Read nande Esyonyimbo 71 Bible Online

Esyonyimbo 71 - nande bible

Esyonyimbo 71

¹Uwe Mwami Mukulu nyĩgũmĩre aho wawe; Suleke ngahemulwa nakera!

²Kusangwa utunganene, ũnyĩwatĩkaye nʼerinyisabula! Unyihulikirire, ũnyĩlamaye!

³Ubye ahagũmĩre hage ahasĩkĩre, Uli ahakagatĩre hage ahʼerinyihanganira; Uli busayiro nʼomwĩmanĩrĩ wage.

⁴Ũnyĩlamaye, uwe Nyamuhanga, oko bandu babi, Ũnyĩlamaye oko maka wʼabandu babi nʼabakayĩgatsaya.

⁵Amaha wage ali ukʼuwe Mwami Mukulu, Nabiriyiketera we erĩtsũka oko bwana bwage.

⁶Nabiriyiketera we ebiro byosĩ byʼeribyaho lyage; Wabirinyihanganira erĩtsũka ekiro nabutawa; Nasyakupipa emigulu yosĩ!

⁷Eribyaho lyage lyabiribya erĩkũmbo busana nʼabangi; Nĩkwa uli mwĩmĩrĩrĩ wage wʼamaka.

⁸Ngakupipa omo musibo gosĩ, Kandi ngakangaya olukengerwa lwawe;

⁹Sunyigane lino omo bũsyakulu bwage; Sũnyĩrekeranaye omugulu nyiri molo-molo!

¹⁰Esyonzĩgũ syage, banzĩre erĩnyĩta, Sĩkakanaya eriya embĩta busana nage.

¹¹Bati, Nyamuhanga abĩrĩmũlekeranĩa; Tumukwame nʼerimuhamba, kusangwa sihali mundu wangamusabula!

¹²Uwe Nyamuhanga, subye hali kwĩngye; Uwe Nyamuhanga wage, wanguhe, erĩnyĩwatĩkya!

¹³Abakanyibambira bakĩndawe nʼerĩherĩbwa! Nʼabakasonda erĩnyagalya bĩtawe esĩsonĩ, bahemulawe!

¹⁴Nĩkwa nasyahĩra amaha ukʼuwe emigulu yosĩ, Nasyakupipa akandi nʼakandi;

¹⁵Nasyakanĩa eritunganene ryawe; Nasyakanĩa erĩlamya lyawe omo musibo gosĩ, Nomo ndanasĩ omwatsi gosĩ walyo.

¹⁶Nasyahĩka oko Hekalũ yawe omo bũtokĩ bwawe Mwami Mukulu, Nyamuhanga, Nasyakanganĩa eritunganene ryawe ĩwowene.

¹⁷Uwe Nyamuhanga, wabĩrĩnyĩkangĩrĩrya erĩtsũka oko bwana bwage, Na lino nyĩkĩnakanganaya emĩbĩrĩ yawe yʼeriswekera.

¹⁸Na lino namabya mukulu, nʼesyombwĩ syabirilasa, uwe Nyamuhanga, sũnyĩrekeranaye! Ubye haguma nage omugulu ngakanganaya Obũtokĩ nʼamaka wawe oko syondengo syosĩ esikandisyasa.

¹⁹Uwe Nyamuhanga, eritunganene ryawe rĩkahĩka oko kyanya. Wabirikola emyatsi mikulu; Uwe Nyamuhanga, nindi ali nga we kwehĩ?

²⁰Wabirinyiretera amalĩge nʼeriagalwa, Nĩkwa wasyasũbya amaka wage; Wasyanyĩwatĩkya sĩnyĩhĩke okwʼisinda.

²¹Wasyanyĩhamya kandi, Nʼerĩswanyĩkĩranĩa.

²²Nasyakupipa omo nanga; Uwe Nyamuhanga, nasyapipa eritindalegula lyawe, Oko nanga nasyakuwatira esyonyimbo, Uwe Mũbũyĩrĩre wa Ĩsraelĩ.

²³Nasyabũga nʼomulenge wʼobutseme omugulu ngakuwatira, Nasyakwimbira nʼomutima gosĩ, kusangwa wabĩrĩnyĩtongolya.

²⁴Nasyakanĩa eritunganene ryawe omo musibo gosĩ, Kusangwa abalenga erinyikola nabi, babĩrĩkĩndwa nʼerihemulwa.