Read nande Esyonyimbo 106 Bible Online

Esyonyimbo 106 - nande bible

Esyonyimbo 106

¹Mupipe Omwami Mukulu! Muhe ewasĩngya oko Mwami Mukulu, kusangwa ni mubuya; Olwanzo luwe ni lwʼerikota.

²Nindi angatoka eriahula emyatsi mikulu yosĩ eyingaha eyo abirikola kwehĩ? Nindi wangatoka erimupipa ngoko litolere kwehĩ?

³Obutseme buli oko bakowa erihana liwe, Abakakola ekitunganene emigulu yosĩ!

⁴Uwe Mwami Mukulu, unyibuke omugulu ũkawatĩkaya abandu bawe; Unyiganze haguma, omugulu ũkalamayabo.

⁵Uleke nyilangire omugaso wʼabandu bawe, Nyisangire omo butseme bwʼekihanda kyawe, Omwʼipipa lyʼobutseme bwʼabandu bawe.

⁶Twabĩrĩhalya, ngoko aboso-kulu wetu bakola; Twabiribya babi nʼabʼebibi.

⁷Aboso-kulu wetu ababya eMĩsĩrĩ mobataminya emĩbĩrĩ yʼeriswekera ya Nyamuhanga; Mobibirirwa emigulu mingi eyo akangayabo olwanzo luwe, Mobahona oko Wʼamaka gosĩ oko Ngetsi yʼEngula.

⁸Nĩkwa mwalamyabo, ngoko alagabo, Busana nʼerĩmĩnyĩsya Obũtokĩ bunene buwe.

⁹Mwahana Engetsi yʼEngula, nayo moyuma, Neryo mwasokya abandu buwe nga habya kitaka kyũmĩre.

¹⁰Mwalamyabo oko bakwabo obusu; Mwalamyabo oko syonzĩgũ syabo.

¹¹Amagetsi mwasendya esyonzĩgũ syabo, Mohatasaka nʼomuguma wa kubo.

¹²Neryo abandu buwe mobĩkĩrĩrya esyondagane siwe, Mobamwimbira eripipa.

¹³Nĩkwa mobibirirwa lũba ebyo akola, Mobakola butsira eririnda erihana liwe.

¹⁴Kandi mobakwa esyongumbu syo kutsibu omo mbwarara, Mobalenga uku Nyamuhanga;

¹⁵Neryo mwahabo ebyo bamũbũlaya, Nĩkwa mwatuma endwala nyibi omo katĩkatĩ kabo.

¹⁶Eyo omo mbwarara mobakwa Musa yʼobũha, Na Harũnĩ, omugombe ũbũyĩrĩre wʼOmwami Mukulu;

¹⁷Neryo ekitaka mokyasanzukala nʼerimera Datanĩ, Nʼerĩĩta Abĩramũ nʼekĩtũnga kiwe.

¹⁸Omuliro mwandagalira oko balĩkyabo abamukwama, Nʼerĩhĩsya abandu babi bosĩ.

¹⁹EHorebũ mobahesa ekyana kyʼende omo syamagetsi, Mobaramya esanamu eyo.

²⁰Mobahĩnganĩa olukengerwa lwa Nyamuhanga, Busana nʼesanamu yʼenyama eyikalya ebiti.

²¹Mobibirirwa Nyamuhanga oyo walamayabo, Omo mĩbĩrĩ yʼamaka eMĩsĩrĩ.

²²Mwakola aho emĩbĩrĩ yʼeriswekera! Kandi mwakola emyatsi eyĩkalĩre oko Ngetsi yʼEngula.

²³Kyaleka Nyamuhanga ĩnĩabũga ati, asyatogotya abandu buwe; Nĩkwa mwatakola atya, kusangwa Musa, oyo ayisoga, mwahangana, Nʼerĩkakĩrya erihitana lya Nyamuhanga, akasyatogotyabo.

²⁴Neryo mobagana ekihugo kibuya, Kusangwa mobatĩkĩrĩrya erilaga lya Nyamuhanga.

²⁵Mobasiba omo mahema nʼeriyikuna. Mobagana erihulikirira oko Mwami Mukulu.

²⁶Kyaleka inialagabo erĩkalĩre, ati, Asyaholeryabo omo mbwarara,

²⁷Nʼeripanza-panzira abana babo omo katĩkatĩ kʼebihanda abatĩkĩrĩrye, Erireka ibaholera omo bihugo ebite byabo.

²⁸Neryo abandu ba Nyamuhanga mobayaramya Baalĩ, ePeorĩ, Mobalya amahere awaherawa oko syonyamuhanga esĩholĩre.

²⁹Emĩbĩrĩ yabo moyaleka Omwami Mukulu iniahitana, Nʼendwala nyibi moyabuluka omo katĩkatĩ kabo;

³⁰Nĩkwa Finehasĩ mwahangana mwasuyira abʼomusango, Nʼendwala eyo moyakakĩrĩbwa.

³¹Ekĩ mokyaganzwa busana na Fĩnehasĩ mo litunganene, Busana nʼemigulu yosĩ kera na kera.

³²Abandu bʼOmwami Mukulu mobamũhĩtanĩa okwʼĩsoko syʼeMerĩba, Kandi Musa mwabana obũlĩge busana nʼomwatsi wabo.

³³Mobaleka Musa iniakala, Kyaleka ĩnĩabũga emyatsi itatolere akabũga.

³⁴Mobatĩta ebihanda abatĩkĩrĩrye, Ngoko Mwami Mukulu ahanabo,

³⁵Nĩkwa mobaherũkanĩa nabo, Mobagerererya emikolere yʼabatĩkĩrĩrye.

³⁶Mobaramya esyosanamu syabo, Ekĩ mokyaheryabo;

³⁷Mobaherera abagala nʼabali babo Ngʼamahere oko nyamuhanga syʼabalĩmũ;

³⁸Mobĩta abandu abate ko musango, Abana babo bʼobulume nʼabʼobũkalĩ, Ngʼamahere oko syosanamu syʼeKanana; Nʼekihugo mokyatsanda busana nʼomusasi wʼerĩĩta erĩ.

³⁹Mobayĩtsandya omo mĩbĩrĩ yabo, Mobalegula uku Nyamuhanga.

⁴⁰Kyaleka Omwami Mukulu iniahitana oko bandu buwe; Mwakwa bo nye.

⁴¹Neryo mwasĩganĩabo omo bũtokĩ bwʼebihanda bĩtĩkĩrĩrye, Nʼesyonzĩgũ syabo mosyatabalirabo.

⁴²Esyonzĩgũ syabo mosyanũbyabo; Kandi esyonzigũ syabo mosyagondyabo.

⁴³Esyongendo nyingi Omwami Mukulu mwalamya abandu buwe, Nikwa mobayisoga erihona ukwʼiye, Nʼerisenda kandi omo bibi byabo.

⁴⁴Nĩkwa Omwami Mukulu mwowabo omugulu balaka, Kandi mwalangira obũlĩge bwabo.

⁴⁵Busana nʼomwatsi wabo mwibuka erilaga liwe, Mwasuba oko mutima wuwe, busana nʼolwanzo luwe lunene.

⁴⁶Mwaleka abahĩrabo omo mũlĩkĩ, Ibaganyirabo.

⁴⁷Uwe Mwami Mukulu, Nyamuhanga wetu, ũtũlamaye, Ũtũsũbũlaye erĩlũa omo katĩkatĩ kʼebihanda, Tutoke eripipa erĩna lyawe lĩbũyĩrĩre, Nʼerikuha ewasĩngya omo butseme.

⁴⁸Tupipe Omwami Mukulu, Nyamuhanga wa Ĩsraelĩ; Mumupipe lino na kera na kera! Abandu bosĩ babũge bati, Amina! Mupipe Omwami Mukulu!