Read nande Esyonyimbo 34 Bible Online

Esyonyimbo 34 - nande bible

Esyonyimbo 34

¹Olwimbo lwa Dawĩdĩ omugulu ateba Abĩmelekĩ omo lĩsĩre, neryo mwabala. Nasyaha Omwami Mukulu yʼewasĩngya emigulu yosĩ, Obuno bwage bwasyamupipa emigulu yosĩ.

²Nasyayihalamba omo Mwami Mukulu busana nʼebyo abirikola, Abandu bolo bowe, batseme,

³Mũhamaye Omwami Mukulu haguma nage, Tupipe erĩna liwe lyo haguma!

⁴Monasaba Omwami Mukulu, naye mwanyĩsũbĩrya; Naye mwanyĩlamya oko buba bwage bosĩ.

⁵Mobamutungerera, neryo mobakangabasanĩa omo butseme; Isibendisyahemuka na kera.

⁶Abandu bera bakalakira Omwami Mukulu, naye akasũbĩraya; Akalamayabo oko malĩge wabo gosĩ.

⁷Omũlaĩka wʼOmwami Mukulu akategaya abakamubaha, Akalamayabo omo bwĩko.

⁸Ulenge, Ũlebaye Omwami Mukulu kwʼali mubuya! Obutseme buli oko mundu oyukamusagirako!

⁹Mubahe Omwami Mukulu, ĩnywe bandu buwe; Kusangwa abakamubaha sibebula kindu kibuya.

¹⁰Ebyana byʼendale bikabula kalyo ĩbyakwa enzala, Nĩkwa abakasonda-sonda Omwami Mukulu sibebula kindu kibuya.

¹¹Mwase, ĩnywe bana, munyihulikirire, Ngandĩbakangĩrĩrya eriubaha Omwami Mukulu.

¹²Mũnanzĩre eritsema omo ngebe kwehĩ? Mũnanzĩre erikota nʼerĩyĩsyandira omo bibuya kwehĩ?

¹³Neryo sũbũge ebibi, Suleke emĩnywa yawe ĩkabũga amatebo.

¹⁴Mũbũnũkale oko bibi, mukole ebibuya; Mũsonda-sondaye obuholo, mukwamirirebo.

¹⁵Ameso wʼOmwami Mukulu akatungerera abatunganene, Kandi amatwĩ wuwe akowa erilaka lyabo.

¹⁶Omwami Mukulu akalola abakola-nabi bʼebitsule. Akasangula eriyibuka lyabo omo kihugo.

¹⁷Abatunganene bakalakira Omwami Mukulu kandi akahulikirirabo, Akalamayabo oko malĩge wabo gosĩ.

¹⁸Omwami Mukulu ali hakũhĩ nʼabʼemitima ĩbũnangĩkĩre, Akalamaya abatawite amaha.

¹⁹Omundu oyutunganene akagalawa omo malĩge mangi, Nĩkwa Omwami Mukulu akamũlamaya omo gosĩ.

²⁰Omwami Mukulu akamũtegaya kutsibu, Isihali erĩkũha nʼeriguma liwe erĩkatwĩka.

²¹Ebibi byasyĩta ababi; Kandi abakakwa abatunganene bʼobusu basyabya kʼomusango.

²²Omwami Mukulu asyalamya abagombe buwe, Kandi abakamũhĩkako bati, ahanganĩrebo, sibendĩsyasĩngwa.