Read nande Esyonyimbo 73 Bible Online

Esyonyimbo 73 - nande bible

Esyonyimbo 73

¹Olwimbo lwa Asafũ. Kwenene Nyamuhanga ni mubuya oko Ĩsraelĩ, Nʼoko bawite omutima owerĩre!

²Nĩkwa ĩngye nabya hakũhĩ nʼeritoga; Ebisando byage byabya ibikasonda erisunukala

³Kusangwa nabya ngatsura abakayiheka, Omugulu nalangira ababi ibawite ebindu.

⁴Sibegalawa omo bũlũmĩ; Ĩbakalĩre, kandi ĩbanenehĩre.

⁵Isibegalawa ngʼabandi ko bakagalawa, Kandi isibali nʼamalĩge ngʼabandi ko bawitego.

⁶Neryo eriyiheka lyabo bakambalalyo ngʼemisege omo bĩkya, Kandi bakambala omwaga ngʼekanzu.

⁷Emitima yabo ĩkũta ebibi, Nʼamalengekanĩa wabo oswĩre nʼesyombĩta nyibi.

⁸Bakasekereraya abandi, nʼerĩbũga emyatsi mibi; Bakayiheka nʼerĩkanĩa nʼerĩnũbya bandi.

⁹Bakahula Nyamuhanga omo lubula yo nabi, Kandi bakahamula bandu omo kihugo bo nabi.

¹⁰Litya abandu ba Nyamuhanga bakakeberabo, Kandi bakĩkĩrĩraya ebyosĩ bakabũga.

¹¹Bakabũga bati, Nyamuhanga akaminya ati kwehĩ? NʼOwendata Kutsibu awite menge kwehĩ?

¹²Ababi ko bali batya! Bawite bingi, kandi bakakanyĩrĩraya ebindu!

¹³Monzo ni busa ngabika omutima wage ĩnĩerĩre, Kandi ebyala byage byerĩre oko bibi ko busa.

¹⁴Kusangwa namagalwa omo musibo gosĩ; Kandi obuli ngyakya ngasuyirawa!

¹⁵Kumbe nabũga emyatsi ngʼeyĩ, Nga nabiriteba abandu bawe.

¹⁶Neryo monalenga eriminya omwatsi oyũ, Moneya omwatsi oyũ ĩnĩakalĩre.

¹⁷Nĩkwa omugulu naya omo Hekalũ yawe Monaminya ebikandisyabya oko babi.

¹⁸Kwenene ũkahĩrabo ahatendere, Kandi ũkatogayabo ibahera kutsibu!

¹⁹Bakaherĩbawa neryo-neryo; Bakatogotĩbawa omo buba!

²⁰Mukama, bali ngʼerilota, erikabulirana omo ngyakya; Omugulu ukabuka ukibirirawa ngoko babya.

²¹Omugulu amalengekanĩa wage abya nʼobũlĩge, Nʼomutima wage abya akagalwa,

²²Nabya mũkĩrũ, kandi mondaminya; Nabya ngʼenyama embere syawe.

²³Nĩkwa indi haguma nawe emigulu yosĩ, Kandi ukanyiwata oko byala byage.

²⁴Ukanyisondola omwʼihana lyawe, Nʼoko ndũlĩ wasyanyĩkokya nʼerĩsĩkya.

²⁵Ngwite ogundi elubula ate we kwehĩ? Kandi ekindi nangasonda muna-kihugo ni kyahi ate ini we kwehĩ?

²⁶Omutima wage nʼekĩrĩmũ kyage bĩkwĩre olukando; Nĩkwa Nyamuhanga ni kagala kage; Iye yo yũnyanzĩre kera na kera!

²⁷Kusangwa abakakũlekeranaya basyahola; Kandi ũkaheraya abakakulegulako.

²⁸Nĩkwa ĩngye, ni kibuya eribya hakũhĩ na Nyamuhanga! Omo Mwami Mukulu Nyamuhanga, ngabana omũteya Inatoka erĩkanganĩa emĩbĩrĩ yiwe yosĩ!