Read nande Yobũ 5 Bible Online

Yobũ 5 - nande bible

Yobũ 5

¹Tabirikira uwe Yobũ, hali oyũkakũsũbĩraya kwehĩ? Hali omũlaĩka oyo wasyakebera kwehĩ?

²Amaganĩryo akĩta omũkĩrũ Nʼerihitana lĩkĩta oyũtasĩ kindu.

³Nabirilangira abakĩrũ nga bawite buholo, Nĩkwa neryo-neryo monatakira erĩĩkala lyabo.

⁴Abana babo bali hali oko buholo, Omwʼĩbũgĩro, Sihali mundu oyukahanganirabo.

⁵Abandu bakwĩre enzala, bakalya akalyo kʼomũkĩrũ, Nʼengano eyikalasa omo mahwa Nʼabandu bakwĩre enyota, basyatsura obuteke buwe.

⁶Kusangwa obwagalĩ sibulilasa omo lũtũtũ, Kutse obũlĩge sibulilasa omo kitaka;

⁷Nĩkwa omundu akayiretera obũlĩge, Ngʼesyongulukira ko sikagulukira endata oko muliro.

⁸Nĩkwa ĩngye, nangasonda-sonda Nyamuhanga, Ngahĩra uku Nyamuhanga omwatsi wage;

⁹Oyukakola emyatsi mikulu eyitaminyawa, Ebitiko-tiko biwe ni binganabi.

¹⁰Oyukaha ekihugo kyʼembũla, Nʼerituma magetsi omo malima;

¹¹Inga, ni Nyamuhanga oyũkahanganaya, Nʼabakalira bakahanganĩbawa eribya nʼobuholo.

¹²Akalĩba-lĩbanaya esyombĩta syʼabatebya, Sibetoka erĩsĩngana.

¹³Nyamuhanga akahamba abʼamenge omo menge wabo mabi. Nʼerihana lyʼabʼamenge lĩkalĩbana lũba.

¹⁴Omo musibo bakahĩndana nʼomwĩrĩmya, Bakamata-mata omwʼitungi ngʼomo kiro.

¹⁵Nĩkwa Nyamuhanga akalamaya abera oko luholo, Kandi akalamaya abʼobwaga oko byala byʼembangĩ.

¹⁶Litya akaha abera bʼamaha, Kandi akahũnaya ababi.

¹⁷Lebaya, omundu oyo Nyamuhanga akakunga ali nʼobutseme. Neryo supone erikunga lyʼOmũtokĩ Wʼebyosĩ.

¹⁸Kusangwa Nyamuhanga akagalaya; kandi ĩnĩalamya, Ebyala biwe bikabanda, nʼebyala biwe ĩbyalamya.

¹⁹Asyakũlamya oko malĩge ngendo ndatu, Ega, nʼerikubika oko malĩge alinda, isihali ebibi byasyakũtũlako.

²⁰Oko mugulu wʼenzala asyakubika iwabyaho; Nʼomo malwa, asyakũtongolya oko luholo.

²¹Nyamuhanga akakũlamaya oko mabehĩ nʼeriregwa, Kandi akakũlamaya okwʼihera omugulu likasa.

²²Wasyaseka omwaga nʼomugulu wʼenzala, Kandi siwendisyubaha esyonyama syʼomolĩ.

²³Amalima wasyalima syendisyabanika mo mabwe; Nʼesyonyama syʼomolĩ sisyendisyakuluma.

²⁴Kandi Wasyĩkala omo hema yawe nʼobuholo, Kandi wasyayalebya esyombũlĩ syawe, isine mo buholo.

²⁵Wasyaminya nibya kwʼabana bawe basyabya bangi, Nʼabana bawe ngʼebiti byʼomolĩ.

²⁶Ngʼengano ikera omugulu wʼerigesa, Wasyahĩka oko bũsyakulu.

²⁷Lebaya, Yobũ, twabiriiga omwatsi oyũ iko bine bitya; Ni kwenene ũlĩgego.