Read nande Yobũ 4 Bible Online

Yobũ 4 - nande bible

Yobũ 4

¹Neryo Elĩfasĩ Omũtemanĩ mwasũbĩrya ati,

²Omundu amalenga erĩkanĩa nawe, iwagalirwa kwehĩ? Nĩkwa nindi wangatoka erĩyĩkakĩrya okwʼĩbũga kwehĩ?

³Lebaya, wabĩrĩkangĩrĩrya bandu bangi, Kandi wabĩrĩsĩkya ebyala byolo.

⁴Ebĩnywa byawe byabĩrĩhanganĩa oyo wabya akawa, Kandi wabĩrĩsĩkya amarwĩ awakakonongoka

⁵Nĩkwa lino bĩkakũhĩkako, inukaluha; Bĩkakũtũlako, nawe ukasweka.

⁶Eriubaha lya Nyamuhanga si rye riyiketera lyawe kwehĩ? Nʼebitunganene byʼesyonzira syawe si maha wawe kwehĩ?

⁷Wibuke, nindi wahera isialitakola nabi kwehĩ? Kutse abatunganene mobaherĩbwa mugulu wahi kwehĩ?

⁸Ngoko nabirilangira, abakalima ebibi, Nʼabakabiba omwaga, byo bakanagesa.

⁹Busana nʼomuka wa Nyamuhanga bakahera, Na busana nʼekihunga kyʼerihitana liwe bakahwa.

¹⁰Ababi bakaruruma ngʼendale, nʼerikarama, Nĩkwa Nyamuhanga akalĩmayabo nʼerĩtwa ameno wabo.

¹¹Endale ngulu ikahola busana nʼeribula obuhiyi, Nʼehyana hyayo hikapanzikana.

¹²Nĩkwa nombomberĩbawa omwatsi, Nʼokũtũ kwage mokowa ebihwehwe byago.

¹³Omo malengekanĩa awakalĩre awahuluka omo nzolĩ syʼekiro, Omugulu otũgotserĩ tunene tũkahĩka oko bandu,

¹⁴Obuba mobwanyĩhĩkako, nʼerititimana, Ebyatĩtĩmanaya amakũha wage gosĩ.

¹⁵Neryo omuka mwalaba embere wʼobũsũ bwage; Nʼobweya bwʼoko mubiri wage mobwayihanda.

¹⁶Monalangira ekindu kihangeneho, Nĩkwa mondatoka eriminya erisosa lyakyo; Ekyũtsũtsũ kyabya embere wʼameso wage. Mohahita esĩsyerere, kandi monowa omulenge, ati,

¹⁷Ko mundu asyatunganana omo meso wa Nyamuhanga kwehĩ? Nʼomundu asyabya mubuya omo meso wʼOmũhangĩkĩ wuwe kwehĩ.

¹⁸Nyamuhanga sialiyiketera abagombe buwe; Akanahandikirira abamalaĩka buwe oluhabo:

¹⁹Si kwilaba aho akahandikirira abo ahangika omwʼibumba, Ekindu kyʼolũtũtũ, Abakahĩnolawa ngʼakanyurugunzu!

²⁰Omundu akabyaho engyakya, nʼerĩgolo-golo iniahola, Isihali mundu oyukaminya.

²¹Ebyosĩ awite bikahekawa, Akahola, isiawite menge.