Read nande Esyonyimbo 68 Bible Online

Esyonyimbo 68 - nande bible

Esyonyimbo 68

¹Busana nʼomwĩmbĩrĩrĩ mukulu. Olwimbo lwa Dawĩdĩ lwʼeripipa. Nyamuhanga ahangane, nʼeripanza-panza esyonzĩgũ siwe! Nʼabakamũkwa obusu bamusage nʼeritibita!

²Ngʼomũkĩ kwʼakahekawa nʼerihunga, asyahigabo; Ngʼebisese bikanagukala embere syʼomuliro, Litya ababi bakahera embere sya Nyamuhanga.

³Nĩkwa abatunganene basyayĩsyandira, Nʼeritsema embere sya Nyamuhanga; Ega, basyatsema kutsibu nʼeritsanga.

⁴Mwimbire Nyamuhanga, mwimbire erĩna liwe eripipa; Mumutulire embalu, oyukalaba omo mbwarara ĩnĩahekĩrwe. Erĩna liwe ni Mwami Mukulu, mutseme embere siwe!

⁵Nyamuhanga oyo wĩkere omo Hekalũ yiwe ĩbũyĩrĩre, Akalembera esyongũbĩ, kandi akahanganira abakwakalĩ.

⁶Akaha abakakwa endũlũlũma enyũmba yʼerĩĩkalamo, Akasondola abandu bʼomũlĩkĩ omo bwĩranda bwʼeritsema; Nĩkwa abakahona basyĩkala omo kihugo kyʼomulala.

⁷Uwe Nyamuhanga, omugulu wasondola abandu bawe, Omugulu walaba omo mbwarara,

⁸Ekihugo mokyatitimana, Nʼekyanya mokyatogongya embũla, busana nʼerĩhĩka lya Nyamuhanga, Kandi ekitwa kyʼeSĩnaĩ mokyalaba mʼomũsĩkĩ busana nʼerĩhĩka lya Nyamuhanga, Erĩhĩka lya Nyamuhanga wa Ĩsraelĩ.

⁹Uwe Nyamuhanga, mowawĩsya embũla nene, Mowasũbya omuboga wʼekitaka kyawe ekĩkũlĩre.

¹⁰Abandu bawe mobĩkala eyo; Uwe Nyamuhanga, mowabanira abera ebitolerebo omo bwenge bwawe.

¹¹Omukama mwahamula omwatsi, Neryo abakalĩ bangi mobatũla engulu eyo.

¹²Abami nʼemilondo yabo bakatibita! Neryo abakalĩ abali eka mobagaba ebyanyegawa.

¹³Mobasosa ngʼehĩrĩkũkũ ehĩswĩkĩre omo bĩtsĩpa, Nʼebĩpũpa byahyo ĩbĩkakangabasanaya ngʼesyamagetsi esĩtũkwĩre. (Abandi bʼũkwʼĩnywe momwĩkala omo manyũmba wʼesyombũlĩ mo busana nakĩ kwehĩ?)

¹⁴Omugulu Omũtokĩ Wʼebyosĩ ye Nyamuhanga apanza-panza abami oko kitwa kyʼeSalmonĩ, Mwaleka iyawa esyonzururu.

¹⁵Ekitwa kyʼeBasanĩ ni kitwa kinene kya Nyamuhanga! Ekitwa kyʼeBasanĩ, kiwite amasongera mangi!

¹⁶Busana nakĩ omo masongera wawe ukapona Ekitwa ekyo Nyamuhanga ayisoga busana nʼerĩĩkalaho kwehĩ? Ega, Omwami Mukulu asyĩkalaho kera na kera!

¹⁷Esyogalĩ syʼamaka sya Nyamuhanga ni maelfu mangi, Omukama akalũa eSĩnaĩ akaya musyo mwʼahabũyĩrĩre.

¹⁸Wabirihetukira endata, wabirisondola abanyegwa bawe haguma nawe, Akangirira esyonzũnzo oko bandu abakahona, Omwami Mukulu Nyamuhanga, asyĩkalayo.

¹⁹Mupipe Omukama, oyukaheka emiheke yetu ekiro nʼekiro, Iye ni Nyamuhanga oyũkatũlamaya.

²⁰Nyamuhanga wetu ni Nyamuhanga oyũkalamaya; Iye ni Nyamuhanga, Omwami Mukulu, oyũkatũlamaya oko luholo.

²¹Nĩkwa Nyamuhanga asyatulanga emitwe yʼesyonzĩgũ siwe. Nʼabakakwamirira esyonzira syabo syʼebibi.

²²Omukama akabũga ati, Nasyasũbũlyabo balũe eBasanĩ; Nasyasũbũlyabo bakalũa omo mitobero yʼengetsi,

²³Imwatoka erilaba omo musasi wʼesyonzĩgũ syenyũ, Nʼesyombwa syenyũ, sikulule omusasi ogo syanzĩre.

²⁴Uwe Nyamuhanga, olugendo lwawe lwʼerĩkĩnda, lwabirilolwako nʼabosĩ, Ekisendebele kya Nyamuhanga, Omwami wage, eriya omo habũyĩrĩre huwe.

²⁵Abĩmbĩ bali embere, nʼabawatĩ bʼemĩzĩkĩ bali enyũma, Omo katĩkatĩ hali abana-bato abakawata esyonzebe.

²⁶Mupipe Nyamuhanga omwʼĩhĩndana lyʼabandu buwe, Mupipe Omwami Mukulu, ĩnywe bana ba Ĩsraelĩ!

²⁷Erĩmbere, Benyamĩna yoyo, ekihanda kyike, Neryo abanya-mwami ba Yũda, haguma nʼendeko yabo, bakalaba, Neryo abanya-mwami ba Zebũlũnĩ na Nafũtalĩ bakakwamabo.

²⁸Uwe Nyamuhanga, ũkangaye Obũtokĩ bwawe, Ũkangaye Obũtokĩ obo wayira busana netu.

²⁹Aho abami bakakuletera esyonzũnzo, Ahali eHekalũ yawe eYerũsalema.

³⁰Ukunge eMĩsĩrĩ, enyama yʼomolĩ eyʼmo kisesa; Ukunge ebihanda, esyonume esyo haguma nʼehyana hyasyo, Erĩhĩka aho abosĩ basyũnama nʼerikuha ebĩtsĩpa byabo. Upanza-panze abandu abanzĩre erilwa!

³¹Abakwenda basyalũa eMĩsĩrĩ; Abanya Etĩopĩa basyasumba ebyala byabo omwʼisaba uku Nyamuhanga.

³²Mwimbire Nyamuhanga, ĩnywe mami wʼekihugo, Mwimbire Omukama esikamupipa.

³³Mwimbire oyukalaba omo kyanya, ekyanya kya kera! Lebaya, akasumba omulenge omo mũlũmo munene!

³⁴Mũkanganaye Obũtokĩ bwa Nyamuhanga, Obubuya buwe buli oko Ĩsraelĩ, Nʼobũtokĩ buwe buli omo kyanya.

³⁵Nyamuhanga ni wʼeriswekera omo habũyĩrĩre huwe, Nyamuhanga wa Ĩsraelĩ, akaha abandu buwe amaka nʼobũtokĩ. Nyamuhanga apipawe!