Read nande Esyonyimbo 119 Bible Online

Esyonyimbo 119 - nande bible

Esyonyimbo 119

¹Obutseme buli nʼabo abakalendera butsira malolo, Abakakwama emigambo yʼOmwami Mukulu.

²Obutseme buli nʼabo abakakwama Omwami Mukulu nʼebihano biwe, Abakamukenga nʼomutima wabo gosĩ.

³Kwenene sibekola nabi; Bakalendera omo nzira syʼOmwami Mukulu.

⁴Wabirituha emigambo yawe, Kandi wabiritubwira tukengeyo butalegula.

⁵Nyiri nʼamaha wʼobutalegula, Erikwama ebihano byawe!

⁶Namakenga ebihano byawe byosĩ, Neryo sĩndĩendĩsyakwa esĩsonĩ.

⁷Omugulu ngaminya amahano wawe awatunganene, Nasyakupipa omo mutima mubuya.

⁸Nasyakenga emigambo yawe; Sũnyĩsĩganaye na kera!

⁹Ko mũlwana angatoka erĩtĩndatsandya engebe yiwe ati kwehĩ? Lye nʼerikenga ebihano byawe.

¹⁰Ngalenga nʼomutima wage gosĩ erikukolera; Ũnyĩkakĩraye okwʼiketa ebihano byawe!

¹¹Ngabika emigambo yawe omo mutima wage, Neryo sindiendisyakukolera amalolo.

¹²Mwami Mukulu, ngakupipa; Ũnyĩkangĩrĩraye ebihano byawe!

¹³Nasyambagula omo mulenge, Emigambo yosĩ eyo wabirituha.

¹⁴Ngatsema erikwama ebihano byawe, Kwilaba eribana obuteke bunene.

¹⁵Ngiga erĩkangĩrĩrya lyawe; Ngalebaya amahamulo wawe.

¹⁶Ngatsemera emigambo yawe, Sindiendisyibirirwa ebihano byawe.

¹⁷Unyikole ebibuya, ĩngye mugombe wawe, Inatoka eribyaho, nʼerikenga erĩkangĩrĩrya lyawe.

¹⁸Ũlĩbũle ameso wage, inatoka erilangira, Emyatsi yʼekwenene yʼeriswekera eyiri omo migambo yawe.

¹⁹Indi oko kihugo ko hano ko katambĩ kake; Sũnyĩbĩse ebihano byawe!

²⁰Omutima wage akakwa olukando; Oko migulu yosĩ nyanzĩre eriminya eritswera lyawe.

²¹Ukakunga abakayiheka; Ni batakirwa abakaleka ebihano byawe.

²²Ũnyĩlũsaye kwʼebĩtsũmĩ byabo nʼeripona lyabo, Kusangwa nabirikenga emigambo yawe.

²³Nomo abatabalĩ bangahĩndana nʼeriya embĩta yʼerilwa nage, Ĩngye, omugombe wawe, nasyiga ebihano byawe.

²⁴Ebihano byawe bĩkanyĩtsemesaya; Nĩ bahanĩ bage.

²⁵Ngagotsera omo lũtũtũ ĩnabĩrĩkĩndwa; Ũnyĩsũbaye ngoko wabirilaga!

²⁶Monabikula ebyosĩ nabirikola, nawe mowanyĩsũbĩrya; Ũnyĩkangĩrĩraye ebihano byawe!

²⁷Ũnyĩkangĩrĩraye erikenga emigambo yawe, Nage nasyiga erĩkangĩrĩrya lyawe lyʼeriswekera.

²⁸Namahola nʼobũlĩge; Unyihe akagala, ngoko wabirinyilaga.

²⁹Ũnyĩkakĩraye erigenda omo nzira yʼoluhabo, Nʼomo bubuya bwawe ũnyĩkangĩrĩraye emigambo yawe.

³⁰Namayisinga erikenga; Nabĩrĩrĩga erihulikirira ebihano byawe.

³¹Mwami Mukulu, nabirikwama erihamula lyawe; Suleke ngahemuka!

³²Ngandikenga amahano wawe nʼomũhwa, Kusangwa wasyamba kandi eriminya.

³³Ũnyĩkangĩrĩraye, uwe Mwami Mukulu, enzumwa yʼemigambo yawe, Nage nasyakengayo emigulu yosĩ.

³⁴Ũnyĩkũmbũlĩre emigambo yawe, nage nasyakengayo. Nage nasyakwamayo nʼomutima wage gosĩ.

³⁵Unyisondole omo nzira yʼamahano wawe, Kusangwa ngabana mugo mʼobutseme.

³⁶Uleke nyanze erikenga amahano wawe, Butsira eribana buteke.

³⁷Ũnyĩkakĩraye okwʼĩtĩndahĩra ameso oko bitawite mugaso; Unyikole ebibuya, ngoko wabirilaga.

³⁸Ũberereraye erilaga lyawe busana nage, ĩngye mugombe wawe, Erilaga eryo ukalaga oko bakakubaha.

³⁹Ũnyĩlũsaye kwʼebĩtsũmi ebyo ngubaha; Ebihano byawe ni byʼeriswekera!

⁴⁰Nyanzĩre erikenga ebihano byawe; Kusangwa utunganene, unyikolere ebibuya!

⁴¹Ũnyĩkangaye ngoko gũnyanzĩre, uwe Mwami Mukulu, Kandi ũnyĩlamaye ngʼendagano yawe.

⁴²Neryo nasyatoka erĩsũbĩrya abakanyitsuma, Kusangwa ngayiketera ekĩnywa kyawe.

⁴³Ũnyĩtokesaye erĩbũga omwatsi wʼekwenene oko migulu yosĩ, Kusangwa amaha wage ali omwʼitswera lyawe.

⁴⁴Nasyakenga emigambo yawe ebiro byosĩ, Kera na kera!

⁴⁵Nasyasiba omo bwĩranda mo ndeke, Kusangwa nabirirenga erikenga ebihano byawe.

⁴⁶Nasyambagulira abami bʼebihano byawe, Sĩndĩendĩsyakwa esĩsonĩ.

⁴⁷Ngabana obutseme omwʼikenga ebihano byawe, Kusangwa nyanzĩrebyo.

⁴⁸Ngakenga, kandi nyanzĩre ebihano byawe; Ngandĩhĩra obũlengekanĩa oko bihano byawe.

⁴⁹Wibuke erilaga lyawe busana nage, ĩngye mugombe wawe; Lyabirireka inabya nʼamaha.

⁵⁰Omo magalĩ wage monakĩranĩbwa, Kusangwa endagano yawe moyamba engebe.

⁵¹Abakayiheka bakanyĩsĩnĩngũlĩra, Nĩkwa sinditateruka oko migambo yawe.

⁵²Ngibuka amahano wawe ago wamba erĩmbere. Amahano akanyĩkĩranaya, uwe Mwami Mukulu.

⁵³Ngahitana kutsibu, Omugulu ngalangira ababi bakaketa emigambo yawe.

⁵⁴Omugulu ngabungira ehandi, Amahano wawe akabya nyimbo syage.

⁵⁵Omo kiro, Mwami Mukulu, ngakũganĩraya, Ngakenga emigambo yawe.

⁵⁶Obutseme bwage bobũ, nyiti, Ngakenga amahano wawe.

⁵⁷Uwe Mwami Mukulu, Uli ekyo ngasonda; Ngakulaga nyiti ngandikenga emigambo yawe.

⁵⁸Ngakusaba nʼomutima wage gosĩ, nyiti, Unyiganyire, ngoko wanyilaga!

⁵⁹Nabĩrĩganĩrya omwatsi wʼemigendere yage, Ngalaga erikwama ebihano byawe.

⁶⁰Butsira eritsigamira, nganguha Erikenga ebihano byawe.

⁶¹Ababi bakanyisenga omo mikoba yabo, Nĩkwa sindibirirawa emigambo yawe.

⁶²Omo katĩ-kanene ngabuka, Erikupipa busana nʼeritswera lyawe ritunganene.

⁶³Indi mwĩra wʼabosĩ abakakukolera, Wʼabosĩ abakakenga emigambo yawe.

⁶⁴Ekihugo kyamosũla nʼolwanzo lwawe olutyusa, uwe Mwami Mukulu; Ũnyĩkangĩrĩraye ebihano byawe!

⁶⁵Uwe Mwami Mukulu, Wabĩrĩberererya erilaga lyawe, Wabirinyikolera ebibuya ĩngye mugombe wawe.

⁶⁶Umbe amenge, nʼeriminya, Kusangwa ngayiketera ebihano byawe.

⁶⁷Ute wanyisuyira, nabya ngakola nabi, Nĩkwa lino ngakenga ekĩnywa kyawe,

⁶⁸Ukakola ebibuya bingaha! Uli mwenge! Ũnyĩkangĩrĩraye ebihano byawe!

⁶⁹Abandu abakayiheka bakabũga amabehĩ busana nage, Nĩkwa omo mutima wage gosĩ ngakenga erihamula lyawe.

⁷⁰Abandu aba sibawite amenge, Nĩkwa ngatsema omo migambo yawe.

⁷¹Erinyisuyira lyabya lyowene busana nage, Kusangwa molyanyĩgĩsya ebihano byawe.

⁷²Emigambo eyo ukaha yowene busana nage, Kwilaba esyofranka syosĩ omo kihugo.

⁷³Mowanyihangika, kandi ukanyirembera; Umba amenge, nyitoke eriiga emigambo yawe.

⁷⁴Abakakubaha basyatsema omugulu basyanyilolako, Kusangwa ngayiketera erilaga lyawe.

⁷⁵Nyĩnasĩ amahamulo wawe, uwe Mwami Mukulu, atunganene, Kandi mowanyisuyira kusangwa Suliregula.

⁷⁶Olwanzo lwawe olutyusa lũnyĩsĩbĩkaye, Ngoko wanyilaga, ĩngye mugombe wawe.

⁷⁷Unyiganyire, nage nasyabyaho, Kusangwa ngatsemera emigambo yawe.

⁷⁸Abakayiheka bahemuke kusangwa banyihandikirira nʼamabehĩ; Nĩkwa ĩngye, ngandĩhĩra obũlengekanĩa bwage oko mahamulo wawe.

⁷⁹Abandu abakakubaha base ũkwʼĩngye, Nʼabandu abakaminya ebihano byawe, nabo base.

⁸⁰Kumbe namakenga ebihano byawe byo ndeke-ndeke, Sĩnyĩtawe esĩsonĩ syʼerĩsĩngwa.

⁸¹Namaluha, uwe Mwami Mukulu, busana nʼerikulinda erĩnyĩlamya; Ngahĩra eriyiketera lyage omo kĩnywa kyawe.

⁸²Ameso wage alũhĩre busana nʼeririnda erilangira ebyo walaga, Inyinemũbũlya nyiti, Wasyanyĩwatĩkya mugulu wahi kwehĩ?

⁸³Indi buyira ngʼekihu kyʼebĩnyũ ekyabiriponwa. Nĩkwa sinditibirirwa ebihano byawe.

⁸⁴Nasyaswalinda ndambĩ yahi kwehĩ? Wasyasuyira abakanyendereraya bo mugulu wahi kwehĩ?

⁸⁵Abandu abakayiheka, abatekenga emigambo yawe, Babirinyitakulira mahya wʼerinyihambamo.

⁸⁶Ebihano byawe byosĩ ni byʼeriyiketerwa; Abandu bakanyendereraya omo mabehĩ; ũnyĩwatĩkaye!

⁸⁷Babya bakĩsĩya ĩbanyĩta, Nĩkwa sinditaleka amahamulo wawe.

⁸⁸Busana nʼolwanzo lwawe olutyusa, unyikolere ebibuya, Nyitoke erikenga emigambo yawe.

⁸⁹Ekĩnywa kyawe, uwe Mwami Mukulu, kyasyakota na kera; Ekĩnywa kyawe kyimene ndeke omo lubula.

⁹⁰Eritindalegula lyawe likakota omo myaka yosĩ; Mowahĩra ekihugo omo mwanya wakyo, nakyo kĩkasĩgalaho.

⁹¹Emyatsi yosĩ ĩkasĩgala erĩhĩka mũnabwĩre busana nʼerihana lyawe, Kusangwa ebyosĩ ni bagombe bawe.

⁹²Kumbe omugambo wawe atalwe nzũko yʼobutseme bwage, Nga nabirihola busana nʼerisuyira lyage.

⁹³Sindiendisyagaramira amahamulo wawe, Kusangwa Wabirinyibika eribyaho busana nago.

⁹⁴Indi wawe, ũnyĩlamaye! Nabirirenga erikenga ebihano byawe.

⁹⁵Abandu babi babirindindirira erĩnyĩta, Nĩkwa nasyahĩra obũlengekanĩa bwage omo migambo yawe.

⁹⁶Nabirilangira ko hate kindu kĩhĩkene; Nĩkwa ekihano kyawe sikiwite mutano.

⁹⁷Ka nyanzĩre emigambo yawe! Ngaganĩrayayo omo musibo gosĩ.

⁹⁸Ekihano kyawe kiri haguma nage emigulu yosĩ, Kikaleka ĩnalengya esyonzĩgũ syage syosĩ amenge.

⁹⁹Ngaminya kwilaba abakangĩrĩrya bage bosĩ, Kusangwa ngaganĩraya omo bihano byawe.

¹⁰⁰Ngwite amenge kwilaba abasyakulu, Kusangwa ngakenga ebihano byawe.

¹⁰¹Nabirisaga emikolere yosĩ mibi, Kusangwa nyanzĩre erikenga ekĩnywa kyawe.

¹⁰²Sinditagaramira ebihano byawe, Kusangwa ni we wanyĩkangĩrĩraya.

¹⁰³Amahamulo wawe akasiha ndeke omo buno bwage, Asĩhĩre kwilaba obuki!

¹⁰⁴Ngabana menge omo migambo yawe, Neryo ngakwa obusu emikolere yosĩ mibi.

¹⁰⁵Ekĩnywa kyawe ni tala yʼerinyisondola, Ni kyakakala busana nʼenzira yage.

¹⁰⁶Nasyaberererya erilaga lyage lĩbũyĩrĩre, Erikenga ebihano byawe bitunganene.

¹⁰⁷Uwe Mwami Mukulu, amalĩge wage akalĩre kutsibu; Uleke nyibyeho, ngoko wabirilaga!

¹⁰⁸Kĩsĩ-kĩsĩ Ũlĩge erisaba lyage lyʼewasĩngya, uwe Mwami Mukulu, Ũnyĩkangĩrĩraye ebihano byawe.

¹⁰⁹Nyĩsĩkĩre ebiro byosĩ eribya omo bwĩko bwʼengebe yage; Sinditibirirwa emigambo yawe,

¹¹⁰Abandu babi bakahĩra ekitego busana nage, Nĩkwa Sinditaketa ebihano byawe.

¹¹¹Ebihano byawe ni buteke bwage bwʼerikota; Nabyo ni butseme bwʼomutima wage.

¹¹²Nabirisoha nyiti ngandikenga amahamulo wawe, Erĩhĩka ekiro nasyahola.

¹¹³Abatahangene ndeke ukʼuwe, ngakwabo obusu, Nĩkwa nyanzĩre emigambo yawe.

¹¹⁴Uli oyukanyimira, nʼerinyihanganira; Amaha wage ali omo ndagane yawe.

¹¹⁵Mũnyĩlũeko, ĩnywe bandu bʼebibi! Nasyakenga ebihano bya Nyamuhanga wage.

¹¹⁶Umba akagala, ngoko walaga, nage nasyabyaho; Suleke ngahemuka omo maha wage!

¹¹⁷Unyihambe, neryo nasyabya nʼobuholo, Kandi nasyakenga ebihano byawe ebiro byosĩ.

¹¹⁸Ukagana abosĩ abakaketa emigambo yawe; Esyombĩta syabo syʼeriteba ni buyira.

¹¹⁹Ukaganza ababi bosĩ ngʼebibaya, Kikaleka inanza erĩkangĩrĩrya lyawe.

¹²⁰Ngubaha busana nawe; Ngubaha kutsibu busana nʼeritswera lyawe.

¹²¹Nabirikola ekitunganene nʼekyowene; Sũnyĩsĩganaye oko syonzĩgũ syage!

¹²²Unyilage uti wasyawatĩkya omugombe wawe; Suleke abandu abakayiheka erĩnyendererya!

¹²³Ameso wage akaluha erĩyĩtsũtsa erĩlamya lyawe, Kandi busana nʼerĩnyĩwatĩkya eryo walaga.

¹²⁴Unyikolere ngʼolwanzo lwawe olutyusa, Ũnyĩkangĩrĩraye ebihano byawe.

¹²⁵Indi mugombe wawe, neryo umbe eriminya, Inatoka eriminya erĩkangĩrĩrya lyawe.

¹²⁶Omwami Mukulu, ni mugulu wawe wʼerikola, Kusangwa abandu bakaketa emigambo yawe!

¹²⁷Nyanzĩre ebihano byawe kwilaba esyamagetsi, Kandi kwilaba esyamagetsi esĩtũkwĩre.

¹²⁸Neryo ngakwama erikangirira lyawe ryosi; Ngakwa esyonzira nyibi syʼobusu.

¹²⁹Erĩkangĩrĩrya lyawe ni ryʼeriswekera ndeke, Ngakengalyo nʼomutima wage gosĩ.

¹³⁰Erĩkũmbũla lyʼerĩkangĩrĩrya lyawe rikaleta ekyakakala, Kandi rikaleta amenge busana nʼabatasĩkĩ.

¹³¹Ngatanda obuno nʼerihumayira, Nʼerisonda ebihano byawe.

¹³²Unyikebere, unyiganyire, Ngoko ukanakolera abakwanzĩre.

¹³³Suleke ngayĩhĩnda, ngoko wabirilaga; Suleke ebibi bĩkanyĩkĩnda.

¹³⁴Ũnyĩlamaye oko bakanyĩnũbaya, Inatoka erikenga ebihano byawe.

¹³⁵Unyitsumule nyibye embere syawe, Kandi ũnyĩkangĩrĩraye emigambo yawe.

¹³⁶Emĩsonĩa yage ikasenda ngʼolũsĩ, Kusangwa abandu sibalikenga emigambo yawe.

¹³⁷Uwe Mwami Mukulu, utunganene, Nʼemigambo yawe itunganene.

¹³⁸Amahamulo wawe ago wabiriha; Atunganene, kandi sialisombola mundu.

¹³⁹Erihitana lyage likaka omwisi wage ngʼomuliro, Kusangwa esyonzĩgũ syawe sikapona ebihano byawe.

¹⁴⁰Erilaga lyawe ni rya kwenene! Omugombe wawe anzĩre ryo kutsibu!

¹⁴¹Ĩngye indi muke, kandi ngaponawa, Nĩkwa sindigaramira amahamulo wawe.

¹⁴²Eritunganene ryawe lyasyakota, Nʼemigambo yawe ni yʼekwenene emigulu yosĩ.

¹⁴³Nyĩkwĩre obũlĩge nʼengitsi, Nĩkwa ebihano byawe bikanyiretera obutseme.

¹⁴⁴Amategeko wawe atunganene kera na kera; Umbe eriminya, neryo nasyabyaho.

¹⁴⁵Ngakulakira nʼomutima wage gosĩ; Ũnyĩsũbĩraye, uwe Mwami Mukulu, Nage nasyakenga ebihano byawe!

¹⁴⁶Ngakulakira, ũnyĩlamaye, Nage nasyakwama amahamulo wawe!

¹⁴⁷Eryuba lite ryahuluka ngakulakira busana nʼerĩwatĩkĩbwa; Ngahĩra amaha wage omwʼilaga lyawe.

¹⁴⁸Omo kiro kyosĩ sindiyato, Busana nʼerĩganĩrya amahamulo wawe.

¹⁴⁹Uwe Mwami Mukulu, busana nʼolwanzo olutyusa, Ũtegaye engebe yage, ngʼebibuya byawe!

¹⁵⁰Abakanyendereraya abakalĩre bakahĩka hakũhĩ, Ni bandu batekwama emigambo yawe.

¹⁵¹Nĩkwa uwe, Mwami Mukulu, uli hakũhĩ nage, Nʼerilaga lyawe lyosĩ ni kwenene.

¹⁵²Erĩlũa kera moniga omwatsi wʼerikangirira lyawe; Wabirihandago eribyaho kera na kera.

¹⁵³Usamalire eriagalwa lyage, ũnyĩlamaye, Kusangwa sinditagaramira emigambo yawe.

¹⁵⁴Wimire omwatsi wage, unyibohole; Ũnyĩlamaye, ngoko wabirilaga!

¹⁵⁵Ababi sibendĩsyalamĩbwa, Kusangwa sibalikenga emigambo yawe;

¹⁵⁶Nĩkwa eriganyira lyawe, uwe Mukama Mukulu, nĩ ʼnene, Neryo ĩwanyĩlamya, ngʼerihamula lyawe.

¹⁵⁷Nyiwite esyonzĩgũ nene nʼabakanyĩnũbaya, Nĩkwa sindiusa erikenga emigambo yawe.

¹⁵⁸Omugulu ngalangira abatekenga, ngakwabo obuyuyu, Kusangwa sibalikenga ebihano byawe.

¹⁵⁹Uwe Mwami Mukulu, Ũlebaye ngoko nyanzĩre amahamulo wawe! Ũnyĩlamaye ngʼolwanzo lwawe olutyusa.

¹⁶⁰Enzumwa yʼemigambo yawe ni mwatsi wʼekwenene, Nʼamahamulo wawe gosĩ awatunganene ni Wʼerikota.

¹⁶¹Abandu abakalĩre bakanyendereraya butsira rĩbanza litunganene, Nĩkwa ni migambo yawe yo ngakenga.

¹⁶²Ko ngatsema nyitya busana nʼerilaga lyawe, Ngatsema ngʼoyukabana obuteke bunene.

¹⁶³Ngakwa amabehĩ gosĩ gʼobusu, kandi ngaponago, Kandi nyanzĩre emigambo yawe.

¹⁶⁴Esyongendo sirinda oko buli musibo ngakuha ewasĩngya, Busana nʼeritswera lyawe ritunganene.

¹⁶⁵Abakanza emigambo yawe bali ndeke, nʼobuholo, Isihali kindu ekyasyaleka ibawa.

¹⁶⁶Uwe Mwami Mukulu, nyĩkũlĩndĩrĩre erĩnyĩlamya, Kandi ngakola ebyo ukahana.

¹⁶⁷Ngakenga amahamulo wawe, Nyanzĩrego nʼomutima wage gosĩ.

¹⁶⁸Ngakenga ebihano byawe, nʼerikangirira, lyawe, Ukalangira ebyosĩ ebyo ngakola.

¹⁶⁹Uwe Mwami Mukulu, erilaka lyage busana nʼerĩwatĩkĩbwa lĩkũhĩkeko! Umbe eriminya, ngoko wabirilaga.

¹⁷⁰Erisaba lyage lĩhĩke embere syawe, Kandi ũnyĩlamaye, ngʼerilaga lyawe!

¹⁷¹Nasyakupipa emigulu yosĩ, Kusangwa ũkanyĩkangĩrĩraya amahamulo wawe.

¹⁷²Nasyimba omwatsi wʼemigambo yawe, Kusangwa ebihano byawe bitunganene.

¹⁷³Ũsĩke ebiro byosĩ erĩnyĩwatĩkya, Kusangwa ngakwama ebihano byawe.

¹⁷⁴Mwami Mukulu, ngakwa olukando lwʼerĩlamya lyawe! Ngabana eritsema omo migambo yawe.

¹⁷⁵Umbe engebe, nyitoke erikupipa; Erikangirira lyawe rĩnyĩwatĩkaye!

¹⁷⁶Ngaganga-ganga ngʼembũlĩ eyitere; Wase ũnyĩsonda-sondaye, ĩngye mugombe wawe, Kusangwa sinditagaramira emigambo yawe.