Read nande Yobũ 40 Bible Online

Yobũ 40 - nande bible

Yobũ 40

¹Kandi Omwami Mukulu mwasũbĩrya Yobũ, ati,

²Ko yukasonda oluhabo asyakuba buhaka nʼOmũtokĩ Wʼebyosĩ kwehĩ? Nʼoyukagaya Nyamuhanga, amũsũbĩraye.

³Neryo Yobũ mwasũbĩrya Omwami Mukulu ati,

⁴Lebaya, ĩngye indi katya-katya; Ngandĩkũsũbĩryakĩ kwehĩ? Nabiriyiwata oko buno.

⁵Nabĩrĩbũga ngendo nguma, sĩndĩendĩsyasũbĩrya; Ega, kabiri, nĩkwa sĩndĩendĩlabyaho.

⁶Neryo Omwami Mukulu mwasũbĩrya Yobũ omo kanyabungu, ati,

⁷Uhangane lino ngʼomulume. Ngandĩkũbũlya, nawe unyibwire.

⁸Nawe wasyatwa mo buyira eritswera lyage kwehĩ? Ukandinyitswera lubi, iwaminya eribya nʼerĩbanza kwehĩ?

⁹Kutse Unawite okuboko kungana nʼokwa Nyamuhanga kwehĩ? Wanganatoka erĩlũmya nʼomulenge ngʼowuwe kwehĩ?

¹⁰Ũyambalaye lino omo bubuya nʼobukulu; Uyisitike nʼerĩsĩkya nʼerĩkenganĩa.

¹¹Ũsandũlaye eribwaga lyʼerihitana lyawe; Usamalire obuli mundu oyukayiheka ũmũkehaye.

¹²Usamalire obuli mundu oyukayiheka ũmũkehaye ahisi; Kandi ulyatangirire ababi bʼahisi aho bimene.

¹³Ũbĩsebo haguma omo lũtũtũ; Ubohebo omo kihugo kyʼabaholĩ.

¹⁴Oko mugulu oyo nasyakupipa nyiti, Ebyala byawe byʼamali ko byangakũlamya.

¹⁵Lebaya lino eyĩsere yo nahangika nga we; Ikalya ebiti ngʼende.

¹⁶Lebaya lino, amaka wayo ali omo mbindi yayo, Nʼakagala kayo kali omo mĩsĩsa yʼenda yayo.

¹⁷Ĩkahanganaya omukira wayo ngʼomuti wʼomũerezĩ Emĩkĩ eyikalaba oko ndungu syayo ikabohana haguma.

¹⁸Amakũha wayo ali ngʼemiseke yʼemiringa, Nʼamakũha wayo ali ngʼesyongomo syʼekyuma.

¹⁹Kyo kihangiko kyʼeriswekera kya Nyamuhanga. Oyo wahangikayo yo wangatoka erĩkĩndayo.

²⁰Kwenene ebitwa bikaleterayo ekyʼerirya, Esyonyama syosĩ syʼomolĩ sikatsangirayo.

²¹Ikagotsera omo ndĩna yʼemiti yʼebyũtsũtsũ, Omo bũbĩsamo bwʼebihembo-hembo, nʼomo lĩsesa.

²²Emiti yʼebyũtsũtsũ yikaswikayo omo kyũtsũtsũ kyayo; Emĩerezĩ yʼolũsĩ yĩkatĩmba kuyo.

²³Olũsĩ nomo lwangabwaga, sirititimana; Nomo eYorodanĩ yangũsũla erĩhĩka oko mikyingyi yalo, iyo ĩnasĩkĩre.

²⁴Hali mundu wangahambayo iniakinalolĩre kwehĩ? Kutse eritsimita enĩndo yayo omo kitego kwehĩ?