Read nande Yobũ 41 Bible Online

Yobũ 41 - nande bible

Yobũ 41

¹Wanganatoka erisoha amamba omo burobo kwehĩ? Kutse erĩyamatanĩa olulimi lwago omo lukoba kwehĩ?

²Wanganatoka erĩseserya omũlĩkĩ omo nĩndo yago kwehĩ? Kutse eritsimita oluseya lwayo lʼomo burobo kwehĩ?

³Anganatoka erikulakira kwehĩ? Kutse erikubwira ebĩnywa bihehere kwehĩ?

⁴Anganalagana nawe endagano kwehĩ? Wanganamwĩmya mo mũsũbĩ wawe kera na kera kwehĩ?

⁵Wangatsanga haguma nago ngʼenyonyũ kwehĩ? Kutse wanganaboherago abana-bato bawe kwehĩ?

⁶Ekihanda kyʼabatsũrũsya kyanganatũndyago kwehĩ? Basyagabago omo katĩkatĩ kʼabakagula kwehĩ?

⁷Wanganũsũlya ekihu kyago mwʼebyuma byʼamarobo, Kutse oko mutwe wago kwʼamatũmo wʼeritsimita amahere kwehĩ?

⁸Ũtũlaye kugo kwʼebyala byawe isiwendisyaswakola utya kandi; Wibuke amalwa ayo siwendisyasubira.

⁹Oyukalangira amamba, Akabula amaha, iniawa oko kitaka.

¹⁰Sihali oyũkalĩre kutsibu oyukalenga erĩbũkyago; Neryo nindi oyo wangatoka erihangana embere syago kwehĩ?

¹¹Ko nindi wangamba kindu, ati nyĩmũtũhe kwehĩ? Ebiri eyĩkwa oko bũtũkũ ebyosĩ ni byage.

¹²Uleke ngakubwire busana nʼemihimbi yago, Kutse amaka manene wago, kutse emisosere yʼomũbĩmba wago mibuya.

¹³Nindi wangambula ebyambalo byago byʼeyĩhya kwehĩ? Nindi wangahĩka omo miseya yago kwehĩ?

¹⁴Nindi wangalĩbũla emikese yago kwehĩ? Ameno wago nĩ wʼerĩũbahya.

¹⁵Ebikora byago bĩkala-kalĩre ni byʼeriyihalambamo byago, Ebitondekene nʼeribohana haguma.

¹⁶Bisubukene hakũhĩ, Kikaleka omuka iniatalaba mubyo.

¹⁷Bĩsobengekenĩe haguma; Byamatene haguma ibitatoka erigabulwa.

¹⁸Esyotsĩhya syago sĩkakangabasanaya ekyakakala, Nʼameso wago akahenaya ngʼeryuba lyʼengyakya.

¹⁹Ebisosomole ebikaka bĩkalũa omo buno bwago, Nʼamasalalĩ wʼomuliro akagulukamo.

²⁰Omo mihuli yago mũkatũmba omũkĩ, Ngʼakalũa omo nyungu ikabera nʼerĩsesa erikahya.

²¹Omuka wago akokaya amakala, Nʼekirimi kyʼomuliro kĩkalũa omo buno bwago.

²²Omo bĩkya byago mo muli amaka, Nʼomutima akahũka-hũka embere syago.

²³Ehikora hyʼomubiri wago hyamatene haguma. Hĩsĩkĩre kugo sihyetoka erĩsegaseganĩbwa.

²⁴Omutima wago akalĩre ngʼerĩbwe; Ega, akalĩre ngʼoluso.

²⁵Omugulu akĩmũka, esyombangĩ sikubaha, Busana nʼerĩsĩsĩrĩbwa, emitima yabo yĩkahahũka.

²⁶Omundu amabandago omo mũyalĩ, akabasuka; Nomo lyangabya erĩtũmo, kutse eritera, kutse omusoro asongĩre.

²⁷Akaganza ebyuma ngʼebiti, Nʼomulinga akaganzago ngʼomuti ahondĩre.

²⁸Omusoha sĩalĩsagayago; Amabwe gʼomo kahomeko akahinduka kugo ngʼesyombuba.

²⁹Emĩgo ikaganzawa ngʼesyongesera; Nago akaseka obũrũndĩ bwʼerĩtũmo.

³⁰Ebihande byago byʼoko nda biri ngʼebiyo bĩgũsũngwĩre. Akayisanza oko byondo ngʼomuti wʼerigesa engano.

³¹Akaberaya emirindi ngʼenyungu; Akahindula engetsi eribera ngʼamagũta wʼakalega.

³²Akasũga enzira eyĩkangabasenĩe enyũma wago; Omundu anganaganĩrya emirindi ikabya nʼembwĩ.

³³Muna-kihugo sihali ekiringene nago, Ekyahangikawa butsira buba.

³⁴Akasamalira obuli nyama eyikayihalamba; Iyo ni mwami oko syonyama syosĩ syʼomolĩ.