Read nande Yobũ 42 Bible Online

Yobũ 42 - nande bible

Yobũ 42

¹Neryo Yobũ mwasũbĩrya Omwami Mukulu, ati,

²Nyĩnasĩ kʼukatoka erikola emyatsi yosĩ, Isihali ebyo ũkandayĩrĩre ekikandisyakũbĩbwa.

³Ũkabũlaya nga ngapona amenge wawe omugulu ndasĩ kindu kwehĩ? Monakanĩa emyatsi eyo ndabya nyasĩ, Emyatsi yʼeriswekera eyĩndengĩreko eyo ndabya nyasĩ.

⁴Mowambwira uti, nyihulikirire omugulu ũkabũga Nʼerĩsũbĩrya ebyo wabũlaya.

⁵Oko mugulu oyo naminya ebyo abandi bambwira; Nĩkwa lino erĩso lyage likakulolako.

⁶Busana nʼekyo namaleka ebyosĩ ebyo; Namayiswekera omo lũtũtũ nʼomwʼĩbũ.

⁷Neryo Omwami Mukulu abere abibwira Yobũ ebĩnywa ebĩ, neryo Omwami Mukulu mwabwira Elĩfasĩ Omũtemanĩ ati, Erihitana lyage lyamakugulumirako, nʼerigulumira oko bĩra bawe babiri, kusangwa sĩmwetabũga mwatsi owatunganene, ngoko mugombe wage Yobũ abĩrĩbũga.

⁸Na lino, mũyĩsonderaye esyonume syʼesyonde sirinda, nʼesyombangale sirinda, mugende eyiri omugombe wage Yobũ, muyihongere obuhere bwʼerĩokererya; nʼomugombe wage Yobũ asyabasabira. Kusangwa iye yo nyĩrĩgĩre, ngasyabakolera ngʼobũkĩrũ bwenyũ ko buli. Kusangwa simwetanyahula omo kitunganene ngʼomugombe wage Yobũ kwʼabũga.

⁹Neryo Elĩfasĩ Omũtemanĩ, na Bĩldadĩ Omũsũhĩ na Sofarĩ Omũnamatĩ, mobagenda, mobakola ngoko Mwami Mukulu abwirabo; neryo Omwami Mukulu mwalĩga Yobũ.

¹⁰Neryo Omwami Mukulu mwasũbũlya omũyĩsa wa Yobũ, omugulu asabĩra abĩra buwe; neryo Omwami Mukulu mwaha Yobũ yo kabiri kwilaba ebyo abya awite erĩmbere.

¹¹Neryo abagala babo nʼabali babo bosĩ mobamũhĩkako, nʼabosĩ ababya baminyene naye erĩmbere, mobalya haguma naye omo nyũmba yiwe. Mobamũsĩkya, nʼerĩmũkĩranĩa busana nʼamaligo gosĩ ago Mwami Mukulu amuletera. Obuli mundu mwamuha erĩgabo lyʼekĩtsĩpa nʼobuli mundu mwamuha embũka yʼesyamagetsi.

¹²Litya Omwami Mukulu mwatsumula ebiro ebyo byʼenyũma bya Yobũ, kwilaba ebiro byʼerĩtsũka liwe. Kandi mwabya nʼesyombũlĩ elfu ĩkumĩ nʼĩnĩ, nʼesyongamia elfu ndatu, nʼesyonume syʼesyonde syʼoko ngomo elfu ĩbĩrĩ, nʼesyopunda syʼobũkalĩ elfu nguma.

¹³Kandi mwabya nʼabagala balinda nʼabali basatu.

¹⁴Neryo mwahula Akanyere kuwe mo Yemĩma, na Kabĩra mwamwahula mo Kezĩa, na Kabũgo mwamwahula mo Kerena-hapũkĩ.

¹⁵Nʼomo kihugo kyosĩ mohatabanika abakalĩ babuya ngʼabali ba Yobũ; nʼĩse wabo mwahabo omwandu omo katĩkatĩ kʼabagala babo.

¹⁶Nʼenyũma wʼaho Yobũ mwabyaho emyaka erĩgana nʼamakũmĩ ani (140), mwalangira abagala buwe, nʼabagala bʼabitsikulu buwe erĩhĩka oko syondengo ĩnĩ.

¹⁷Neryo Yobũ mwahola, iniamabikula nʼeribuga ebiro bingi.