Read nande Esyonyimbo 105 Bible Online

Esyonyimbo 105 - nande bible

Esyonyimbo 105

¹Muhe ewasĩngya oko Mwami Mukulu, mwambagule obukulu buwe, Mũmĩnyĩsaye ebihanda emĩbĩrĩ yiwe!

²Mumwimbire, mumwimbire eripipa; Mũtũle emyatsi yosĩ yʼeriswekera eyo abirikola!

³Tutseme kusangwa tuli buwe; Abosĩ abakakolera Omwami Mukulu batseme!

⁴Mugende oko Mwami Mukulu busana nʼerĩwatĩkĩbwa; Mwĩkale embere siwe emigulu yosĩ.

⁵Mwibuke emĩbĩrĩ yiwe yʼeriswekera eyo abirikola Ebyʼeriswekera biwe nʼeritswera lyʼobuno buwe,

⁶Ĩnywe bana ba Abrahamũ, omugombe wuwe, Ĩnywe bana ba Yakobo, oyo ayisoga, Mwibuke ebitiko-tiko biwe bikulu nʼebyʼeriswekera, Nʼeritswera eryo atswera.

⁷Iye, Omwami Mukulu, ni Nyamuhanga wetu; Amahano wuwe ni wʼekihugo kyosĩ.

⁸Asyaberererya endagane yiwe kera na kera, Nʼerilaga liwe busana nʼesyondengo elfu.

⁹Nʼendagano eyo ayira na Abrahamũ, Nʼerilaga liwe na Isaka.

¹⁰Omwami Mukulu mwahĩra endagane yʼerikota na Ĩsraelĩ, Nʼendagano yʼebiro byosĩ na Yakobo, omugulu abũga ati,

¹¹Nasyakuha ekihugo kyʼeKanana; Kyasyabya omwandu wawe.

¹²Omugulu abandu ba Nyamuhanga babya bake omwʼiganzwa, Kandi babya omo kihugo ngʼabalũa-hali.

¹³Balendera oko kihugo nʼoko kindi kihugo, Nʼoko bwami buguma nʼoko bundi bwami.

¹⁴Nĩkwa mwatalĩga mundu akanũbyabo, Kandi mwakunga abami busana nabo.

¹⁵Mwabũga ati, Sĩmũtũle oko bagombe bage abayisogawa; Sĩmwagalaye abamĩnyererĩ bage!

¹⁶Omugulu Omwami Mukulu atuma enzala omo kihugo kyabo, Nʼerĩlũsyamo akalyo kabo kosĩ,

¹⁷Mwatuma Yosefũ embere syabo, Oyo wagũlĩbawa ngʼomukobe.

¹⁸Amahulula akalĩre mwagalya ebisando biwe, Kandi mobahĩra omusege omo bĩkya biwe.

¹⁹Erĩhĩka aho ebyo aminyerera byabererera. Ekĩnywa kyʼOmwami Mukulu mokyamũmĩnyĩsya kwʼali mutunganene.

²⁰Neryo omwami wʼeMĩsĩrĩ mwamubohola; Omũtabalĩ wʼebihanda mwamuha obwĩranda;

²¹Mwamuyira mo mũteya wʼobwami buwe, Kandi mwamuyira mo mũtabalĩ wʼekihugo kiwe kyosĩ.

²²Mwamuha ehamũlĩ oko bakulu bʼomwami, Nʼehamũlĩ yʼerĩkangĩrĩrya abahanĩ buwe.

²³Neryo Yakobo mwaya eMĩsĩrĩ, Neryo mwĩkala omo kihugo ekyo.

²⁴Omwami Mukulu mwaleka abandu buwe ibabana abana bangi, Mwayirabo mo bandu bʼamaka kwilaba esyonzĩgũ syabo.

²⁵Kandi mwaleka Abanya Mĩsĩrĩ ĩbakwa abandu buwe bʼobusu, Nʼeriteba abagombe buwe.

²⁶Neryo mwatuma omugombe wuwe ye Musa, Na Harũnĩ, oyo ayisoga.

²⁷Mobakola emĩbĩrĩ ya Nyamuhanga eyĩkalĩre, Kandi mobakola ebitiko-tiko eMĩsĩrĩ.

²⁸Mwatuma omwĩrĩmya omo kihugo, Nĩkwa Abanya Mĩsĩrĩ mobatowa erihana liwe.

²⁹Mwahindula esyonyũsĩ syabo mo musasi, Kandi mwĩta amahere wabo gosĩ.

³⁰Ekihugo kyabo mokyũsũla mwʼebikere, Nʼomo kikali kyʼOmwami.

³¹Nyamuhanga mwahamula, neryo esĩsũkĩ mosyahĩka, Nʼesyonda mosyahĩka omo kihugo kyosĩ.

³²Mwatuma amatwa nʼerĩpalya omo kihugo kyabo, Omo mwanya wʼembũla;

³³Mwaherya emĩrĩkĩ yʼebĩnyũ yabo nʼemiti yʼemĩtĩnĩ, Kandi mwabũnangira emiti yabo yʼahisi.

³⁴Mwahana nʼesyongĩke mosyahĩka, Esyomĩlĩyo syasyo esiteganzika.

³⁵Mosyalya emyaka yosĩ omo kihugo, Mosyalya ebyalya byosĩ omwʼirima.

³⁶Mwĩta ehimbere hyosĩ hyʼobulume Hyʼamanyũmba gosĩ wʼeMĩsĩrĩ.

³⁷Neryo mwasondola nʼerĩhũlũkya Abaĩsraelĩ, Ĩbahekĩre ebĩtsĩpa nʼesyamagetsi, Kandi abosĩ babya bakalĩre isibali kʼoyulwere.

³⁸Abanya Mĩsĩrĩ mobatsema omugulu bagenda, Kusangwa mobubahabo.

³⁹Mwahĩra ekĩtũ endata oko bandu buwe, Nʼomuliro erĩkoleryabo omo kiro.

⁴⁰Mobabũlya, naye mwatuma esyongwali, Mwahabo akalyo kakalũa elubula erĩũgũtyabo.

⁴¹Mwalĩbũla erĩbwe, nʼamagetsi mwakũnũnũka, Iniakasenda ngʼolũsĩ omo mbwarara.

⁴²Mwibuka erilaga liwe ribũyĩrĩre, Uku Abrahamũ omugombe wuwe.

⁴³Neryo mwasondola akahũlũkya abandu buwe omwʼimba esyonyimbo, Mwasondola abayisogawa buwe nʼemirenge yʼobutseme.

⁴⁴Mwahabo ebitaka byʼebihanda, Kandi mwaleka ĩbĩmya amalima wabo,

⁴⁵Abandu buwe batoke erĩowa emigambo yiwe, Nʼerikwama ebihano biwe. Ĩnywe, mupipe Omwami Mukulu!