Read nande Esyonyimbo 145 Bible Online

Esyonyimbo 145 - nande bible

Esyonyimbo 145

¹Olwimbo lwa Dawĩdĩ wʼeripipa. Uwe Nyamuhanga wage nʼomwami wage, nasyambagula obukulu bwawe; Nasyakuha ewasĩngya ebiro byosĩ kera na kera.

²Nasyakuha ewasĩngya obuli kiro; Nasyakupipa ebiro byosĩ kera na kera.

³Omwami Mukulu ni mukulu, atolere eripipwa kutsibu; Obukulu buwe bũlengĩre eriminya.

⁴Olulengo luguma lwasyapipa omũbĩrĩ wawe erĩhĩka oko lundi lulengo; Basyambagula emĩbĩrĩ yawe yʼamaka.

⁵Nasyahula olukengerwa lwʼobusinge bwʼobukulu bwawe, Kandi nasyaganĩrya oko mĩbĩrĩ yawe yʼeriswekera.

⁶Abandu basyahula obukulu bwʼemĩbĩrĩ yawe yʼamaka, Nage nasyambagula obukulu bwawe.

⁷Basyakanĩa obugenge bwawe bunene emigulu yosĩ, Nʼeriimbira ebibuya byawe.

⁸Omwami Mukulu ni wʼolwanzo nʼeriganyira; Sialihitana lũba, kandi ni wʼolwanzo olutyusa.

⁹Omwami Mukulu ni mwenge oko bosĩ, Kandi akaganyira ebyosĩ ahangika.

¹⁰Ebihangikwa byawe byosĩ, uwe Mwami Mukulu, byasyakupipa, Nʼabandu bawe basyakuha ewasĩngya!

¹¹Basyahula olukengerwa lwʼobwami bwawe, Nʼerĩkanĩa obũtokĩ bwawe.

¹²Neryo abandu bosĩ basyaminya emĩbĩrĩ yawe eyĩkalĩre, Nʼolukengerwa lʼobusinge bwʼobwami bwawe.

¹³Obwami bwawe ni bwʼerikota, Nawe uli Mwami kera na kera. Nyamuhanga sialiregula omo ndagane siwe, Kandi ni mubuya omo byosĩ akakola.

¹⁴Omwami Mukulu akawatĩkaya abosĩ abali omo bũlĩge; Akasumba abosĩ ababĩrĩkehĩbwa.

¹⁵Ebindu byosĩ bikamusamalira nʼamaha. Naye akahabyo ebyalya omugulu biri nʼobwaga bwabyo.

¹⁶Akahabyo ebitolerebyo, Kandi akũgũtaya obwaga bwʼabosĩ.

¹⁷Omwami Mukulu atunganene omo byosĩ akakola, Nʼowʼeriganyira omo mĩbĩrĩ yiwe yosĩ.

¹⁸Omwami Mukulu ali hakũhĩ oko bosĩ abakamubirikira, Ali hakũhĩ oko bosĩ abakamubirikira nʼekwenene.

¹⁹Akaberereraya obwaga bwʼabosĩ abakamubaha; Akowa erilaka lyabo, akalamayabo.

²⁰Omwami Mukulu akahanganira abosĩ abamwanzĩre, Nĩkwa asyatogotya ababi bosĩ.

²¹Nasyapipa Omwami Mukulu emigulu yosĩ; Ebihangikwa byosĩ bipipe erĩna liwe rĩbũyĩrĩre ebiro byosĩ na kera!