Read nande Esyonyimbo 51 Bible Online

Esyonyimbo 51 - nande bible

Esyonyimbo 51

¹Busana nʼomwĩmbĩrĩrĩ mukulu. Olwimbo lwa Dawĩdĩ ekiro omũmĩnyererĩ Natana amũhĩako busana na Batĩseba. Uwe Nyamuhanga, unyiganyire busana nʼolwanzo lwawe olutyusa, Usangule ebibi byage, busana nʼobubuya bwawe bunene!

²Ũnyeraye ndeke kwʼebibi byage, Ũnyĩnabaye kwʼamalolo wage!

³Kusangwa namaminya amalolo wage; Ngibuka ebibi byage omugulu gosĩ.

⁴Nabirikola nabi ukʼuwe, ũgũwene, Nabirikola ebĩkakũhĩtanaya. Neryo utunganene erinyitswera, Uli nʼerĩbanza erĩnyĩsĩnga.

⁵Indi mubi erĩtsũka ekiro nabutawa, Erĩtsũka ekiro nabutawa nabiribya wʼamalolo.

⁶Ukasonda omutima owateregula; Ũsũlaye obũlengekanĩa bwage omo menge wawe.

⁷Ũlũsaye ebibi byage, nage nasyera; Ũnyĩnabaye, nasyabya mweru kwilaba enzururu.

⁸Uleke nyowe emirenge yʼobutseme nʼeritsanga; Nomo wabĩrĩnyĩbũnanga, nasyatsema kandi.

⁹Ukebere handi busana nʼebibi byage, Usangule amalolo wage gosĩ.

¹⁰Uwe Nyamuhanga, uhangike omutima owene omwisi wage. Kandi ũhĩre ekĩrĩmũ kitunganene omwisi wage.

¹¹Sunyihige embere syʼameso wawe; Sũndũsaye kwʼOmũlĩmũ Abũyĩrĩre wawe.

¹²Umbe kandi obutseme obwʼerĩlamya lyawe, Ũnyĩhanganaye omo kĩrĩmũ kyʼerĩowa.

¹³Neryo nasyakanĩrya abakola-nabi esyonzira esĩkahĩka ukʼuwe, Nʼabakola-nabi basyakusubako.

¹⁴Ũbalaye engebe yage, uwe Nyamuhanga, Nyamuhanga Omũlamya wage; Nage ngandĩkanganĩa eritunganene ryawe.

¹⁵Uwe Mwami Mukulu, ũnyĩwatĩkaye erĩbũga, Nage ngandikupipa.

¹⁶Sĩwanzĩre amahere, kite kitya kumbe namakuhago; Sulitsemera amahere wʼerĩokererya.

¹⁷Amahere wage, Nyamuhanga, nĩ kĩrĩmũ ekĩkowa; Uwe Nyamuhanga, siwendigana omutima owakowa nʼowʼerikenga.

¹⁸Uwe Nyamuhanga, ukolere eSĩonĩ ekibuya, nʼerĩwatĩkyago: Ũswehĩmba esyombĩmbo syʼeYerũsalema.

¹⁹Neryo wasyatsemesĩbwa omo mahere wʼeritunganene, Nʼomo mahere wʼerĩokererya; Kandi esyonume syʼesyonde syasyaherwa oko kiherero kyawe.