Read nande Esyonyimbo 49 Bible Online

Esyonyimbo 49 - nande bible

Esyonyimbo 49

¹Ĩnywe bihanda byosĩ, mowe ekĩ! Ĩnywe bandu bosĩ bʼekihugo, muhulikirire,

²Abandu bakulu, nʼabandu bake-bake, Abandu bateke, nʼabandu bera haguma.

³Ngandĩbũga ebĩnywa byʼamenge, Kandi ngandĩganĩrya emyatsi yʼeriminya ndeke.

⁴Nganditega okũtũ kwage oko mũsyo, Nasyakũmbũla endekerano yage omugulu ngawata enanga.

⁵Busana nakĩ nangubaha oko mugulu wʼobwĩko kwehĩ? Busana nakĩ nangubaha omugulu esyonzĩgũ sĩkanyĩtĩmbako kwehĩ?

⁶Abandu abakayiketera ebindu byabo, Kandi abakayihalamba busana nʼobuteke bunene bwabo.

⁷Omundu sĩangatongolya mũlĩkyabo na kera, Siangatoka eririha Nyamuhanga obũgũlĩ bwʼengebe yiwe.

⁸Kusangwa endĩhĩ yʼengebe yʼomundu ni nene kutsibu, Siangatoka eribana endĩhĩ yʼengebe eyo, kandi endĩhĩ eyo ikabula.

⁹Kandi busana nʼendĩhĩ eyo siangatoka erikota. Kutse erĩtĩndabika okwʼihola.

¹⁰Akalangira ngoko abandu bʼamenge bakahola, Nʼabandu bakĩrũ nʼabatasĩkĩ abosĩ bakahola, Bakasĩgĩra abana babo obuteke bwabo.

¹¹Amasinda wabo asyabya eka wabo kera na kera; Basyĩkalayo ebiro byosĩ, Nomo bangahula ebitaka byabo omo mena wabo.

¹²Obukulu bwʼomundu sibulireka akatindahola; Asyahola ngʼesyonyama.

¹³Eyĩ ni nzira yʼabandu bakĩrũ, Kandi nĩ ndũlĩ yʼabandu bosĩ abakakwama ebĩnywa byabo.

¹⁴Basyahola ngʼesyombũlĩ, Oluholo lwasyabya mũlĩsya wabo. Abatunganene basyakĩndabo omo ngyakya-ngyakya, Nʼemibiri yabo yasyahondera eKũlĩmũ, Ibali hali kwʼeka wabo.

¹⁵Nĩkwa Nyamuhanga asyanyĩlamya, Asyanyĩkokya erĩnyĩlũsya oko maka wʼoluholo.

¹⁶Sigubahe omugulu omundu akatunda obuteke, Nʼobũsokĩ buwe bukakanya;

¹⁷Kusangwa omugulu akahola siendisyaheka kindu, Obuteke buwe sibwendisyagenda haguma naye omwʼisinda.

¹⁸Nomo mundu angatsemera engebe yʼe no, Nʼabandu bakamupipa omugulu akayĩtũndĩkanaya ndeke.

¹⁹Asyeya aboso-kulu wuwe omo luholo, Isiendisyaswalola oko kyakakala.

²⁰Obukulu bwʼomundu sibulireka akatindahola; Asyahola ngʼesyonyama.