Read nande Esyonyimbo 115 Bible Online

Esyonyimbo 115 - nande bible

Esyonyimbo 115

¹Ukʼuwe ĩwowene, Uwe Mwami Mukulu, ukʼuwe ĩwowene, Olukengerwa luhabawe, butsira kwĩtwe, Busana nʼolwanzo lwawe olutyusa, nʼeritendiregula lyawe.

²Busana nakĩ abatĩkĩrĩrye bakatũbũlaya bati, Nyamuhanga wenyũ ali hahi kwehĩ?

³Nyamuhanga wetu ali omo lubula, Akakola ebyo anzĩre.

⁴Esyonyamuhanga syabo sikahesawa omo bĩtsĩpa nʼesyamagetsi, Omũbĩrĩ wʼebyala byʼabandu.

⁵Siwite amuno, nĩkwa sisyetoka erisobola, Nʼameso, nĩkwa sisyetoka erilangira.

⁶Siwite amatwĩ, nĩkwa sisyetoka erĩowa, Nʼesyonĩndo, nĩkwa sisyetoka eribeherwa.

⁷Siwite ebyala, nĩkwa sisyetoka erimata-mata, Nʼebisando nĩkwa sisyetoka eribasula; Sisyetoka erĩbũgya omulenge.

⁸Abahesasyo, nʼabosĩ abakayiketerasyo, Babye ngʼesyosanamu esyo bahesa!

⁹Ĩnywe bandu ba Ĩsraelĩ, muyiketere Omwami Mukulu! Akabawatĩkaya, nʼeribahanganira.

¹⁰Ĩnywe bahererĩ ba Nyamuhanga, muyiketere Omwami Mukulu! Akabawatĩkaya, nʼeribahanganira.

¹¹Ĩnywe bosĩ abakubaha Omwami Mukulu, muyiketere Omwami Mukulu! Akabawatĩkaya nʼeribahanganira.

¹²Omwami Mukulu akatwibuka, kandi asyatutsumula; Asyatsumula abandu ba Ĩsraelĩ, Asyatsumula abahererĩ bosĩ ba Nyamuhanga.

¹³Asyatsumula bosĩ abakubaha Omwami Mukulu, Abakulu nʼabake-bake haguma.

¹⁴Omwami Mukulu abahe abana, ĩnywe nʼabana benyũ.

¹⁵Omwami Mukulu abatsumule, Oyo wahangika olubula nʼekihugo!

¹⁶Olubula ni lwʼOmwami Mukulu ĩyowene, Nĩkwa mwaha ekihugo oko bandu. Abaholĩ sibepipa Omwami Mukulu,

¹⁷Kutse abo abakandagalira omo kihugo kyʼobũkũtũ.

¹⁸Nĩkwa ĩtwe tuliho, twasyaha ewasĩngya oko Mwami Mukulu, Lino na kera na kera. Mupipe Omwami Mukulu!