsamamo kwehĩ?

¹⁴Ekyakakala kikaleka ebitwa nʼemisya ibyaminyikala, Ngʼemĩkũnyo yʼolukimba.

¹⁵Ekyakakala kyʼomusibo kĩkalĩba-lĩbanaya ababi, Kikaleka ibatakola omwaga.

¹⁶Wabiriingira omo syongũnũnũko syʼengetsi kwehĩ? Kutse wabirirenderera omo mitobero eyʼemirindi kwehĩ?

¹⁷Hane mundu oyo wakũkangaya esyongyo esĩkategaya, Ekihugo kĩkĩnĩre kyʼabaholĩ kwehĩ?

¹⁸Wanganaminya obunene bwʼekihugo kwehĩ? Unyibwire, wamabya ũnasĩ ebyosĩ ebĩ.

¹⁹Ũnasĩ enzira eyikaya eyo ekyakakala kĩkere kwehĩ? Nʼomwĩrĩmya, omwanya wago ali hahi kwehĩ?

²⁰Wanganatwalago oko mwanya wago, Kandi uti wangaminya enzira eyikaya oko nyũmba yago kwehĩ?

²¹Ũnasĩ kusangwa wabutawa oko mugulu oyo, Nʼemiganzo yʼebiro byawe ni mingi!

²²Wabiringira omo syombĩso syʼenzururu kwehĩ? Kutse wabirilangira esyombĩso syʼamatsuku kwehĩ?

²³Ago nabiribika busana nʼomugulu wʼobũlĩge, Busana nʼekiro kyʼamalwa nʼerilwa.

²⁴Ekyakakala kikagabirawa omo nzira yahi kwehĩ? Kutse erihunga lyʼendata, likapanzirawa liti omo kihugo kwehĩ?

²⁵Nindi watula omugende busana nʼeribwaga lyʼamagetsi kwehĩ? Kutse nindi abiritula enzira yʼerĩpalya lyʼomũlũmo kwehĩ?

²⁶Nindi akaleka embũla iyawa oko kitaka ekite ko bandu; Kutse omo mbwarara eyite mo mundu;

²⁷Nindi yũkũgũtaya ekitaka ekyũmĩre, ekĩkakwa enyota, Nʼerĩlasya ebiti birere birere kwehĩ?

²⁸Kwe mbũla nʼekimi biwite ĩse wabyo kwehĩ?

²⁹Amagetsi wʼeritsuku awamatikene, nʼeritsuku oko biti. Nyĩnya wabyo nindi kwehĩ?

³⁰Amagetsi akamatikana ngʼerĩbwe, Nʼengetsi ikamatikana omwʼitsuku.

³¹Wanganaboha ekĩkũto kyEsyongũnũnũ sirinda syʼeKĩlĩmĩa kwehĩ? Kutse erĩkũndũla emĩrĩkĩ yʼesyongũnũnũ ĩsatu syʼeOrĩonĩ?

³²Wanganatoka erisondola esyongũnũnũ omo birimo byasyo kwehĩ? Kutse erisondola Olũtehĩ Lunene nʼOlũtehĩ Luke kwehĩ?

³³Ũnasĩ ebihano ebikatabala byʼomo kyanya kwehĩ? Wanganatoka erĩhanganĩa eritabala lyakyo muna-kihugo kwehĩ?

³⁴Wanganatoka erisumba omulenge wawe erĩhĩka oko bĩtũ Nʼerireka ĩbyakũtsapya omo mbũla kwehĩ?

³⁵Wanganatoka erituma emĩrabyo yʼerĩpalya, nayo iyagenda, Iyakubwira iti, Ĩtwe tune hano, kwehĩ?

³⁶Nindi yo wahĩra amenge omo mutima wʼomwisi kwehĩ? Kutse nindi yo waha eriminya oko bũlengekanĩa kwehĩ?

³⁷Nindi yuwite amenge awangaganza ebĩtũ kwehĩ? Kutse nindi wangatoka erĩũta amatambya wʼamagetsi wʼembũla gʼomo kyanya kwehĩ?

³⁸Omugulu olũtũtũ lukakanya nʼebirongwe bikakala kwehĩ?

³⁹Ukabanira esyondale syʼakalyo kwehĩ? Kutse erihimbula ebyana byʼendale byʼoko nzala kwehĩ?

⁴⁰Omugulu sĩbũndamĩre omo byũna byasyo, Nʼeririnda omo myangalũ yasyo kwehĩ?

⁴¹Nindi yukasondera ekikororo kyʼebyʼerirya Omugulu ebyana byakyo bikalakira Nyamuhanga, Nʼerirereta busana nʼeribula akalyo kwehĩ?