Read nande Esyonyimbo 147 Bible Online

Esyonyimbo 147 - nande bible

Esyonyimbo 147

¹Mupipe Omwami Mukulu! Ni kibuya eriimbira eripipa uku Nyamuhanga wetu! Lĩkowana, kandi ritolere erimupipa.

²Omwami Mukulu akasũbaya eYerũsalema, erĩswahĩmbago, Akasũbũlaya abasayĩ ba Ĩsraelĩ.

³Akalamaya ababũnĩkĩre omo mutima, Akasenga-senga ebironda byabo.

⁴Abirisoha emiganzo yʼesyongũnũnũ, Akabirikirasyo omo mena wasyo.

⁵Omwami Mukulu wetu ni mukulu nʼowʼamaka gosĩ; Eriminya liwe siryangalengwako.

⁶Akasumba abakayĩkehaya, Kandi akahĩnolera ababi ahisi oko kitaka.

⁷Mwimbe esyonyimbo syʼewasĩngya oko Mwami Mukulu; Muwatire Nyamuhanga wetu Olwimbo omo nanga.

⁸Akasanza ebĩtũ oko kyanya; Akabana embũla busana nʼekihugo, Akalasaya ebiti oko bitwa.

⁹Akaha esyonyama akalyo kasyo, Akalĩsaya ehyana hyʼebikororo omugulu hikabirikira.

¹⁰Sialitsemera esyosabayĩrĩ syʼamaka, Kandi sialitsemera abasĩrĩkanĩ bʼobulume-lume;

¹¹Nĩkwa Omwami Mukulu akatsemera abakamubaha, Akatsemera abakayiketera olwanzo luwe olutyusa.

¹²Uwe Yerũsalema, upipe Omwami Mukulu! Uwe Sĩonĩ, upipe Nyamuhanga wawe!

¹³Akategaya esyongyo syawe isyakala; Akatsumula abandu bawe.

¹⁴Akategaya emitano yawe yo buholo, Kandi akakũgũtaya nʼengano eyowene ndeke.

¹⁵Akahamula ekĩnywa, Ikyalaba omo kihugo mo lũba.

¹⁶Akatuma enzururu eyikasosa obweya bwʼembũlĩ, Nʼeripanza eritsuku ngʼolũtũtũ.

¹⁷Akatuma amatsuku ngʼemisege; Sihali mundu oyukatoka erĩsĩka omo litsuku akatuma!

¹⁸Neryo akahana, nʼerĩnyenyetya eritsuku, Akatuma erihunga, nʼamagetsi iniasenda.

¹⁹Akaha Yakobo ekĩnywa kiwe, Akaha Ĩsraelĩ ebihano biwe nʼemigambo yiwe.

²⁰Sialitakolera ebindi bihanda atya; Sĩbasĩ emigambo yiwe. Mupipe Omwami Mukulu!