Read nande Esyonyimbo 139 Bible Online

Esyonyimbo 139 - nande bible

Esyonyimbo 139

¹Busana nʼomwĩmbĩrĩrĩ mukulu. Olwimbo lwa Dawĩdĩ. Uwe Mwami Mukulu, wabirinyirengako, kandi ũnanyasĩ.

²Ũnasĩ ebyosĩ ngakola; erĩĩkala lyage, nʼerihangana lyage. Nomo une hali, Ukaminya amalengekanĩa wage gosĩ.

³Ukanyilolako, namakola omũbĩrĩ kutse namaluhuka; Ũnasĩ ebyosĩ ebyo ngakola;

⁴Embere nde nabũga, Uwe Mwami Mukulu, ũnasĩ ebyo ngandĩbũga.

⁵Ũkanyĩtĩmbako oko syombande syosĩ; Ukanyihanganira nʼobũtokĩ bwawe.

⁶Amenge wawe ni wʼeriswekera nʼerinyirema; Lĩkalĩre busana nage eriminyago.

⁷Ko nangatoka eriya hahi eritswa oko Mũlĩmũ wawe kwehĩ? Kutse nangatoka eritibita erĩlũa omo meso wawe kwehĩ?

⁸Namahetukira elubula, iguneyo; Kandi namagotsera ekũlĩmũ, iguneyo.

⁹Namagulukira eyisirya kwʼeyo eryuba likasira, Kutse namĩkala ehali eyo eryuba likalengera,

¹⁰Iguneyo erinyisondola, Iguneyo erĩnyĩwatĩkya.

¹¹Namabũlya omwĩrĩmya erĩnyĩbĩsa, Kutse ekyakakala ekĩkanyĩtĩmbako kihinduke mo kiro,

¹²Nĩkwa omwĩrĩmya siangabya ngʼekiro busana nawe, Nʼekiro kĩkangabasenĩe ngʼeritungi. Omwĩrĩmya nʼekyakakala ni kiguma-guma busana nawe.

¹³Mowahangika obuli kĩtsũko kyage; Mowanyĩtsũkĩkanĩa omo kĩsũko kya koyo.

¹⁴Ngakupipa kusangwa ukubahawa; Ebyosĩ ukakola ni byʼehali nʼebyʼeriswekera. Nyasĩkyo nʼomutima wage gosĩ.

¹⁵Mowalangira amakũha wage akatsũtsĩkanĩbwa, Iniakatsũtsĩkanĩbawa omo kĩsũko kya koyo, Omugulu ngakuliramo bũbĩso-bĩso.

¹⁶Mowanyilolako isindinabutwa. Ebiro ebyahangikawa busana nage, Ebyosĩ ibyabirisakwa omo kitabu kyawe, Embere wʼerĩtsũka lyabyo.

¹⁷Uwe Nyamuhanga, lĩnyĩkalĩreko eriminya amalengekanĩa wawe; Ka ni mangi!

¹⁸Namaganzago, ni manene kwilaba Omusege. Omugulu ngabuka, nyikine haguma nawe.

¹⁹Uwe Nyamuhanga, nyiti kumbe wangĩta ababi! Nyiti kumbe, abandu bʼomwaga banganyireka!

²⁰Bakabũga emyatsi mibi busana nawe; Bakabũga emyatsi mibi busana nʼerĩna lyawe,

²¹Mwami Mukulu, ka ngakwa obusu abakakũkwa obusu! Ka ngapona abakakuhonako!

²²Obusu bwage busana nabo bũhĩkene; Ngaganzabo ngʼesyonzĩgũ syage.

²³Uwe Nyamuhanga, unyirengeko, Uminye obũlengekanĩa bwage; Unyirengeko, Uminye amalengekanĩa wage.

²⁴Ũsondaye nga hane eriteba omwisi wage, Unyisondole omo nzira yʼerikota.