Read nande Yobũ 7 Bible Online

Yobũ 7 - nande bible

Yobũ 7

¹Omundu siawite omugulu wuwe wʼerikola omo kihugo kwehĩ? Nʼebiro biwe Sibiri ngʼebiro byʼomũhĩngĩ kwehĩ?

²Ngʼomugombe kwʼakayĩtsũtsa ekyũtsũtsũ, Kandi ngʼomũhĩngĩ kwʼakalinda obũhĩngĩ buwe;

³Ko nage ngahabawa emikera yʼobũlĩge Nabĩrĩhĩrĩrwa kwʼebiro byʼobũlĩge.

⁴Omugulu ngagotsera ahisi, ngabũga nyiti, Nasyahangana mugulu wahi ibwakya kwehĩ? Nyoswĩre nʼeriyigusanga eyĩ nʼeyĩ erĩhĩka okwʼikya.

⁵Omubiri wage ambite emihuka nʼebĩkokyo byʼolũtũtũ; Omubiri wage abirikakamana, nʼeriswatulika.

⁶Ebiro byage bikanguha kwilaba omuhokolĩ gʼomũlandĩ, Bikalaba butsira maha.

⁷Wibuke kwʼengebe yage ni muka musa, Erĩso lyage siryendisyaswalola oko bibuya.

⁸Erĩso lyʼoyukanyisamalira siryendi-syaswanyilolako; Ameso wawe asyanyĩlolyako, nĩkwa isindiho.

⁹Ngʼekĩtũ ko kikapanzikana nʼerihwaho, Nʼoyukandagalira eKũlĩmũ sĩendĩsyaswalũamo.

¹⁰Siendisyaswasuba omo nyũmba yiwe, Kutse aho wuwe sihendisyaswamuminya.

¹¹Busana nʼekyo sĩndĩendĩkakĩrya obuno bwage; Ngandĩbũga omo bwagalĩ bwʼekĩrĩmũ kyage; Ngandiyitonga omo bukalihe bwʼekĩrĩmũ kyage.

¹²Indi ngetsi kutse indi nzoka nene yʼengetsi kwehĩ? Uti ũkanyĩtegaya.

¹³Omugulu ngabũga nyiti, Engyingo yage ĩkandĩnzĩkya omutima, Nyiti engotsero yage ĩkandĩkehya emiyitongo yage;

¹⁴Neryo ũkanyũbahaya omwʼilota, Ũkanyĩta obuyuyu omo nzolĩ.

¹⁵Omutima wage akayisoga erĩnĩgwa, Nʼeriyisoga oluholo kwilaba amagalĩ wage.

¹⁶Ngabonda; sindiendisyakota. Unyireke, kusangwa ebiro byage ni muka musa.

¹⁷Omundu nĩkĩ uti ũkamũhamaya kwehĩ? Uti wangamũhĩra ko mutima,

¹⁸Kandi uti wangayamubana omo ngyakya syosĩ, Nʼerimulengako obuli katambĩ.

¹⁹Wasyaleka erinyisamalira lyo mugulu wahi kwehĩ? Kutse eritanyireka inamera amatande wage kwehĩ?

²⁰Namabya nabĩrĩhalya, ĩnakũkolakĩ uwe mũteya wʼabandu kwehĩ? Busana nakĩ wabĩrĩnyĩhĩra omwʼirengerera lyawe kwehĩ? Kikaleka ĩnayĩrĩtohya.

²¹Busana nakĩ sulibuyira erĩlolo lyage nʼerĩlũsya ebibi byage? Kusangwa lino ngandigotsera omo lũtũtũ; Wasyanyĩsondya nʼomũhwa, nĩkwa isindiendisyabyaho.