Read nande Esyonyimbo 55 Bible Online

Esyonyimbo 55 - nande bible

Esyonyimbo 55

¹Busana nʼomwĩmbĩrĩrĩ mukulu. Oko nanga. Olwimbo lwʼamenge lwa Dawĩdĩ. Uwe Nyamuhanga, uhulikirire erisaba lyage; Sũyĩbĩse okwʼilaka lyage!

²Unyihulikirire, ũnyĩsũbĩraye; Namaluha busana nʼamaganĩryo wage.

³Namayĩtũlĩka busana nʼerĩhalya lyʼesyonzĩgũ syage, Ngayĩtũlĩka busana nʼerĩnũbya lyʼababi. Bakanyiretera obũlĩge; Bakanyihitanako nʼerĩnyĩkwa kwʼekĩnĩga.

⁴Omutima wage akũsũla nʼamagalĩ, Nʼeriubaha lyʼoluholo lĩkanyĩta.

⁵Eriubaha nʼerititimana bikanyihamba, Obuyuyu bwamanyĩta.

⁶Ngabũga nyiti, Kumbe ngwite ebĩpũpa ngʼakalĩkũkũ! Inagulukira hali nʼeribana erihumula.

⁷Nangayĩkongotĩre hali, nʼerĩhĩra obwĩkalo bwage omo mbwarara.

⁸Nanganguha eribana ahʼerisagira, Erĩlũa hakũhĩ nʼerihunga lyʼakanyabungu.

⁹Ũherayebo, Mukama, ũlĩba-lĩbanaye erĩbũga lyabo, Kusangwa ngalangira omwaga nʼamalwa omo mũyĩ.

¹⁰Omo musibo nʼomo kiro bakatĩmba oko mũyĩ oko syombĩmbo syago; Omũyĩ oyo oswĩre mwʼebibi nʼomwaga.

¹¹Erihera litsungenego, Obũgobya nʼerĩnũbya bĩkũsũlaya esyonzira.

¹²Kusangwa sihali enzĩgũ eyikanyiseka, Kumbe nabiritoka erĩyĩyĩnĩa; Kumbe ni mundu oyũkanyĩkwa kwʼekĩnĩga oyukayihalamba busana nage, Kumbe nangayĩbĩsa busana naye.

¹³Nĩkwa ni we, omundu nga ngye, Ni we mũlĩkyetu, nʼomwĩra wage mwanze!

¹⁴Twabya tũkakanĩa haguma, Itukaya omo Hekalũ ya Nyamuhanga haguma nʼendeko.

¹⁵Oluholo lũhĩke oko syonzĩgũ syage ko lũba; Bandagalire eKũlĩmũ ibaneho! Ebibi biri omo manyũmba wabo nʼomo mitima yabo.

¹⁶Nĩkwa ĩngye ngandilakira Nyamuhanga, Omwami Mukulu asyanyĩlamya.

¹⁷Erilaka lyage nʼerĩsĩmba lyage bikamuhetukirako omwʼĩgolo-golo, nʼomo ngyakya, nʼomwʼitungi; Naye akandĩowa omulenge wage.

¹⁸Asyanyĩtongolya omo buholo busana nʼamalwa awakanyibambira; Kusangwa ni bandu bangi abakalwa nage.

¹⁹Nyamuhanga Oyukatabala na kera, Asyanyowa nʼerĩkĩndabo; Sibangatokakĩ, kusangwa sibalikenga Nyamuhanga.

²⁰Mũlĩkyetu wʼerĩmbere mwabambira abĩra buwe; Abĩrĩtwa endagane yiwe.

²¹Ebĩnywa biwe byabya bitendere kwilaba amagũta, Nĩkwa amalwa ali omo mutima wuwe; Ebĩnywa biwe bĩlũe byolo-byolo ngʼamagũta, Nĩkwa mobyalũa ngʼemĩyalĩ eyĩtwĩre.

²²Ugusire Omwami Mukulu yʼamalĩge wawe, naye akandikuhanganira; Siendisyaleka omundu mubuya akakĩndwa na kera.

²³Nĩkwa uwe Nyamuhanga, wasyagusa abĩtĩ nʼababehĩ abo omo buhya bwʼerihera, Bate babuga embindi yʼebiro byabo. Nĩkwa ĩngye nasyayiketera we.