Read nande Esyonyimbo 102 Bible Online

Esyonyimbo 102 - nande bible

Esyonyimbo 102

¹Erisaba lyʼoyukagalawa nʼerilaka obũlĩe buwe embere syʼOmukama. Uwe Mwami Mukulu wowe erisaba lyage, Wowe erilaka lyage busana nʼerĩwatĩkĩbwa!

²Sũyĩbĩse ũkwʼĩngye omugulu indi omo bũlĩge! Unyihulikirire, Ũnyĩsũbĩraye lũba omugulu ngalaka!

³Engebe yage ikabulirana ngʼomũkĩ, Omubiri wage akaka ngʼomuliro.

⁴Ngahũnzawa ngʼebiti byũmĩre; Nabiribirirwa erirya akalyo.

⁵Ngasĩmba nʼomulenge. Indi makũha nʼengoba nyisa.

⁶Nyiri ngʼekĩrobĩ kyʼomo mbwarara, Ngʼekĩbũkũlũ kyʼomo kĩma.

⁷Ngabula otũgotserĩ; Nyiri ngʼenyonyũ ĩyoyene oko lutwe.

⁸Esyonzĩgũ syage sikanyitsuma omo musibo gosĩ; Abakanyiseka bakahula erĩna lyage mo bĩtsũmĩ.

⁹Erĩbũ ni kalyo kage, Nʼemĩsonĩa yage ĩkatũlũngana omwʼĩpũlya lyage,

¹⁰Busana nʼerihitana lyawe, nʼerikarama lyawe. Mowanyisumba nʼerinyigusa.

¹¹Engebe yage iri ngʼekyũtsũtsũ kyʼerĩgolo-golo; Nyiri ngʼebiti ebyũmĩre.

¹²Nĩkwa uwe, Mwami Mukulu, uli Mwami busana na kera na kera; Esyondengo syosĩ syasyakwibuka.

¹³Wasyahangana nʼeriganyira eSĩonĩ; Kusangwa omugulu wʼerimuganyira abĩrĩhĩka; Oyũ ni mugulu ogowene!

¹⁴Abagombe bawe bamwanzĩre, nomo angabya abĩrĩherĩbwa; Bakamuganyira, nomo angabya ali mulala.

¹⁵Ebihanda byasyubaha Omwami Mukulu; Abami bosĩ bʼekihugo basyubaha Obũtokĩ buwe.

¹⁶Omugulu Omwami Mukulu asyaswahĩmba eSĩonĩ, Asyabĩsũla obukulu buwe.

¹⁷Asyowa abandu buwe ababĩrĩsĩganĩbwa, Kandi asyahulikirira erisaba lyabo.

¹⁸Musake ebyo Mwami Mukulu akola, busana nʼolulengo olukasa, Neryo abandu abate babutwa bapipe Omwami Mukulu.

¹⁹Omwami Mukulu mwasamalira eyĩkwa iniane endata ahabũyĩrĩre huwe, Mwakebera ekihugo iniane elubula,

²⁰Erĩowa erĩsĩmba lyʼabandu bʼomũlĩkĩ, Nʼeribohola abatswerawa okwʼihola.

²¹Neryo abandu basyakanganĩa erĩna lyʼOmwami Mukulu eSĩonĩ; Basyamuha ewasĩngya eYerũsalema,

²²Omugulu ebihanda nʼamami basyahĩndana; Erĩramya Omwami Mukulu.

²³Omwami Mukulu mwaleka inabya molo omugulu nyikine mulere; Abĩrĩkũhĩhya engebe yage.

²⁴Nyamuhanga wage, Sunyitwale rino, Isindinabya mũsyakulu! Uwe Mwami Mukulu, ukakota.

²⁵Mowahangika ekihugo kyo kera, Nʼolubula nĩ mũbĩrĩ wʼebyala byawe.

²⁶Ebyo byosĩ byasyabulirayo, nĩkwa uwe wasyasĩgala; Nʼebyosĩ ebyo byasyakula ngʼolukimba. Wasyahindulabyo ngʼolukimba, ibyabulirayo.

²⁷Nĩkwa uwe une ngoko wabya, nʼengebe yawe siwite ndũlĩ.

²⁸Abana betu basyabyaho omo buholo, Kandi abana babo basyabyaho ebiro byosĩ embere syawe.