Read nande Esyonyimbo 107 Bible Online

Esyonyimbo 107 - nande bible

Esyonyimbo 107

¹Muhe ewasĩngya oko Mwami Mukulu, kusangwa ni mubuya; Olwanzo luwe ni lwa kera na kera!

²Abosĩ abo Mwami Mukulu abĩrĩlamya, batũlego, Abo alamaya oko syonzĩgũ syabo,

³Abo asũbũlaya akalũsyabo omo bihugo byʼehali, Abalũa ebwanga bwʼendata, nʼebwanga bwʼeyĩkwa, Nʼelutambi lwʼendata, nʼelutambi lwʼeyĩkwa.

⁴Abandi mobalendera ibatere omo mbwarara eyite mo nzira, Isibetoka eribana enzira eyikaya oko mũyĩ wʼabandu.

⁵Mobakwa enzala nʼenyota, Ibabiribula amaha.

⁶Omo bũlĩge bwabo mobalakira Omwami Mukulu, Naye mwalamyabo omo malĩge wabo.

⁷Mwasondolabo nʼerĩhũlũkyabo, Erĩkolyabo oko mũyĩ wʼabandu.

⁸Litolere ibaha Omwami Mukulu ewasĩngya busana nʼolwanzo luwe olutyusa, Busana nʼemyatsi eyʼeriswekera eyo akolerabo!

⁹Akabuga enyota yʼabandu abakwĩre enyota, Nʼabakwĩre enzala akũgũtayabo omo myatsi mibuya,

¹⁰Abandi babya bĩkere omo mwĩrĩmya nʼomo mũhĩndanĩa, Abandu bʼomũlĩkĩ ibakagalawa omo mahulula,

¹¹Kusangwa babya bakahona oko bihano bya Nyamuhanga Owʼendata Kutsibu, Ibabiripona erihana liwe.

¹²Babya ibabiriluha busana nʼomũbĩrĩ owakalĩre; Babya bakayitinira, isihali mundu wangawatĩkyabo.

¹³Omo bũlĩge bwabo mobalakira Omwami Mukulu, Naye mwalamyabo oko malĩge wabo.

¹⁴Mwahũlũkyabo omo mwĩrĩmya wabo nʼomo mũhĩndanĩa wabo, Kandi mwatsũtsanga amahulula wabo.

¹⁵Litolere ibaha Omwami Mukulu yo wasĩngya busana nʼolwanzo luwe olutyusa, Busana nʼemyatsi eyʼeriswekera eyo akolerabo!

¹⁶Akateraya esyonyũyĩ syʼemiringa, Nʼerĩtsũtsanga esyongomo syʼekyuma.

¹⁷Abandi babya balwere busana nʼebibi byabo, Ibakagalawa busana nʼamalolo wabo;

¹⁸Ebyalya mobyabya nye busana nabo, Babya hakũhĩ nʼerihola.

¹⁹Omo bũlĩge bwabo mobalakira Omwami Mukulu, Naye mwalamyabo oko malĩge wabo.

²⁰Mwalamyabo omwʼihana liwe, Kandi mwalamyabo okwʼisinda.

²¹Litolere ibaha Omwami Mukulu yʼewasĩngya busana nʼolwanzo luwe olutyusa, Busana nʼemyatsi eyʼeriswekera eyo akolerabo.

²²Litolere ibamuhongera obuhere omo wasĩngya, Haguma nʼesyonyimbo syʼobutseme bangagambula ebyosĩ abirikola!

²³Abandi mobasoka engetsi omo mato, Ibakayikumbirira oko syongetsi.

²⁴Mobalangira ebyo Mwami Mukulu abirikola, Nʼemĩbĩrĩ yiwe yʼeriswekera oko syongetsi.

²⁵Iye mwahamula, nʼekihunga ekĩkalĩre mokyatsũka eribuhirira, Nʼerisumba ebisunda byʼengetsi.

²⁶Amato mwasumbirwa endata omo kyanya, nʼeriguswa eyĩkwa omo mitobero, Omo bwĩko, obwaleka emitima yʼabandu ĩyalũa omo nda;

²⁷Mobatwĩkala nʼerĩkũta-kũta ngʼabakũndĩrya; Amenge wabo gosĩ mwatawatĩkyabo.

²⁸Omo bũlĩge bwabo mobalakira Omwami Mukulu, Naye mwalamyabo oko malĩge wabo.

²⁹Mwabonderya akanyabungu, Nʼebisunda mobyabondera.

³⁰Mobatsema busana nʼeritekana, Kandi mwaletabo omo kisabukiro ekyo banzĩre.

³¹Litolere ibaha Omwami Mukulu yʼewasĩngya busana nʼolwanzo luwe olutyusa, Busana nʼemyatsi eyʼeriswekera eyo akolerabo!

³²Litolere ibambagula obukulu buwe omwʼĩhĩndana lyʼabandu, Nʼerimupipa omwʼĩbũgĩro lyʼabakulu.

³³Abĩrĩũmya esyonyũsĩ syo kutsibu, Nʼerĩrĩba esyongũnũnũko isitasenda.

³⁴Abirireka ekitaka kyowene ikyabya mulala wʼOmũnyũ, Busana nʼobubi bwʼabandu ababya bĩkereho.

³⁵Abiribindula embwarara mo bitsinga byʼamagetsi, Nʼekitaka kyũmĩre mo ngũnũnũko esikasenda mwʼamagetsi.

³⁶Abirireka abakawira ĩbĩkalaho, Neryo mobayĩhĩmbĩra omũyĩ wʼerĩĩkalamo.

³⁷Mobabiba amalima nʼerihera emĩrĩkĩ yʼebĩnyũ, Ebyeraya akalyo kanene.

³⁸Kandi mwatsumulabo, nabo mobabya nʼabana bangi, Kandi mwataleka ebihangulo byabo ibyakeha.

³⁹Omugulu abandu ba Nyamuhanga bakĩndawa nʼerihemulwa, Omwʼĩnũbĩbwa nʼeriagalwa lĩkalĩre,

⁴⁰Mwapona abanũbayabo, Kandi mwaganga-gangyabo omo mbwarara eyite mo nzira.

⁴¹Nĩkwa mwalamya abʼobwaga oko malĩge wabo, Kandi mwaleka ebĩtũnga byabo ibyakanya ngʼebihangulo.

⁴²Abatunganene bakalangira ekĩ, ibatsema, Nĩkwa ababi bosĩ basyahũnerĩbwa.

⁴³Abʼamenge baganĩraye emyatsi eyĩ; Basĩme amenge wʼolwanzo olutyusa lwʼOmwami Mukulu.