Read nande Esyonyimbo 135 Bible Online

Esyonyimbo 135 - nande bible

Esyonyimbo 135

¹Mupipe Omwami Mukulu! Mupipe erĩna lyʼOmwami Mukulu, ĩnywe bagombe bʼOmwami Mukulu, mumupipe.

²Ĩnywe mwimene omo nyũmba yʼOmwami Mukulu, Ahabũyĩrĩre ha Nyamuhanga wetu.

³Mupipe Omwami Mukulu, kusangwa Omwami Mukulu ni mubuya; Mwimbire erĩna liwe lyʼeripipa, kusangwa ni mwenge.

⁴Kusangwa Omwami Mukulu mwayisoga Yakobo busana naye, Nʼabandu ba Ĩsraelĩ busana naye ĩyowene.

⁵Nyĩnasĩ Omwami Mukulu wetu ko ni mukulu: Kandi Omukama wetu ni mukulu oko nyamuhanga syosĩ.

⁶Omwami Mukulu akakola ebyo anzĩre, Omo lubula nʼomo kihugo, omo syongetsi, nʼomo mirindi eyĩkwa.

⁷Akaleta ebĩtũ byʼomuhimbo oko ndũlĩ yʼekihugo, Akayira erĩpalya busana nʼembũla, Akalũsaya erihunga omo mbĩso yiwe.

⁸EMĩsĩrĩ, mwĩta ehimbere hyosĩ; Ehyʼabandu nʼehyʼesyonyama.

⁹Kandi eyo mwakola ebitiko-tiko nʼebyʼeriswekera, Erisuyira Farao nʼabakulu buwe bosĩ.

¹⁰Mwaherya ebihanda bingi, Kandi mwĩta abami bʼamaka,

¹¹Ye Sĩhonĩ, omwami wʼAbaamorĩ, Na Ogĩ, omwami wʼeBasanĩ, Nʼabami bosĩ bʼeKanana.

¹²Mwaha ebihugo byabo oko bandu buwe; Mwahabyo oko Ĩsraelĩ.

¹³Uwe Mwami Mukulu, abandu basyaminya ebiro byosĩ kʼuli Nyamuhanga; Esyondengo syosĩ syasyakwibuka, uwe Mwami Mukulu.

¹⁴Omwami Mukulu asyaganyira abandu buwe; Asyabohola abagombe buwe.

¹⁵Esyosanamu syʼebihanda sikahesawa omo syʼebĩtsĩpa nʼesyamagetsi; Omũbĩrĩ wʼebyala byʼabandu.

¹⁶Siwite amuno, nĩkwa sisyetoka erisobola, Nʼameso, nĩkwa sisyetoka erilangira;

¹⁷Siwite amatwĩ, nĩkwa sisyetoka erĩowa; Kandi Simuli muka omo muno wasyo.

¹⁸Abahesasyo, nʼabosĩ abakayiketerasyo, Basyabya ngʼesyosanamu esyo bahesa!

¹⁹Ĩnywe bandu ba Ĩsraelĩ, mupipe Omwami Mukulu: Ĩnywe bahererĩ ba Nyamuhanga, mupipe Omwami Mukulu!

²⁰Ĩnywe Balawĩ, mupipe Omwami Mukulu! Ĩnywe mukubaha Omwami Mukulu, mupipe Omwami Mukulu!

²¹Mupipe Omwami Mukulu eSĩonĩ, eYerũsalema, enyũmba yiwe. Mupipe Omwami Mukulu!