Read nande Esyonyimbo 86 Bible Online

Esyonyimbo 86 - nande bible

Esyonyimbo 86

¹Erisaba lya Dawĩdĩ. Uwe Mwami Mukulu, Unyihulikirire, ũnyĩsũbĩraye,

²Ũnyĩlamaye oko luholo, kusangwa sindiregula ukʼuwe; Uwe Nyamuhanga wage ũnyĩlamaye, Kusangwa indi mugombe wawe, ngayiketera we.

³Unyiganyire, uwe Mwami Mukulu, Ngakusaba omo musibo gosĩ.

⁴Ũtsemesaye omutima wʼomugombe wawe, Kusangwa erisaba lyage likakuhetukirako, uwe Mukama.

⁵Uwe Mukama, uli mubuya, kandi ukabwira, Woswĩre mwʼolwanzo olutyusa busana nʼabosĩ abakakulakira.

⁶Uwe Mwami Mukulu, uhulikirire erisaba lyage; Wowe erilaka lyage busana nʼerĩwatĩkĩbwa.

⁷Ngakulakira oko mugulu wʼobũlĩge bwage, Kusangwa ũkasũbĩraya erisaba lyage.

⁸Uwe Mukama, sihali gundi Nyamuhanga nga we, uwe Mukama; Sihali oyukatoka erikola ngoko ukatoka erikola.

⁹Ebihanda byosĩ wahangika byasyasa, nʼerĩkũramya uwe Mukama; Basyapipa obukulu bwawe.

¹⁰Kusangwa uli mbangi, ukakola emyatsi yʼeriswekera; Uwe ĩwowene uli Nyamuhanga.

¹¹Uwe Mwami Mukulu, ũnyĩkangĩrĩraye ebyo wanzĩre inakola, Ngandĩkowa nʼeritendiregula; Ũnyĩkangĩrĩraye erikukolera nʼomutima wage gosĩ.

¹²Nasyakupipa nʼomutima wage gosĩ, uwe Mukama Nyamuhanga wage; Nasyakanganĩa obukulu bwawe kera na kera.

¹³Olwanzo lwawe olutyusa busana nage ni lungi! Wabĩrĩnyĩlamya omo Kũlĩmũ mo hali.

¹⁴Uwe Nyamuhanga, abandu abakayiheka bakanyibambira; Endeko yʼabandu bakalĩre bakasonda erĩnyĩta, Ni bandu batekukenga.

¹⁵Nĩkwa uwe Mukama, uli Nyamuhanga wʼeriganyira, nʼowʼolwanzo. Sulihitana lũba, uli wʼobwenge ebiro byosĩ, Suliregula.

¹⁶Unyikebere, unyiganyire; Umbe akagala nʼerĩnyĩlamya, Kusangwa ngakukolera ngoko koyo akukolera.

¹⁷Ũnyĩkangaye ekiminyikalo kyʼobubuya bwawe, Neryo abakanyĩkwa obusu balangirekyo, bahemuke. Kusangwa uwe Mwami Mukulu wabĩrĩnyĩwatĩkya nʼerĩnyĩkĩranĩa.